Broă rơndăp ai kwang bàng ờ mìng jăt tàm sră cơng tàng jơh bơsram, sơnam lơh broă lơm mờ gam sền gròi uă pràn jak lơh broă ngan ngồn, nùs nhơm geh kơnòl mờ cồng nha broă lơh. Uă kwang bàng kơnòm să, geh broă bơsram broă mờng lơh, bồ tơngoh kơlôi sơnơng tam gơl pa, khin kơlôi, khin lơh neh geh pin dờn jàu kơnòl broă tàm ală anih kwơmàng.

Ồng Hồ Văn Mười, Củ tịc Anih duh broă Làng bol càr Lâm Đồng pà gĭt, tŭ geh rơndăp ai di broă, kwang bàng lơh niam pràn jak lơh broă, nùs nhơm kơnòl geh tơngguh uă, broă lơh bơsong sơrbăc mhar, geh cồng nha rlau, tơrmù jơnau pleh pồn, tàm tuh kơnòl bơh hơ̆ lơh kơ̆ kơl jăp tai bơta pin dờn bơh Làng bol dê gơ wèt mờ gơnoar ătbồ ală kâp. Mùl màl pà gŏ, broă rơndăp ai kwang bàng “di broă, git nền broă” bơh càr Lâm Đồng dê ờ mìng là jơnau sồr tềng đăp măt lơm mờ gam là broă lơh bơsong jŏ jòng, tơnggŏ jơh nùs lơh ngan cíñ trị uă càr dê tàm bơ̆t bơtàu mpồl kwang bàng tơl nùs nhơm niam, pràn jak tàm broă lơh mờ geh bơngă pin dờn, lơh geh jơnau sồr kơnòl broă pa tàm bơta pa, pơgồp bơnah ai tơl bơta bơtàu tơnguh lơh sa – mpồl bơtiàn ƀòn lơgar dùl bă kơnhăp jŏ.