Ala mìng lam lơh tam gơl sồ tàm bơta măi mok, anih cribơyai tàm bơyai broă pơgồp bal mờ broă lơh gơlik phan, kă bro pah ngai làng bol lơh broă sa dê bè jòi mờ sền swì bơta ngan ngồn jơnau yal tơnggit dê, ngui AI, livestream, tac phan tàm internet, sền gròi cau blơi phan mờ tàm tơrbŏ bal drà kă bro; cribơyai bè broă làng bol lơh broă sa lam lơh tam gơl sồ bơh jơnau kờñ mùl màl.

Mò H’Giang Niê - Chủ tịch Mpồl cau lơh broă sa càr Dăk Lăk đơs là, Dăk Lăk geh uă bơta pràn, bơta ƀuơn bè lơh sa suơn sre, mờ uă phan lơh gơs bơh suơn sre tiơng pơn rơ krơi is. Bulah bè hơ̆, lơh gơlik phan geh bơta niam mìng rơp là broă bơh chờm. Cau lơh phan gam pal sền gròi tus rùp hin, kơldung ơn, jòi git anih lơh gơlik, bơt bơtàu măt kă bro, yal tơnggit mờ bơta pràn lơh jat jơnau kờñ drà kă bro dê. Mờ kung pal ai phan mut tàm internet nàng kờñ tơnguh priă lơh geh, tac phan lơh gơs. Do là jơnau sồr jal mhar mờ pal geh tàm tơngai tŭ do:

“Nàng dong kờl cau lơh broă sa ngan ngồn lơh tờm drà kă bro, bơta ai lơh lài sồ 1 bol hi dê là pờ ală ơdŭ bơto pơlam, dong làng bol git loh bơta tờm jơnau git wă kuơmàng. Bal mờ hơ̆, Mpồl kung pơlam cau lơh broă sa pơgồp bal mờ ală KOC, KOL geh bơngă pin dờn nàng ai phan lơh gơs bơh suơn sre mut tàm ală anih kă bro phan điện tử. Tơnơ̆ ală broă lơh do, bol hi rơp tơng gơs mpồl dong kờl tac phan lơh gơs bơh suơn sre, pơlam tơn làng bol in git bơta chài livestream tac phan kung bè broă mut tàm ală mạng kă bro phan sồ ndai. Jơnau đơs mờ bơta kơp kờñ dờng ngan rlau jơh bol hi dê là: Cau lơh broă sa tềng lơi, Mpồl cau lơh broă tềng hơ̆. Mpồl sùm là anih kơldìng pin dờn ngan rlau jơh, lòt bal mờ làng bol tàm tŭ tam gơl sồ”.

Tàm Anih cribơyai, ală cau ala mat kung đơs tus broă bơt bơtàu bơta pin dờn mờ cau blơi phan. Ală bơta geh cribơyai geh yal loh làng anih lơh gơlik, màh phan, QR, jơnau yal tơnggit lơh gơlik phan, tơngume mblàng yal jơnau ngan ngồn mờ sền gròi cau blơi phan tơnơ̆ tac phan. Bơh mùl màl uă nam tac phan tàm internet geh cồng nha, mò Trần Thị Bích, dùl nă cau lơh broă sa sàh Ea Súp đơs là, mìng tŭ rơcang wil tơl jơnau yal tơnggit bè phan bơna, rơ wah dùl gah dipal, bơt bơtàu tơngume mờ lơh gơlik bơta tàm pơgồp bal đềt mềr, tơm bơh bơr sùm mờ cau sền, broă mut tàm drà kă bro sồ hơ̆ sồng lơh geh cồng nha:

“Bơta tờm lơh nền tus broă gơtùi tac phan hơ̆ là phan pal ngan, jơnau yal phan bơna pal ngan, bal mờ broă lơh sền gròi cau blơi niam, wil tơl. Dilah mìng livestream, đơs gời, den kal ke ngan nàng jà cau blơi phan, tài he ờ di là ală KOL halà KOC tiơng pơn rơ geh bơta gơ rềng dờng. Bè hơ̆ den tàng, bơta kuơ pal ngan mờ bơta niam ngan phan bơna dê là bơta tờm lơh gơs cồng nha mìng dùl nơm”.

Tàm broă lơh, Mpồl bơyai lơh tơlik mat mpồl Zalo “Cau lơh broă sa Dăk Lăk tac phan online”, lơh gơlik anih tàm tơrbŏ bal đah cau lơh broă sa, mpồl lơh broă bal mờ ală cau tờm geh phan kờñ yal tơnggit, tac tàm măi mok sồ.