Tàm ƀòn Akŏ Dhông, sơnah ƀòn Buôn Ma Thuột, làng bol tơrgùm rê hờ Hìu Niam chài ƀòn nàng jat sền dơ̆ sơn đờm mut lơh Pơrjum dờng dơ̆ XIV bơh Đảng dê tàm nùs nhơm ki ngàm, chờ hờp. Bi H’Tít Alê ô, ơm tàm ƀòn Akŏ Dhông đơs: “Jat sền tơn dar Pơrjum dờng Đảng dơ̆ 14 añ chờ hờp ngan mờ pơn yờ să ngan tài do là dùl tàm ală bơta tam gơl dờng ngan bơh dà lơgar he dê. Añ kơp kờñ ngan Đảng geh gùng dà broă lơh bơtàu tơnguh bè lòt nhơl mpồl bơtiàn nàng sền gàr mờ ngui niam bơta niam chài jơi bơtiàn tàm tŭ tơngai mut gơ rờm bal”.

Tàm ƀòn Alê A, sơnah ƀòn Ea Kao, nùs nhơm chờ hờp chờ hờn kung gơ rề tus làm gùt ală hìu rơng, tàm tơl gơl gùng lòt tàm ƀòn. Tàm hìu niam chài mpồl bơtiàn, gal ngan làng bol neh bơ tòm tơrgùm mat, jat sền dar pơrjum sơn rờp bơh Pơrjum dờng dê. Ồng Y Kanin, ơm tàm ƀòn Alê A đơs: “Làng bol tàm ƀòn bol he bal mờ gơp tơrgùm tàm Hìu niam chài mpồl bơtiàn nàng jat sền ală jơnau tơnggit bè Pơrjum dờng. Bol hi kơp kờñ là, Pơrjum dờng rơp ai tơlik uă gùng dà broă lơh, jơnau lơh nền ngan ngồn, pơgồp bơnah bơtàu tơnguh lơh sa – mpồl bơtiàn, sền gròi uă rlau tai tus tiah làng bol jơi bơtiàn dồ êt nă cau, sền gàr mờ ngui niam bơta niam chài ală jơi bơtiàn, chồl tơnguh kă bro phan, broă drơng ala tàm ƀòn lơgar”.

Tàm tiah đah mat tơngai lik, tàm ală ƀòn lơh ka kềng gah dà lềng, nùs nhơm wèt hờ Pơrjum dờng kung duh hồl ngan sơl. Uă cau lơh ka ai tơnggŏ bơta pin dờn mờ kơp kơnờm tàm ală broă lơh nền cèng bơta tam gơl pràn, lơh gơlik bơta gơn kơnờm bơtàu tơnguh tơl làm, mờ kung kơp kờñ geh tai gùng dà broă lơh dong kờl nàng iang nùs lòt kup, tras ka tàm dà lềng, pơgồp bơnah gàr kơ̆ gơnoar tờm bồt dà lềng bơh dà lơgar dê.

Ồng Đặng Nhu, cau lơh ka sơnah ƀòn Phú Yên đơs nền: “Bol hi là cau lơh ka, kơp kờñ Pơrjum dờng Đảng geh gùng dà broă lơh bơtàu tơnguh gah lơh phan tàm dà lềng nàng làng bol iang nùs lòt kup, tras phan tàm dà lềng, ờ mìng bơtàu tơnguh lơh sa mờ gam pơgồp bơnah sền gàr gơnoar tờm bồt dà lềng”.