Tơnơ̆ mờr nggùl nhai tơrgùm bơsong jơnau gơ lời wơl tài bơh trồ tiah lơh aniai, ồng Lê Văn Trung, dùl nă làng bol ơm tàm sơnah ƀòn Tuy Hoà, càr Dăk Lăk, gam ờ ru ngan rcang ai dơ̆ lòt tàm dà lềng sơn rờp bơh kàl tras kŭp ka Bắc dê. Ồng Trung pà gĭt: “Dơ̆ mìu dờng dà tih dà lìu pa do hìu đam ngơr bam jơh, ơhò kŭp ka gơtìp gơ kòl, pal roh uă ngai nàng pơs wàs mờ lơh niam wơl. Tus tŭ do sền bal neh bơsong jơh rao den hơ̆ sồng gơtùi lòt tàm dà lềng tras kŭp ka wơl. Trồ tơngai tŭ do ƀuơn ngan, dilah lòt tras kŭp ka niam den khà lơh geh rơ̆p uă rlau. Añ kơ̆p kờñ dơ̆ lòt tras kŭp ka dà lềng dơ̆ do geh cồng nha uă, geh priă jền nàng bè ờs wơl rài kis mờ wă rò sa tềp bơhiàn dà lềng geh wil tơl”.

Trồ tiah lơh aniai pơn jat sùm ờ mìng lơh kal ke broă lơh tras kŭp ka lơm mờ gam lơh tơnguh tai priă jền lơh niam wơl ơhò, plung, hìu đam bơh uă làng bol lơh ka tiah đah mat tơngai lik càr Dăk Lăk dê, tàm tŭ priă tềm pềr gơ lơh bè neh jơh lơm. Jat ồng Trần Văn Biên, Củ tịc Anih duh broă Làng bol sàh Tuy An Đông, càr Dăk Lăk pà gĭt, kal ke dờng ngan rlau jơh tŭ do bơh làng bol lơh ka dê là ờ tơl priă jền nàng lơh kơnhăp wơl ơhò, plung mờ bè ờs wơl rài kis: “Tơnơ̆ mìu càl rơbŭt dờng sồ 13 mờ dơ̆ mìu dờng dà tih dà lìu kah yau, uă hìu bơnhă gam àñ ơnòng ală bơnah priă dồs neh tus tơngai tơm. Gơnoar atbồ tiah do gam lơh ngan dong kờl, mơkung dan mờ ală anih priă jền lơh jat lời ing dồs, tơn jŏ tơngai tơm dồs ai làng bol in. Anih priă jền Cíñ sác sàh hội kung gam rcang lài jòi gĭt ală hìu bơnhă làng bol càn priă nàng kờp sền, geh jơnau đơs broă bơsong dong kờl di pal, mơkung dan mờ ală kấp, ală gah broă lơh geh ală bơta ai làng bol in geh càn priă wơl, tơrmù priă dồs, tơrmù priă cồng, dong làng bol geh tŭ tơngai niam lơh broă lơh sa wơl, iang nùs lòt tàm dà lềng tras kŭp ka”.

Tŭ ală ơhò kŭp ka sơnđờm lòt tàm dà lềng wơl den jơnau sồr geh ai ờ mìng là bơtàu tơnguh wơl lơh sa lơm, mờ gam pal tras kŭp ka di mờ jơnau sồr, lơngăp lơngai mờ kơnhăp kơ̆. Mờ gơnoar broă dong kờl làng bol lơh ka lòt tàm dà lềng, mơkung là “lơh nền” kwơ màng tàm broă lơh atbồ broă tras kŭp ka mờ rcang lài kơryan tras kŭp phan tàm dà lềng  tìs mờ adat boh lam, ờ yal jơnau mờ ờ lơh jat jơnau sồr (rcang lài kơryan tras kŭp phan tàm dà lềng jat jơnau sồr IUU), anih ơhò ơm tàm dà lềng Đông Tác, tŭ do gam atbồ 515 nơm ơhò lơh ka gơwèt 2 sơnah ƀòn Phú Yên mờ Tuy Hòa, tàm gơ̆ geh 328 nơm ơhò geh bơta jòng bơh 15 thơk rlau hơđang geh crăp măi mok jat sền gùng lòt. Uă ngan ală ơhò do lòt tras kŭp ka ngừ tàm dà lềng dờng, gah broă tờm bơh làng bol lơh ka tiah do dê.

Tài gơrềng bơh uă dơ̆ mìu càl rơbŭt dờng tàm nam, khà phan tàm dà tàm Anih ơhò ơm Đông Tác nam do kờp dŭ lơh geh pơpgăp 3 rơbô 500 tấn, gơmù pơndrờm mờ khà kờp bal 4 rơbô tấn bơh ală nam lài dê. Bulah bè hơ̆, bơh ngai 16/12, tŭ trồ tiah rơ hời bè ờs wơl, uă ơhò tras kŭp ka neh sơnđờm lik bơh anih ơhò ơm, mut tàm kàl tras kŭp ka pa mờ kơ̆p kờñ bơtơl wơl bơnah lơi ală bơta hoàc huơr tài bơh trồ tiah dê lơh aniai. Ồng Hà Viên, Kwang lam bồ Mpồl atbồ Anih ơhò ơm Đông Tác pà gĭt, ndrờm mờ broă lơh geh ală bơta ai ơhò tras kŭp ka in lik mut tàm anih ơhò ơm ƀuơn ngan, mpồl lơh broă is ồn sền gròi broă lơh mblàng yal, bơto pơlam làng bol lơh ka in lơh jat niam ală jơnau sồr bè tras kŭp ka tàm dà lềng:“Bol añ sùm hòi jà ală cau tờm măi, cau tờm ơhò lơh jat niam ală sră nggal sồr lơh bơh Ƀộ mờ Thủ tướng Cíñ phủ dê. Tŭ lòt tàm dà lềng tras kŭp ka pal pờ măi jat sền gùng lòt, cih tơl làm jơnau cih tras kŭp ka dê; tŭ mut tàm anih ơhò ơm pal tong sră cih pah ngai mờ pơgồp bal mờ anih ơhò ơm tơmŭt ală jơnau tàm măi mok jòi gĭt tiah tờm kŭp ka điện tử. Mơkung jơh nùs lơh ngan mblàng yal nàng làng bol kŭp ka in ờ gŏ di lơh tìs tàm tiah dà lềng lơgar ndai dê, ờ sơrlèt gan nhàr tàm dà lềng Việt Nam, mìng kŭp di mờ adat boh lam tàm tiah dà lềng geh ai gơnoar”.

Càr Dăk Lăk sền gĭt broă dong kờl làng bol lơh ka bơtàu tơnguh wơl lơh sa tơnơ̆ dơ̆ trồ tiah lơh aniai pal pơgồp bal uă ngan mờ jơnau kờñ bơtàu tơnguh broă tras kŭp ka kơnhăp kơ̆ mờ rcang lài kơryan tras kŭp phan tàm dà lềng tìs mờ jơnau sồr IUU dê. Ồng Nguyễn Thiên Văn, Phó Củ tịc Anih duh broă Làng bol càr Dăk Lăk pà gĭt, bal mờ jơnau dan mờ Dà lơgar geh broă lơh dong kờl ai càn priă mờ broă lơh gàr tơl niam rài kis mpồl bơtiàn di pal nàng làng bol lơh ka in sơrlèt gan tŭ tơngai kal ke, càr neh sồr ală sờh, gah broă, ală tiah jat kềng gah dà lềng sơlơ tơnguh tai atbồ ơhò lơh ka, sŏk sền kràñ broă lơh lik mut tàm anih ơhò dà lềng, jòi gĭt tiah tờm tras kŭp phan tàm dà, mơkung lơh glài kràñ ală broă lơh lơh tìs:“Anih duh broă Làng bol càr đơs nền rơ̆p lơh glài kràñ gơwèt mờ kơnòl bơh cau atbồ dê tàm broă lơh jat tơngume geh gơrềng tus bal mờ gùt lơgar nàng tă bơsong sră rơmĭt. Dilah lời ơhò tras kŭp ka pơn jat tai lơh tìs geh gơrềng tus broă tă bơsong sră rơmĭt kung bè là lơh jat ală jơnau hơ lơgar Việt Nam dê mờ ală lơgar, gơ jat ală bơta nàng sền sơwì kơnòl bơh mpồl cau kung bè cau dồ nă să cau lam bồ dê”.

Mìu càl rơbŭt dờng neh jơh, dà tih dà lìu neh hoài soăt jơh. Đah đap kung gam uă bơta lòng, mơya mờ bơta lòt bal bơh gơnoar atbồ, gah lơh broă geh gơnoar mờ jơh nùs lơh ngan bơh làng bol lơh ka càr Dăk Lăk dê, ală ơhò pơn jat tai lòt tàm dà lềng tras kŭp ka. Hơ̆ ờ mìng là gùng lòt drơng rài kis lơm mờ gam đơs nền kơnòl tàm broă tras kŭp phan tàm dà lềng di mờ adat boh lam, pơgồp bơnah bal mờ gùt lơgar tă bơsong “sră rơmĭt” IUU, wèt tus dùl broă lơh ka kơnhăp kơ̆ mờ geh cồng nha rlau.