Broă lơgh sac rơwah mut bơsram rơ̆p geh lơh jat uă tiah. Broă lơh pơrlòng sac rơwah mut bơsram mìng ngui gơwèt mờ ală hìu bơsram kấp pe cuyên. Nam bơsram do càr Lâm Đồng geh rlau 54 rơbô 800 nă kơnòm bơsram ơdŭ 9; broă jàu sac rơwah mut bơsram ơdŭ 10 ală hìu bơsram dà lơgar càr dê nam bơsram tus là mờr 45 rơbô nă kơnòm bơsram. Tàm hơ̆, ală hìu bơsram kấp pe sac rơwah mut bơsram 42 rơbô 500 nă kơnòm bơsram; 4 Hìu bơsram kấp pe cuyên pơrlòng sac rơwah mut bơsram mờr 1 rơbô 300 nă kơnòm bơsram mờ ală Hìu bơsram kấp pe jơi bơtiàn ơm sa bĭc tơn tàm hìu bơsram sac rơwah mut bơsram rlau 1 rơbô nă kơnòm bơsram.

Broă lơh sac rơwah mut bơsram jat tơl ală tiah dê. Tàm tiah rềp nhàr đah sàh, sơnah ƀòn, kơnòm bơsram geh dan cih mat tus bal jơnau kơ̆p kờñ sac rơwah mut bơsram tàm ală hìu bơsram rềp tiah ơm kis. Tơngai dan cih mat tus bal sac rơwah mut bơsram ơdŭ 10 ală hìu bosram dà lơgar tàm càr Lâm Đồng geh lơh bơh ngai 25 tus ngai 30 nhai 5 mờ broă lơh tàm internet. Broă sac rơwah rơ̆p geh bơyai lơh bơh ngai 15 tus ngai 24 nhai 7 mờ lơh sir broă sac rơwah mut bơsram lài mờ ngai 31 nhai 7. Tơnơ̆ hơ̆, ală Hìu bơsram kấp pe bơdìh dà lơgar, ală anih tờm bơto bơtê sùm, anih tờm bơto broă lơh tàm Lâm Đồng rơ̆p bơyai lơh sac rơwah mut bơsram mờ lơh sir lài mờ ngai 31/8/2026.