Mò Rơ Châm H’ Yéo, kis tàm sơnah ƀòn Pleiku, càr Gia Lai, lài do là Kwang bàng geh jơng tàm Mpồl lơh kơnòl broă sùm Tỉñ ủy, Củ tịc Anih duh broă Mặt trận Dà lơgar Việt Nam càr Gia Lai sền gròi ngan ală jơnau tơngit bè Pơrjum dờng cau ala măt gùt lơgar dơ̆ XIV Đảng dê. Mò H’ Yéo pà git, kơnờm mờ broă đơng lam mờ sền gròi uă ngan bơh Đảng dê gơwèt mờ tiah làng bol jơi bơtiàn ờ gal cau, den tàng rài kis làng bol tàm càr Gia Lai đơs is mờ Tây Nguyên đơs bal neh geh gơguh mờ tam gơl niam tơl ală bơta. “Làng bol kis tàm Tây Nguyên sùm dùl nùs jăt Đảng, Jăt Wa Hồ. Kơ̆p kờñ đảng he pơn jăt tai sền gròi, ai tơl bơta niam nàng Tây Nguyên bơtàu tơnguh lơh sa, niam chài, bơto bơtê, mờ broă bơ̆t bơtàu Tây Nguyên pas gơs bè lơh sa, pràn jăk bè ngăc ngar. Hơ̆ là ală bơta kwơ màng ngan”.

Jăt nùs nhơm kơlôi sơnơng bơh dùl nă cau neh uă nam tus bal mờ broă ai geh gùng dà broă lơh bal mờ jơnau sồr bơh gơwèt mờ jơi bơtiàn dê, ồng Ksor Phước, tàm càr Gia Lai, lài do là Kwang bàng geh jơng tàm Đảng dà lơgar, lài do là Ƀộ trưởng, Atbồ Anih duh broă Jơi bơtiàn Cíñ phủ dê đơs nền gơwèt mờ broă jơi bơtiàn bal mờ ală gùng dà broă lơh ai tiah làng bol jơi bơtiàn ờ gal cau in neh geh Đảng mờ Dà lơgar lơh jăt mờ geh lơh sùm. Ồng Ksor Phước pin dờn tàm tơngai lơh broă pa, Đảng mờ Dà lơgar rơ̆p sền gròi mờ lơh geh cồng nha ală bơta kwơ niam chài ờs mờng, ù tiah niam, tiah tềl kah yau rài lài do nàng bơtàu tơnguh uă bơta niam chài, lòt nhơl kơl jăp, pơgồp bal mờ gơguh lơh sa mờ prăp gàr bơta niam chài krơi is. “Bơta tờm jơi bơtiàn sùm là bơta gơ sồr ngan mờ ală mpồl dră wơl sùm sơgràm nàng lơh bơchồt, lơh ờ niam tus mờ nùs nhơm tam klăc bal jơi bơtiàn dê. Niam ngan là pal bơ̆t bơtàu niam broă làng bol sền gàr lơngăp lơngai Dà lơgar, tơnguh bơta pràn sền gàr dà lơgar tàm gùt làng bol, tơnguh broă rơcang gàr lài dà lơgar tàm broă lơh kwơ màng bơtàu tơnguh lơh sa mpồl bơtiàn ndrờm bal. Bơtàu tơnguh lơh sa nàng tơnguh broă sền gàr dà lơgar-lơngăp lơngai mờ gàr niam dà lơgar lơngăp lơngai nàng bơtàu tơnguh lơh sa. Do là jơnau mờ añ kơ̆p kờñ ngan gơwèt mờ tơngai lơh broă tus do bơh Đảng dê gơwèt mờ gùt lơgar, tàm hơ̆ uă ngan là gơwèt tàm tiah jơi bơtiàn ờ gal cau tàm lơgar Việt Nam dê”.

Tàm tiah Tây Bắc, làng bol jơi bơtiàn ờ gal cau kung gam wèt nùs nhơm tus tàm Pơrjum dờng cau ala măt gùt lơgar dơ̆ XIV bơh Đảng dê sơl, pơyoa jơnau kơ̆p gơn tàm ală kơrnoăt kwơ màng bơh Đảng dê tàm tơngai bơtàu tơnguh pa. Ồng Nguyễn Văn Độ, cau geh đảng tàm ƀòn Hưng Hà, sàh Chiềng Khương, càr Sơn La kơ̆p kờñ Pơrjum dờng dơ̆ XIV rơ̆p pơn jăt tai ai geh ală gùng dà broă lơh geh kwơ màng, jŏ jòng, gơdờp mờ bơta tàm mùl màl bơh tiah làng bol jơi bơtiàn ờ gal cau dê, tàm hơ̆ uă ngan là tàm broă bơtàu tơnguh lơh sa pơgồp bal mờ tơrmù rơƀah kơl jăp. “Bol añ kơ̆p kờñ Đảng mờ Dà lơgar pơn jăt tai ai tơl bơta niam nàng làng bol lơh broă sa suơn sre in geh càn priă rề ơnàng ù tiah lơh sa rơlao. Mờ pơn jăt tai lam ală mpồl lơh sa kă bro bơcri priă lơh gơs nền bè lơh sa suơn sre tàm tiah ngài, bè lơh gơs nền bè tam phan, ròng phan, phan tàm dà nàng cèng geh cồng nha lơh sa uă rơla ai làng bol in”.

Kwang bàng, cau geh đảng bal mờ làng bol tàm sàh Chiềng Khương, càr Sơn La kung tơlik nùs nhơm kơ̆p kờñ ală broă lơh jơnau kờñ dà lơgar pơn jăt tai geh lơh ndrờm bal, geh cồng nha, tàm hơ̆ uă ngan là Broă lơh bơtàu tơnguh lơh sa mpồl bơtiàn tiah làng bol jơi bơtiàn ờ gal cau mờ tiah kơh bơnơm, geh sền là anih kơl dìng kwơ màng dong kờl làng bol geh tai priă nàng bơcri tàm broă lơh sa, kơl jăp rài kis. Ồng Đào Việt Phương, Phó Ƀí thư Duh broă sùm Đảng ủy sàh Chiềng Khương pà git: “Bol añ pin dờn mờ kơ̆p gơn Pơrjum dờng dơ̆ XIV Đảng dê rơ̆p pơn jăt tai ai geh ală gùng dà broă lơh geh nùs nhơm kơlôi sơnơng kwơ màng, ai geh bơta pràn kơl dang broă bơtàu tơnguh lơh sa mpồl bơtiàn kơl jăp tàm tơngai pa. làng bol kơ̆p gơn geh pơn jăt tai sền gròi tus mờ lơh sa suơn sre; geh broă dong kờl mùl màl tàm broă lơh sa suơn sre jăt gùng dà broă lơh gơs phan kă bro dê. Mờ kơ̆p gơn Đảng pơn jăt tai geh kơrnoăt boh lam, broă dong kờl bơtàu tơnguh lơh sa mpồl bơtiàn gơdờp mờ tiah nhàr lơgar bè bơtàu tơnguh lơh sa mpồng nhàr lơgar”.