Rơndăp broă lơh bơ̆t bơtàu phan bơna măy mŏk tiah làng bol ơm kis, ntrờn ơm kis pa tàm sàh Dà Huoai, càr Lâm Đồng là dùl tàm ală broă bơ̆t bơtàu tờm kwơmàng drơng jơnau kờñ ntrờn ơm kis pa bơh gùng rơndeh lòt mhar Tân Phú – Bảo Lộc. Rơndăp broă lơh geh khà priă bơcri kờp jơh rlau 150 tơmàn đong. Bal mờ gơrềng tài bơh trồ tiah mìu uă, broă lơh gam gơtìp lơyài tơngai lơh tài tìp kal ke tàm broă lơh ai ù. Ồng Lê Bảo Thi, ătbồ rơndăp broă lơh bơ̆t bơtàu phan bơna măy mŏk tiah làng bol ơm kis, ntrờn ơm kis pa do pà gĭt, mpồl cau tờm lơh neh rơcăng wil tơl phan bơna, măy mŏk, cau lơh broă, crăp rơcăng lơh mhar tơngai pơrgon lơh tŭ ală bơta gơkòl geh bơsong mơ tơn.

“Tŭ do, cau lơh broă drơng broă sùm tàm tiah lơh broă êt ngan là bơh 60 nă cau, lơh jơh ală bơnah broă. Mìng geh ơm kơ̆p geh tơngai, lơh gơtùi den cau tờm lơh rơ̆p lam lơh mơ tơn. Tus ngai 31/12 sền bal là jàu gơtùi ai ală hìu làng bol ntrờn ơm kis pa in”.

Nam 2025, kờp jơh priă bơcri dà lơgar càr Lâm Đồng dê là 18 rbô 700 tơmàn đong. Tàm 7 nhai, jơh gùt càr ai geh pơgăp 30% broă rơndăp lơh. Bơh tài ai priă bơcri dà lơgar lơyài uă ngan tìp gơkòl tàm ai ù. Tŭ do, uă rơndăp broă lơh, broă bơ̆t bơtàu neh lơh sir sră nggal, broă lơh, mơya măt ù ờ hềt geh den tàng ờ gơtùi lam lơh.

Ồng Hồ Văn Mười, Củ tịc Anih duh broă Làng bol càr Lâm Đồng đơs là nàng lơh sir broă rơndăp lơh ai priă bơcri dà lơgar nam 2025 lơh geh rlau 95%, càr kờñ pal geh bơta jơh nùs uă ngan. Tàm hơ̆, broă lơh ai măt ù là dùl broă kwơmàng ngan, gơ sồr jơh ală anih lơh broă cíñ trị mŭt lơh bal.

 “Mờng chài kwang bàng ai măt ù dê là kwơmàng ngan. Cau lơi lòt tus lơh broă mờ muh măt nùs nhơm kră kơldang ir là ờ gơtùi. Tài bè hơ̆, pal rwah cau, rơndăp cau bè lơi, lòt lơh broă lơh hòi jà là cau lơi. Tŭ lơh broă lơh hòi jà ai măt ù là pal jơh ală anih lơh broă cíñ trị mŭt lơh bal”.