Tàm ƀòn Alê A, sơnah ƀòn Ea Kao, càr Dăk Lăk, gal làng bol tơrgùm pơrjum tàm Hìu niam chài mpồl bơtiàn, iăt sền Pơrjum dờng pờ bơh tàm ti vi. Ồng Y Kanin, pà git: “Ală cau tàm do tam klăc bal, geh uă oh mi gơwèt làng bol jơi bơtiàn krơi is, bol añ chờ hờp mờ kơ̆p gơn rơ̆p geh uă tam gơl pa tàm tơngai mờr tus.

Kwang đơng lam bồ là ală cau git wă jrô ơnàng, geh bồ tơngoh kơlôi sơnơng añ pin là Pơrjum rơ̆p geh cồng nha niam bơnĕ. Kơ̆p gơn Pơrjum dờng rơ̆p geh uă broă lơh nàng lam sồr broă lơh sa suơn sre, priă bơcri, bơta niam chài nàng bơtàu tơnguh lơh sa”.

Tàm ƀòn Stơr, sàh Tơ Tung, càr Gia Lai, bi Đinh Bơn tơlik nùs nhơm: “Ƀòn bol añ là ƀòn tiah ngài. Kơ̆p gơn ngan bơh Pơrjum dờng Đảng do, Dà lơgar, gơnoar atbồ ală kấp sền gròi uă rơlao tai tus mờ ƀòn lơgar. Làng bol bol añ kơ̆p gơn Pơrjum dờng Đảng geh cồng nha niam bơnĕ, geh ală broă lơh di pal nàng bơtàu tơnguh dà lơgar”.

Mờ nùs nhơm pin dờn uă mờ Đảng, ồng Lâm Tấn Bình, dùl nă cau bơsram dờng kòn cau Prum tàm sàh Bắc Bình, càr Lâm Đồng kơ̆p gơn Pơrjum dờng dơ̆ XIV Đảng dê rơ̆p ai geh ală kơrnoăt bal mờ gùng dà broă lơh di pal, ndrờm bal mờ bơta kwơ màng, di pal mờ jơnau kờñ bơtàu tơnguh dà lơgar dê tàm bơta pa. "Làng bol jơi bơtiàn ờ gal cau đơs is mờ tàm hơ̆ geh làng bol kòn cau Prum kơ̆p gơn ngan tàm ală kơrnoăt broă lơh di pal bơh Đảng dê nàng dong kờl dà lơgar Việt Nam kung bè ală làng bol jơi bơtiàn ờ gal cau pơn jăt tai lơh sa bơtàu tơnguh, gàr niam bơta niam chài jơi bơtiàn. Kờñ geh bè hơ̆, jơh ală jơi bơtiàn pơn jăt tai tơnguh nùs nhơm tam klăc bal nàng pơgồp bal mờ dà lơgar brồ guh tàm rài pa”.