Hìu pơrjum Cơldŭ Kảñ sát Ătbồ sră pơ àr gơnoar ătbồ mờ Rơndăp tăp sèng mpồl bơtiàn (sồ 50 gùng Lý Tự Trọng, sơnah ƀòn Buôn Ma Thuột, càr Dăk Lăk), gĭt nđờ rơhiang nă đảng viên gơ wèt Đảng ƀộ Sờh Niam chài, Tàp pràn să jan mờ Lòt nhơl càr, Dia càr Dăk Lăk tus lơh sră nggal tam gơl sră. Đảng viên ồng Hồ Văn Tĩnh pà gĭt, ală tŭ lơh ală sră ngal geh lơh mhar ngan.

“Đơs bal, lơh sir sră nggal jơh bơh 3 tus 5 phuk gời, broă ơm kơ̆p den kung mìng bơh 5 tus 7 phuk, kờp jơh ală broă lơh mìng jơh bơh 10 tus 15 phuk. Lài ngan, mpồl kwang àng pơlam anih nggui cùp rùp, tơnơ̆ lơh sền swì nền wơl jơnau yal tơnggĭt să tờm tàm sră nggal đảng viên, bè: ngai, nhai, nam deh, ngai mŭt Đảng, ƀòn tờm, tiah ơm kis…Dilah jơh ală jơnau yal di tòm tam toh jơh den lơh tơn ală broă lơh tam gơl”.

Tàm anih lơh tam gơl Kwang àng sơnah ƀòn Ea Kao, càr Dăk Lăk kung geh gĭt nđờ jơ̆t nă đảng viên tus lơh broă lơh tam gơl. Đảng viên ồng Trần Quang Thống, 65 sơnam, Ci ƀộ Jơnum làng bol ơm kis 11, sơnah ƀòn Ea Kao yal, sră nggal lơh tam gơl do ƀươn ƀoài ngan:

  “Añ mŭt Đảng nam 1984, tus tŭ do neh rlau bàr dơ̆ tam gơl sră rao, ndrờm tàm mpồl ling klàng lơm. Dơ̆ do, lơh tam gơl sră geh crăp cĭp jăt jơnau sồr pa bơh Mpồl Duh broă Dà lơgar dê nàng kờñ ătbồ đảng viên niam rlau mờ bơ̆t bơtàu ală mpồl đảng nền nòn rlau. Ală oh mi kwang àng dờp lơh kơnòl broă tam gơl sră jơh nùs jơh tồr, wil tơl mờ mìng jơh bàr pe phuk lơm là lơh sir”.

Càr Dăk Lăk tơnơ̆ tơmŭt bal geh rlau 137 rbô nă đảng viên, gơ wèt rlau 5 rbô 200 mpồl đảng. Lơh jăt Jơnau sồ sồ 51 Mpồl Đơng lam Đảng Dà lơgar dê mờ broă rơndăp lơh bơh Ƀộ Kwang àng dê, Kwang àng càr neh sồr Cơldŭ Kảñ sát Ătbồ sră pơ àr gơnoar ătbồ mờ Rơndăp tăp sèng mpồl bơtiàn bal mờ 102 sàh, sơnah ƀòn, rơndăp măy mŏk phan bơna mờ mpồl cau nàng lam lơh tơrgùm dờp, lơh tam gơl Sră đảng viên. Tơnơ̆ rlau dùl tơngleh lam lơh, neh lơh tam gơl rlau 70 rbô sră, lơh geh rlau 50% broă rơndăp lơh.

Digơlan tàm poh do, broă lơh lơh tam gơl sră rơ̆p lơh sir jơh, sơrlèt tơngai pơrgon dê jàu. Thiếu tá ồng  Lê Đình Đô, Lam bồ phó Cơldŭ Kảñ sát Ătbồ sră pơ àr gơnoar ătbồ mờ Rơndăp tăp sèng mpồl bơtiàn, Kwang àng càr Dăk Lăk, pà gĭt:         

“Cơldŭ rơcăng lài tă pơgồp jơnau đơs ai đơng lam Kwang àng càr in rơndăp măy mŏk phan bơna ai 102 mpồl lơh broă kwang àng sàh, sơnah ƀòn tàm jơh gùt càr in lơh jăt broă tơrgùm dờp tam gơl sră. Bơdìh hơ̆ tai, tàm tiah đah măt tơngai lik càr Dăk Lăk rơndăp 2 anih tơrgùm dờp tam gơl sră ai mpồl cau đảng viên gam lơh broă tàm do in; gơ wèt mờ kơnhoàl ù tiah đah măt tơngai mŭt càr dê kung rơndăp 3 anih, lơh broă “3 dơ̆, 4 mpồl”, lơh bal ngai rlô dơ̆ poh mờ ngai ñờk nàng tơrgùm tam gơl sră ai Đảng viên in”.