Bơh uă nhai do, bi K’Sáu, lam bồ thôn K’Rèn, sàh Hiệp Thạnh, càr Lâm Đồng sùm mblàng yal Adat tĕ khà, đơs sùm jơnau pal jat tàm ƀòn lơgar, ring bal, tus bal tơn mờ đùh sră ndơ̆p; mơkung yal tơngĭt uă jơnau sồr tĕ khà, broă lơh pơrjum cribơyai bal, cih mat cau tĕ khà. Jat bi K’Sáu, broă lơh jat di jơnau sồr rơ̆p pơgồp bơnah gàr niam dơ̆ tĕ khà bơyai lơh tàm ngai 15/3 tus do geh bơyai lơh làng bol lơh tờm, di mờ adat boh lam, lơngap lơngai mờ cau tĕ khà bơh thôn dê rơwah geh cau ala mat di pal:“Mờ bơta pràn bơh añ dê mblàng yal ai làng bol in bè dơ̆ tĕ khà, bè broă kwang bàng. Gŏ làng bol chờ hờp tŭ gĭt jơnau yal. Pa do pơrjum bơyai tàm thôn geh 2 nă oh mi dùl nă cau klau mờ dùl nă cau ùr nàng tĕ khà cau ala mat Mpồl duh broă Làng bol sàh mờr tus do. Làng bol kung ring bal ngan sơl”.

Tàm càr Lâm Đồng, nàng cau tĕ khà mờ làng bol in gĭt jơnau yal bè dơ̆ tĕ khà, kấp ủy Đảng, Mặt trận Dà lơgar mờ ală mpồl cíñ trị- mpồl bơtiàn, neh bơsram lơh jat jrô ơnàng làm uă, tơl làm Jơnau sồr sồ 46 ngai 16/5/2025 bơh Ƀộ Cíñ trị dê, Jơnau sồr sồ 02 ngai 23/9/2025 bơh Mpồl Lơh kơnòl broă sùm Tỉñ ủy càr bè đơng lam dơ̆ tĕ khà Cau ala mat Quôk hội khoă XVI mờ Cau ala mat Mpồl duh broă Làng bol ală kấp tơngai lơh broă bơh nam 2026 – 2031. Bơh hơ̆ Mặt trận Dà lơgar, ală mpồl Cíñ trị- mpồl bơtiàn pơgồp bal mờ gah lơh broă geh gơnoar tơrgùm mblàng yal ală bơta pa mờ Sơnoa boh lam nam 2013 tơnơ̆ dơ̆ tam gơl, bơtơl bàr pe bơta mờ Adat rơndăp gơnoar atbồ ƀòn lơgar (tam gơl); Adat tam gơl, bơtơl bàr pe bơta bơh Adat tĕ khà Cau ala mat Quôk hội mờ Cau ala mat Mpồl duh broă Làng bol; ală sră nggal; jơnau sồr lơh, jơnau bơto pơlam bơh ală anih lơh broă, mpồl lơh broă geh gơnoar, bơh Mpồl duh broă tĕ khà Dà lơgar dê...  Ồng Mai Linh Sơn, Củ tịc Anih duh broă Mặt trận Dà lơgar Việt Nam sàh D’ran, càr Lâm Đồng pà gĭt:“Mặt trận pơgồp bal mờ Anih duh broă, Cơldŭ lơh broă Niam chài Yal tơngĭt jơnau mblàng yal tơn mờ ală broă lơh ờs mờng. Dơ̆ 2 là mblàng yal bơh tàm Zalo mờ mblàng yal bơh ală dơ̆ pơrjum tă pơgồp jơnau đơs bơh cau tĕ khà tiah ơm kis dê nàng cau tĕ khà in lơh jat niam gơnoar mờ kơnòl broă jat jơnau sồr bơh Adat Tĕ khà. Gàr niam là làng bol gĭt wă jơh broă lơh geh gơrềng tus kơnòl broă bơh làng bol dê tus bal lơh jat kơnòl broă bơt bơtàu gơnoar atbồ. Lơh bè lơi Cau ala mat Mpồl duh broă Làng bol pal di pal là cau pơn rơ jak cau ala mat nùs nhơm mờ bơta kơ̆p kờñ ai Làng bol in”.

Ồng Trần Hùng Dũng, Củ tịc Anih duh broă Làng bol sàh Đơn Dương, càr Lâm Đồng pà gĭt:“Bơh ală broă lơh bè là loa pờ tơlik jơnau đơs den tàm Pang yal tơngĭt jơnau điện tử mờ tàm ală gah ndai neh mblàng yal jrô ơnàng làm uă tus ală rơnàng Làng bol tàm tiah do dê. Bơh hơ̆ làng bol kung neh gĭt wă gơnoar, kơnòl broă, bơta kwơ màng bơh dơ̆ tĕ khà dê den tàng tus bal lơh jat ală srơh nàng pơgồp bơnah ai broă bơyai lơh dơ̆ tĕ khà Quôk hội mờ Mpồl duh broă Làng bol ală kấp tàm tơngai tus rơ̆p geh bơyai lơh geh cồng nha niam bơnĕ ngan”.

Nàng ngai tĕ khà Cau ala mat Quôk hội mờ Cau ala mat Mpồl duh broă Làng bol ală kấp ngai 15/3 tus do geh bơyai lơh lơngăp lơngai, làng bol lơh tờm, ngan ngồn là dơ̆ pơrjum cíñ trị jrô ơnàng làm uă, là “Ngai chờ dà ia brê bơnơm dà lơgar” tơnơ̆ dơ̆ Pơrjum bơyai dơ̆ 3 pa do, broă lơh mblàng yal bè broă lơh cíñ trị dờng màng do bơh Dà lơgar dê geh càr Lâm Đồng lơh pràn rlau tai nàng lơh geh bơta ring bal, dùl nùs bal tàm Làng bol.

Bal mờ mblàng yal tơn tus mờ cau tĕ khà mờ làng bol, 124 sàh, sơnah ƀòn, tiah is ồn càr crăp rlau 2 rơbô 600 nơm pa nô mblàng yal bè tĕ khà, yồng rlau 3 rơbô nơm ƀồng bi biài, ƀồng bi hồng kì; ală loa pờ tơlik jơnau đơs ƀòn lơgar pờ pah dơ̆ ală tơngume bè Adat tĕ khà, gơnoar mờ kơnòl broă bơh cau tĕ khà dê. Tàm ală gơl gùng anih tờm, tiah suơn dờng mpồl bơtiàn niam tàm sơnah ƀòn Xuân Hương- Dà Làc, Bắc Gia Nghĩa, Phan Thiết, Hàm Thắng… rùp hin tiah mblàng yal tơrgùm bè dơ̆ tĕ khà lơh geh nùs nhơm chờ hờp chờ hờñ, brơn brài mờ pơgồp bơnah yờ tơnguh uă bơta gĭt wă bè jơnau kờñ, gơtha, gơnoar, kơnòl broă bơh cau tĕ khà dê.

Mò Phạm Thị Phúc, Phó Ƀí thư Tỉñ ủy càr, Củ tịc Anih duh broă Mặt trận Dà lơgar Việt Nam càr Lâm Đồng, pà gĭt, tàm ală sàh tiah sar lơgar ngài, ù tiah geh uă làng bol jat Yàng mờ làng bol jơi bơtiàn dồ ết nă cau ơm kis, nàng broă lơh mblàng yal dơ̆ tĕ khà geh cồng nha ngan ngồn, Mặt trận neh lơh jat niam gơnoar bơh mờr 900 nă cau geh bơngă pin dờn, ală cau duh broă Yàng gah pin dờn jat Yàng tàm broă lòt bal mờ gơnoar atbồ ƀòn lơgar:“Mặt trận tă pơgồp gơnoar tờm tàm broă pơgồp bal mờ ală gah, ală anih lơh broă geh gơnoar hòi jà, pơlam tàp yal tơngĭt jơnau yal nàng pơlam gùng dà ai cau geh bơngă pin dờn, ală cau duh broă Yàng tàm tiah làng bol jơi bơtiàn jat Yàng, nàng pơgồp bal broă lơh mblàng yal hòi jà. Sùm tàm bơyai jơnau yal kung bè là pơlam tàp nàng pơn jat tai lơh jat niam. Gơwèt mờ ală cau duh broă Yàng broă sùm gàr geh bơta gĭt gơ̆p bơnĕ bơnài bal, tam klăc bal mờ geh bơta pơgồp bal niam lòt bal mờ ală tiah tàm broă mblàng yal hòi jà gàr niam geh ală jơnau sồr”.

Mờ bơta mut lơh bal ndrờm bal, kràñ cê jơh nùs bơh jơh ală anih lơh broă cíñ trị; bơta rcang lài, bơceh lơh tàm broă lơh mblàng yal; bal mờ nùs nhơm geh kơnòl, ring bal uă bơh kwang bàng, đảng viên mờ ală rơnàng Làng bol, càr Lâm Đồng gam crăp rcang ai ngai chờ dờng bơh gùt làng bol dê tàm ngai 15/3 tus do. Bơh tiah sar lơgar ngài tus tiah drà anih tờm, nùs nhơm wèt tus ngai tĕ khà Cau ala mat Quôk hội khoă XVI mờ Cau ala mat Mpồl duh broă Làng bol ală kấp tơngai lơh broă bơh nam 2026 – 2031 tàm càr Lâm Đồng lơh gơrề uă pràn kơl dang.