Jat Ci kụk Phan tàm dà mờ Dà lềng bồt bơlào càr Dăk Lăk, tàm ngai 5 sa tềp, neh geh 10 dơ̆ ơhò kŭp ka ngừ dà lềng tras kŭp ka tàm tơngai sa tềp rê tus tàm anih ơhò ơm, mờ kờp jơh khà lơh geh rlau 50 tấn. Kờp dŭ tàm ală ngai tus, pơgăp 70 nơm ơhò ka pơn jat tai rê, uă bơta digơlan lơh geh uă ngan dơ̆ tras kŭp ka bồ sơnam. Bơh bơta jat sền pà gŏ, ală cau tờm ơhò mờ cau lơh broă tàm ơhò lơh jat niam ală jơnau sồr tàm tŭ tras kŭp ka tàm dà lềng.

Bơh ngai 5 sa tềp, tàm anih ơhò lơh ka ơm Đông Tác, uă ơhò tras kŭp ka dơ̆ dùl dơ̆ tus tàm anih ơhò kŭp ka ơm tàm nùs nhơm gơ jal, brơn brài ngan. Ală cau kă bro, mpồl lơh sa kă bro blơi ka geh mat bơh gờñ nàng blơi phan bơna tơnơ̆ tŭ ơhò tus tàm anih ơhò ơm. Mpồl lơh sa kă bro blơi ka pà gĭt, ka ngừ tras kŭp tàm tiah kŭp ka ngừ Trường Sa dơ̆ do dờng kơn jơ̆, niam bơkah, geh ală drà kă bro kal ke bè câu Âu, Mỹ mờ Nhờk kờñ.

 Tơnơ̆ sa tềp bơhiàn dà lơgar, tàm ală anih ơhò lơh ka ơm tàm càr Khánh Hòa, git nđờ rhiang nơm ơhò lơh ka jal mhar rơcang ai dơ̆ lòt tras, kup phan tàm dà lềng bồ nam pa. Bơdìh mờ bơta kơp kơnờm tras, kup geh uă phan tàm dà lềng, cau lơh ka ngai sơlơ tơnguh jơnau git wă lơh jat ală jơnau sồr ờ ai kup, tras phan tàm dà lềng jat jơnau sồr IUU, wèt tus broă lơh ka bơtàu tơnguh kơnhăp kơ̆. Tàm anih ơhò lơh ka ơm Hòn Rớ, bơh àng drim gờñ, ală ơhò lơh ka geh tuh sang zờu, bơ tơl piar, jàl tras ka mờ sền sơ wì măi mok lài mờ tŭ lik lòt lơh broă tàm dà lềng.

Tơnơ̆ tŭ tơrgùm dùl mờ lơh gơlik bơta ndrờm bal jơnau tơnggit broă lơh ka, gùt càr Khánh Hòa tŭ do geh mờr 5 rbô 200 nơm ơhò lơh ka geh lơh sră, top ƀang kì mờ lơh sră ai gơnoar lòt tras, kup phan tàm dà lềng, geh 100%. Broă lơh atbồ nền nòn mpồl ơhò lơh ka dong gròi sền broă lơh kup, tras phan tàm dà lềng bơh chờm tơm, drơng broă jòi git anih lơh gơlik mờ rơcang lài kơryan broă lơh tìs. Nam 2025, khà kup, tras phan tàm dà bơh càr Khánh Hòa dê geh rlau 238 rbô tấn, priă lơh geh bơh tac hờ lơgar ndai mờr 870 tơlak dolar Mỹ.