Gam pic plai kơphe neh dum ơn tàm sơ̆, bi A Kham, kis tàm ƀòn Lê Toan, sàh Ngọk Linh, kơnhoàl Đăk Glei, càr Kon Tum chờ hờp ngan tài nam do kơphe tăc gơguh priă uă. Kàl lơh sa do, hìu bi kờp dŭ geh mờr 80 tơlăk đong geh bơh rơlao 4 rơbô tờm kơphe dê, hìu bi A Kham neh lik klàs rơƀah: “Añ bơsram mờ lơh jăt kwang bàng bơto sồr, kơphe bơtàu tơnguh niam. 2 kàl pơn jăt tơn priă tăc gơguh uă bloh, añ gam ai geh gùng dà broă lơh tàm nam tus pơn jăt tai càn priă bơh ngân hàng nàng rề ơnàng ù tiah tam kơphe. Lik klàs rơƀah bloh mơya añ kung gam pal lơh ngan lơh broă sa nàng oh kòn in geh lòt bơsram tus gùng tus dà”.

Ồng A Min, Ƀí thư Ci ƀộ ƀòn Lê Ngọk, sàh Ngọk Linh pà git, broă dong kờl bơh ală kấp ủy đảng, gơnoar atbồ tàm ală nam pa do neh lơh tam gơl rài kis mờ broă lơh sa làng bol dê. Mpồl lơh broă bơh càr, kơnhoàl mờ sàh geh tus bal mờ làng bol, lơh broă bal mờ làng bol, sơn-io sồr làng bol tàm broă lơh, bơto bơta chài tàm broă tam, dong kờl sơntìl phan tam, phan ròng. Bơh tŭ hơ̆, dong kờl làng bol tam gơl bồ tơngoh kơlôi sơnơng, broă lơh, lơh ngan rơlao tai tàm broă lơh sa. Bă ù tam kơphe, sâm dây, quế, đinh lăng, kơnuh sơnơm Ngọc Linh gơguh sùm, dong kờl geh uă broă ai làng bol in, khà hìu rơƀah gơmù mhar ngan. Mìng tàm 4 nam, khà hìu rơƀah tàm ƀòn gơmù mờr 60%, tŭ do mìng gam 20 hìu rơƀah. Ồng A Min đơs, làng bol gam rơhời geh tơl ngui tơl sa nàng rài kis lơh broă sa geh kơl jăp. “Lài do lơh sa kung kal ke mơya tŭ do neh ờ hoan kal ke tai, làng bol neh tam gơl rơhời bloh. Uă hìu geh Đảng, Dà lơgar sền gròi lơh geh hìu ơm bè do kơl jăp ngan. Làng bol kung sền kwơ tàm broă bơtàu tơnguh lơh sa, geh hìu den càn priă nàng tam kơnuh sơnơm, geh hìu den càn priă nàng lơh sa ndai mìng là tam kơphe, quế, ƀời lời, sâm dây. Mìng is kơnuh sơnơm Ngọk Linh den ală hìu tàm ƀòn lơi kung tam lơm. Hìu lơi geh tơl den tam uă, hìu lơi kal ke den tam ờ uă”.

Jăt ồng A Thảo, Ƀí thư Đảng ủy sàh Ngọk Linh yal, lài do làng bol rơƀah ngan tàm càr dê tài ờ git tàm broă lơh sa, ờ geh priă bơcri. Bơh nam 2020 rê hờ lài, làng bol ngòt càn priă tài ờ git càn nàng lơh broă lơi. Tam gơl mùl màl gơwèt mờ sàh dê tŭ Tỉñ ủy càr Kon Tum, Huyện ủy kơnhoàl Đăk Glei tus bal, lơh gùng dà broă lơh nàng dong kờl sàh bơtàu tơnguh lơh sa, mpồl bơtiàn. Làng bol geh bơto sồr tàm broă tam phan gơdờp bal mờ bơta geh bơh ù tiah, trồ tiah, lơh geh ală bơta phan di pal mờ jơnau kờñ tàm drà kă bro. Ală broă pơgồp bal lơh sa jăt mpồl lơh broă, lơh broă bal mờ ală hìu tăc, mpồl lơh sa kă bro blơi phan geh lơh. Kơnờm mờ hơ̆, khà hìu rơƀah gùt sàh gơmù mhar ngan, bơh rơlao 70% tŭ do mìng gam 21%. Ồng A Thảo pin dờn đơs: mìng 2, 3 nam tai sàh Ngọk Linh rơ̆p lik klàs rơƀah. “Sàh Ngọk Linh lài do là sàh rơƀah, rơƀah ngan càr ê, dà lơgar dê. Kơnờm mờ gùng dà broă lơh di là bơtàu tơnguh tờm chi lơh sơnơm, lơh di bơta pràn, làng bol kung geh broă pơgồp bal den tàng phan geh lơh tăc geh priă. Mờ bơtàu tơnguh kơnuh sơnơm Ngọc Linh là broă lơh pràn ngan nàng làng bol lik klàs rơƀah. Añ pin là tơnơ̆ do làng bol rơ̆p bơtàu tơnguh”.

Tỉñ ủy càr Kon Tum jào kơnòl ai kơnhoàl Đăk Glei in pah nam gơmù 10% hìu rơƀah. Ƀí thư Huyện ủy kơnhoàl Đăk Glei, ồng Thái Văn Tưởng đơs là, do là khà broă ờ tŭ lơi ƀuơn, tàm hơ̆ uă ngan là gơwèt mờ bàr sàh Mường Hoong mờ Ngọk Linh ngài mờ tiah tàm gùl kơnhoàl tus 70 kơi sồ, gùng lòt gơtìp kal ke, 99% khà kờp làng bol jơi bơtiàn ờ gal cau. Mơya mờ broă lơh ngan, lơh ngan bơh jơh mpồl lơh broă cíñ trị bal mờ gùng dà broă lơh di pal, broă tơrmù rơƀah tàm 2 sàh neh geh di jăt mờ jơnau càr jào: “Kơnờm mờ broă đơng lam bồ, sồr lơh bơh Mpồl lơh kơnòl broă sùm Tỉñ ủy, Mpồl Lơh kơnòl broă sùm Huyện ủy mờ broă tus bal bơh kấp ủy kơnhoàl dê, tus tŭ do bồ tơngoh kơlôi sơnơng, broă lơh bơh làng bol dê, rài kis lơh broă sa mpồl bơtiàn làng bol kis tàm 2 sàh Mường Moong, Ngọk Linh neh tam gơl loh làng. Tàm tơngai lồi nam 2020, khà hìu rơƀah 2 sàh do là rơlao 70% den tus tŭ do khà hìu rơƀah gam rơlao 21% mơ”.

Ồng Thái Văn Tưởng kung đơs tai, tơn jơh rơƀah mìng rơ̆p là broă lơh lài ngan, kơnhoàl Đăk Glei neh geh gùng dà broă lơh nàng 2 sàh Mường Hoong mờ Ngọk Linh gơs dùl tiah ƀòn lơgar pas sơm. Kơnhoàl gam lơh pràn broă tơrbŏ bal mờ ală ƀòn dờng dờng bè ƀòn dờng Hồ Chí Minh, Hà Nội, Đà Nẵng… mờ ală mpồl lơh sa kă bro geh bơngă pin dờn tàm lơgar nàng bơ̆t bơtàu tiah do gơs dùl tiah lòt nhơl sền ƀòn lơgar, lơh broă niam.