Jơnau geh ai tơngŏ tàm sơnah ƀòn Bồng Sơn, càr Gia Lai, do là dùl tàm ală sơnah ƀòn lơh gờñ ală tiah lơh ƀòn ơm kis pa drơng tàm broă lơh Rơndăp broă lơh gùng rơndeh ồs lòt mhar tàm gơl đah Tô đah Jum, pà gŏ broă tus ndrờm bal bơh gơnoar atbồ bal mờ broă kờñ bal niam bơh làng bol dê. Tơnơ̆ mờ tŭ geh mblàng yal, lam lơh bè gùng dà broă toh wơl ù, uă hìu làng bol tàm tiah drà Thiết Đính Nam neh rơcang pơgồp bal, tŭ lơi kung rơcang jào ù. Hìu nhă mò Trần Thị Thu là dùl tàm ală hìu neh gờñ jào rơlao 1 sào ù sre lơh kòi mờ chờ hờp dờp priă tơm ù. “Tŭ do Dà lơgar toh ù nàng lơh broă den geh bơta kwơ ai làng bol in, den tàng he ring bal, dờp bal, cau lơi kung chờ hờp lơm”.

Bơta ring bal do ờ di là ni sơna geh, mờ tus bơh ală broă lơh di pal ngan, di mờ mùl màl bơh gơnoar atbồ càr dê. Bơh broă pơrjum làng bol, mblàng yal bè gùng dà broă lơh… jơh ală ndrờm geh lơh drờm bal, loh làng. Ồng Lê Văn Phúc, Atbồ tiah drà Thiết Đính Nam, sơnah ƀòn Bồng Sơn pà git, tŭ làng bol wă loh gùng dà broă lơh den broă lơh jăt gơs ƀuơn ngan rơlao jơh: “Sơnah ƀòn sền gròi ngan, tiah ƀòn den bơyai lơh mblàng yal, ai geh broă rơndăp lơh hơ̆ sồng pơrjum bơyai lơh. Làng bol den ring bal uă tàm broă lơh ƀòn ơm kis pa nàng drơng tàm broă lơh rơndăp broă lơh gùng rơndeh ồs lòt mhar đah Tô đah Jum in. Jơh ală hìu làng bol gơrềng tàm broă tơm ntrờn ù tiah neh dờp priă tơl, đơs ngan là làng bol ring bal uă ngan”.

Nùs nhơm ring bal kung lơh geh uă tàm sơnah ƀòn Hoài Nhơn Bắc, do là sơnah ƀòn geh git nđờ rơhiang hìu làng bol gơtìp gơrềng bơh rơndăp broă lơh do. Hìu nhă bi Nguyễn Văn Phán, tàm tiah drà Hy Văn neh jào 2 bă sre mờ ơnàng 1 sào 5, ring bal uă mờ gùng dà broă lơh bơh Dà lơgar dê: “Hìu nhă bol añ kung bè làng bol tàm tiah drà Hy Văn do ring bal mờ gùng dà broă lơh nàng tơm ntrờn ù tiah, broă rơndăp lơh do dê. Tài tàm do làng bol chờ hờp ngan tài là gùng dà bơtàu tơnguh lơh sa mpồl bơtiàn càr dê den tàng làng bol ring bal uă ngan”.

Nàng geh jơnau ring bal do, ală kấp gơnoar atbồ càr Gia Lai neh rơcang lơh uă gùng dà broă lơh ndrờm bal, bơh broă rơndăp ù tiah lơh ƀòn ơm kis tus mờ broă kờp sền, tơm bơtơl mờ dong kờl làng bol. Ồng Trần Minh Lâm, Phó Củ tịc Anih duh broă Làng bolsơnah ƀòn Hoài Nhơn Bắc pà git, broă mblàng yal pơn jăt tai geh ai là broă lơh tờm mờ lơh geh sùm tus tàm tŭ lơh gơs broă tơm ntrờn ù tiah. “Bol añ pơn jăt tai mblàng yal nàng làng bol in wă loh bè broă lơh kwơ màng bơh dà lơgar dê nàng lơh geh nùs nhơm ring bal bơh làng bol dê pơn jăt tai dờp geh bă ù gơwèt mờ ală gơl gùng tờm bơh gùng rơndeh ồs lòt mhar dê. Bơta tờm là mblàng yal nàng làng bol ring nùs kờñ bal, nàng broă tơm ntrờn ù tiah geh ƀuơn mờ gờñ jào ù lơh rơndăp broă in”.

Tàm gùt càr Gia Lai, Rơndăp broă lơh gùng rơndeh ồs lòt mhar tàm gơl đah Tô đah Jum lòt gan 18 sàh, sơnah ƀòn, lơh gơrềng tus mờr 4 rơbô hìu làng bol, mờ kờp jơh priă tơm ntrờn ù tiah là mờr 6 rơbô 800 tơmàn đong. Tus tŭ do, càr Gia Lai neh lơh gơs broă rơndăp lơh 38 ƀòn ơm kis pa, gàr tơl ù lơh hìu ơm ai ală hìu làng bol gơtìp gơrềng in.

Jăt ồng Nguyễn Tự Công Hoàng, Phó Củ tịc Anih duh broă Làng bol càr Gia Lai pà git, nàng gàr di tơngai lơh bal, càr geh sùm broă pơrjum jăt tơngai nàng sền wơl broă lơh, mờ rơcang lài bơta pràn, di tŭ tơm priă bơtơl ù tiah ai làng bol in. “Tàm tơngai tus ală tiah pal lơh pràn mờ lơh mhar rơlao tai. Gŏ tiah lơi ai lài tơm ntrờn lài nàng geh ù tiah ai mpồl lơh broă in lơh broă. Sồr ală tiah ờ pal sền jơh 100% hơ̆ sồng ngui priă mờ kờp sền tus tàm tiah lơi den dờp tus tàm tiah hơ̆ mờ ngui khà priă tus tàm tiah hơ̆ tơn, tơm priă tus tàm tiah hơ̆ mờ jào ù tiah bơnah ù mờ làng bol neh dờp priă tơm bơtơl”.

Mờ broă tus ndrờm bal bơh mpồl lơh broă cíñ trị mờ kwơ màng là broă ring bal bơh Làng bol dê, broă tơm ntrờn ù tiah lơh rơndăp broă lơh gùng rơndeh ồs lòt mhar đah Tô đah Jum tàm càr Gia Lai gam geh ală cồng nha niam. Do rơ̆p là bơta tờm kwơ màng nàng rơndăp broă lơh kwơ màng dà lơgar dê gờñ geh lơh, ai geh bơta pràn bơtàu tơnguh pa ai tiah Tây Nguyên mờ gùt lơgar in.