Tơnơ̆ 1 nhai lam lơh jat “Broă lơh Quang Trung” sơr băc mhar lơh wơl, lơh niam wơl hìu ơm ai ală hìu bơnhă làng bol gơtìp hoàc huơr tài bơh mìu càl rơbŭt dờng dà tih dà lìu, tus ngai 29/ 12/ 2025 càr Lâm Đồng neh lơh sir lơh pa 9 nơm hìu. Bè 29 nơm hìu kờñ geh lơh pa gam wơl, tŭ do mpồl ling klàng, kwang àng, gơnoar atbồ mờ ală mpồl cau tàm càr gam lơh ngan dong kờl làng bol gơ jal ngan lơh sir. 

Tus ngai 31/12/ 2025 rơ̆p geh tai 4 nơm hìu geh lơh sir mờ 25 nơm hìu gam wơl càr Lâm Đông gam sơr băc mhar lơh sir lài mờ ngai 15/1/2026. Nàng ală hìu ơm lơh pa mờ lơh niam wơl ai làng bol in tơ̆nơ̆ dơ̆ mìu càl rbŭt dờng dà tih dà lìu sơlơ kơnhăp kơ̆, càr Lâm Đồng hòi jà ală mpồl dong kờl hìu bơnhă ngai lơh broă mờ bàr pe phan bơna bơt bơtàu kờñ pal geh.

Tus tŭ do, càr Gia lai neh lơh gơs broă lơh 456 tàm 674 nơm hìu, geh 67,66%. Mùl màl, kờp tus ngai 28 nhai 12, càr Gia Lai neh lơh gơs broă lơh niam wơl 27 rơbô 501 tàm 27 rơbô 522 nơm hìu gơtìp ờ niam, geh 99,92%. Tŭ do gam 21 nơm hìu pal lơh wơl, gam tàm tơngai lơh gơs dŭt ndơl, kờp dŭ rơ̆p lơh gơs lài mờ ngai 31 nhai 12 nam 2025. Gơwèt mờ broă lơh pa, càr Gia Lai neh sơn đờm mŭt lơh dơ̆ lĕ 674 nơm hìu gơtìp tơrlah uă.

Tus tŭ do, 456 nơm hìu neh lơh gơs; 218 nơm hìu gam tai gam tơrgùm lơh. Càr ai jơnau kờñ lơh ngan jào làng bol in lài mờ ngai 25 nhai 1 nam 2026. Bal mờ broă hòi jà cau lơh hìu, càr Gia Lai neh tă rơlao 720 tơmàn đong bơh kes priă dà lơgar mờ ală priă tă bơh mpồl bơtiàn nàng dong kờl rài kis broă lơh sa mpồl bơtiàn, bơsong hoàc huơr mờ lơh ală ƀòn ơm kis pa.