Tơnơ̆ dơ̆ tơmŭt bal Lâm Đồng, Bình Thuận mờ Dăk Nông, càr Lâm Đồng pa geh bă ù ơnàng rlau 24 rơbô kơi sồ vuông- ơnàng ngan rlau jơh gùt lơgar, mờ mờr 4 tơlak nă làng bol. Jơh gùt càr geh rlau 2 tơlak 700 rơbô nă cau tĕ khà. Càr Lâm Đồng geh 6 mpồl tĕ khà Cau ala mat Quôk hội (pồ 17 nă cau ala mat) mờ 38 mpồl lơh broă tĕ khà Cau ala mat Mpồl duh broă Làng bol càr (pồ 85 nă cau ala mat). Tàm kấp sàh geh 1 rơbô 4 mpồl lơh broă tĕ khà, 2 rơbô 301 tiah đùh sră nàng pồ 2 rơbô 949 nă cau ala mat.

Tus tŭ do càr neh lơh sir broă cih mat, lĭp sră cih mat cau tĕ khà, mat cau tơlik mat tĕ khà mờ rcang tơl làm ală bơta nàng bơyai lơh tĕ khà. Mpồl duh broă tĕ khà dà lơgar kung ring bal ai gơnoar càr Lâm Đồng in bơyai lơh đùh sră gờñ tàm 5 tiah tàm ngai 14/3, gơwèt mpồl ling sền gàr tiah nhàr lơgar lơh pôs đồng tàm ală sàh Hàm Tân, Thuận Hạnh, Thuận An (2 tiah) mờ sàh Dăk Wil.