Tàm Dăk Lăk, pơn rơ ngan là mang đơs crih kờp sơ lơŭ wơl tàm Ƀlàng dờng ngai 10 nhai 3, sơnah ƀòn Buôn Ma Thuột tàm mang ngai 31/12 mờ broă lơh đơs crih tamya geh tơngume “Gơ klŏ gơ crà Dăk Lăk – Wă rò nam pa 2026”. Broă lơh geh rơcang nền nòn, jơh nùs ngan, pơgồp bal gùng đơs crih, bơta àng mờ măi mok pa ngan, mờ bơta tus bal bơh uă cau đơs crih, mpồl nhơl gùng đơs crih, mpồl tamya, DJ mờ ală mpồl bơyai lơh mờng chài.

Bal mờ hơ̆, àng drim ngai 01/01/2026, tàm Mũi Đại Lãnh (Mũi Điện) sàh Hòa Xuân rơp bơyai lơh dơ̆ cào kơ bồ nam pa, pơgồp bal mờ broă lơh wă rò ală nac lòt nhơl sơn rờp tus sền ù tiah geh sền là tiah sền gŏ àng măt  tơngai sòl àng drim gờñ ngan rlau jơh hơđang ù gờl Việt Nam. Tàm do, geh lơh broă lơh đơs crih tamya wă rò nam pa mờ ală jơnau bơyai lơh nhơl đờng goòng kòn cau, đờng lŭ mờ ală broă lơh pà phan nac lòt nhơl in.

Mang ngai 31/12, càr Gia Lai bơyai lơh dơ̆ pờ tơlik tơn tàm  gah sơñio rùp broă lơh Countdown Sa tềp Tây nam 2026, lơh geh nùs nhơm dơ̆ lơh chờ duh hồl, lơh gơrề uă nùs nhơm tam klăc bal, pin dờn mờ kơ̆p kờñ bơtàu tơnguh. Broă lơh geh tơngume “Sòl sơm pòl ồs plai nùs- Tàm tơrbŏ bal kờñ gơboh” pờ tơlik tơn tàm gah sơñio rùp tàm 2 tiah: Ƀlàng dờng Nguyễn Tất Thành (sơnah ƀòn Quy Nhơn) mờ Ƀlàng dờng Đại Đoàn Kết (sơnah ƀòn Pleiku), mờ ù tiah đơs crih tam ya geh mòn lơh niam ngan, pơgồp bal mờ gùng đơs crih tam ya pa tŭ do, ală bơta àng mờ màn hình LED dờng.

Is ồn, tàm tiah tàm tơrbŏ bal Pleiku, bơhiàn niam chài Tây Nguyên geh jờng rơ mờ ù tiah cing mồng, tam ya xoang mờ ală dơ̆ ràng tơlik đơs crih tam ya cèng jơnau đơs brê bơnơm dờng ơning ơnàng, tơngŏ bơta tàm bơrlŭ bal bơnĕ bơnài đah ờs mờng bơh yau mờ nhơm tă tơngai pa dê. Bơh ală broă lơh niam chài, càr Gia Lai kơ̆p kờñ lơh geh bơta tờm yal tơngĭt uă rùp hin, bơta gơn kơnờm niam ngan ai nam 2026 in, Gia Lai drơng lơh Nam lòt nhơl Dà lơgar.

Càr Quảng Ngãi bơyai lơh ală broă lơh niam chài, lòt nhơl, geh lơh dơ̆ lĕ bal tàm tiah kềng gah dà lềng mờ tiah kơh bơnơm jơnhua. Broă lơh đơs crih tamya “ Quảng Ngãi – Wă rò nam pa 2026” geh bơyai lơh mang ngai 31/12 tàm 2 anih là Ƀlàng dờng gùng Phạm Văn Đồng, sơnah ƀòn Cẩm Thành mờ tơngume “Bơta kơp kờñ dà lềng dờng” mờ Ƀlàng dờng ngai 16/3, sơnah ƀòn Kon Tum mờ tơngume “Nhơm tă ù tiah kơh bơnơm dờng ơning ơnàng” geh lơh bơh ngai 01 tus ngai 04/01/2026 tàm sàh Măng Đen.

Tơng leh do gam geh dơ̆ lơh chờ Khiñ khí kầu, broă lơh đơs crih tamya “Măng Đen ngai pa”, drà phan lơh gơs bơh suơn sre – chi che lơh sơnơm Măng Đen 2026, sền klài mờ tê mờ hùc dà kơphe bơkah, bal mờ ală tour lòt nhơl ù tiah brê bơnơm.