Tàm mang lồi nam mrềt, tàm hìu ơm neh geh cau ling dong kờl lơh niam wơl, rơndăp niam ngan, ram mhŭ, mò Trần Thị Ba, ơm tàm thôn Phú Hậu, sàh Suối Hiệp, càr Khánh Hoà ngoh rơngăc kah wơl kung tàm trồ mang bè do sơl, bơh rlau 1 nhai lài, dà tih dà lìu gơguh tih mhar ngan, mò bal mờ jơh làng bol tàm ƀòn gơ ơm tàm bơta “sơbơng roh ngan”. Tàm tŭ ờ gĭt lơh bè lơi tai, ală cau ling neh di tŭ geh mat, dong kờl làng bol tàm nhàr bơta kis mờ bơta chơ̆t:“Añ tồn là jơh hìu bơnhă añ chơ̆t jơh rao. Dà tih gơguh mhar ngan ờ hềt tŭ lơi gŏ. Añ hòi uă ngan, ală wa cau ling tus añ chờ hờp ngan. Añ ờ gơ tùi lòt, kơnờm ală wa mă añ lơm”.

Tàm tiah lơh broă bơh “Broă lơh Quang Trung” bơt bơtàu wơl tiah dà tih dà lìu Khánh Hoà tŭ do, geh bơta tơryồng bơh ală mpàng tê bơh cau Ling dà lềng Tiah 4 dê. Cau ling tui àñ, yờ sơmang lơh hìu dong làng bol tàm ală ngai mờr lồi sơnam sa tềp bơhiàn Dà lơgar mờr tus, kung ngan là cau ling nhăp nhar ngan rlau jơh, neh lơh lòt uă ngan tàm ală rơkì măi sơr lèt gan dà tih pơgăp mờ do 3 poh, ai geh bơta kis ai làng bol bol in. Chuẩn Đô đốc Nguyễn Anh Tuấn, Tư lệñ Tiah 4 Ling dà lềng, pà gĭt: mang ngai 19/11, tơnơ̆ tŭ dờp geh kơnòl broă, Ƀộ Tư lệñ Tiah do neh  lam lơh jơnau sồr ai ling lòt gùng tàm bơta mìu dờng, dà tih tam cah is, mpồl ling neh geh mat tàm ală tiah ngơr jrô ngan rlau jơh. Tàm tơngai lơyah, rlau 5 rơbô dơ̆ kwang bàng, cau ling bal mờ 100 nơm rơndeh rơndồ geh hòi jà tơrgùm bal, lam lơh broă lơh dong kờl, ntrờn 5 rơbô 400 nă làng bol tus tiah ơm lơngăp lơngai, tàm hơ̆ geh 6 nă kơnòm dềt mờ 1 nă cau ùr mờr deh. Chuẩn Đô đốc Nguyễn Anh Tuấn pà gĭt: “Tŭ Ƀí thư sồr là 8 jiơ mang bol añ pal lòt mơ, 9 jiơ neh geh mat tàm tiah Diên Khánh. Bol añ mut tàm ală tiah jrô ngan rlau jơh bơh ƀòn, sàh, ală tiah tàm tŭ hơ̆ ờ gơtùi mut. Jơnau sồr đơng lam uă ngan rlau jơh pal lòt bal mờ mpồl ling tơn. Tàm mpồl ling geh bơta lơi, ai jơh tơn nàng dong làng bol”.

Broă đơng lam jat nền ù tiah tơn, lòt bal mờ mpồl ling dong ală broă lơh dong kờl geh uă tam gơl niam ngăc ngar, di tŭ, tơrmù lơyah ngan rlau jơh bơta hoàc huơr bè cau tàm tơngai mìu dờng dà tih dà lìu sơr lèt ngài mờ jơnau digơlan gơlik geh mờ jơnau kờp dŭ lài dê. Nùs nhơm lơh jat sùm là “dong kờl làng bol lài, yal jơnau tơnơ̆”. Tàm 2 ngai, ngai 20 mờ 21 nhai 11, cau ling tă bơh anih ơn prap phan 30 tấn phan sa ro, hòi jà tơrgùm ală măi jồr dà nàng pà dà sàng goh ai làng bol tiah ngơr jrô in ngui. Tŭ dà hoài soăt, cau ling pơn jat tai pơs wàs sàng goh tiah ơm kis, gùng lòt geh ai lòt rê, dong kờl lơh wơl hìu đam, hìu bơsram. Thiếu tá ồng Nguyễn Công Trứ, Mpồl ling lơh gùng, Hìu bơsram ling geh griăt Ling rơndeh par pà gĭt:“Mpồl ling pơs wàs mờ tê hìu làng bol, hìu bơsram, ơdŭ bơsram nàng ală sau in tus hìu bơsram wơl. Tus tŭ do, mpồl broă tàm gùng uă ir den tàng pal ngui rơndeh rơndồ măi mŏk, ngui bơta pràn cau dê ờ gơtùi lơh jai ờ. Hơ̆ là rơndeh chŏ, rơndeh pơndiang dờng... pơs wàs tiah ơm kis jài mơkung ai gùng lòt rê ai làng bol in lòt rê ƀuơn ngan”.

Ờ mìng dong kờl tềng đăp mat lơm,  mpồl ling klàng càr Khánh Hoà gam rcang tă pơgồp jơnau đơs bơt bơtàu ală rơndăp broă lơh 2 kwơ drơng broă rcang lài pleh trồ tiah lơh aniai; pơgồp bal pơlam tàp, bơto pơlam broă lơh dong kờl, jòi dong kờl rềs àr; kờp sền mpồl cau, rơndeh rơndồ măi mok, dong kờl jat tơl ală bơta aniai, pơgồp bal mờ jơnau kờñ bơt bơtàu wơl kơnhăp kơ̆ tơnơ̆ dơ̆ trồ tiah lơh aniai. Gah đơng lam mpồl ling klàng càr neh cribơyai bal mờ ală mpồl ling bơh Ƀộ Ling klàng dê, jơh gùt càr neh hòi jà tơrgùm mờr 16 rơbô nă kwang bàng, cau ling mpồl ling phàu crong, 283 nơm rơndeh rơndồ măi mok, lam ntrờn 118 rơbô nă làng bol tus tiah ơm lơngăp lơngai. Đại tá ồng Nguyễn Túy, Đơng lam Gah đơng lam Mpồl ling klàng càr Khánh Hoà đơs sùm: “Pal mut ngan ngồn tàm ală tiah, tam pà mpồl ling, rơndeh rơndồ măi mok di pal tơl tiah in. Plung, ka nô bơta lơi mut tàm tiah lơi ai gơ in ƀuơn ngan. Tơrgùm dong kờl cau lài, tơnơ̆ hơ̆ bơyai lơh dong kờl phan sa, dà sàng goh ai làng bol in tŭ dà neh ngơr jrô jơh lơm”.

Dơ̆ trồ tiah lơh aniai pa do lơh jơnau gơ lời wơl kơn jơ̆ kơn jŭt ngan tàm càr Khánh Hoà, mờ 22 nă cau chơ̆t, 20 nă cau sồt să; 89 nơm hìu gơtìp tơrlah jơh, 290 nơm hìu ờ diơng. Tềng đăp bơta geh ngan hơ̆, Ƀí thư Tỉñ ủy càr Khánh Hoà sồr ală kấp, ală gah broă lơh jat niam “5 pal lơh” mờ gùng dà broă lơh “4 dùl nă tiah”, mơkung gàr tơl niam rài kis mpồl bơtiàn, bơtàu tơnguh wơl lơh sa, ai lài bơta pràn ai broă rcang lài kơryan pleh mờ trồ tiah lơh aniai. Sền sơ wì gơnoar bơh mpồl ling phàu crong dê, Ƀí thư Tỉñ ủy càr Khánh Hoà ồng Nghiêm Xuân Thành đơs nền:“Mpồl ling klàng, mpồl kwang àng neh dong kờl, ai uă kwang bàng, cau ling, uă rơndeh rơndồ măi mok dơ̆ lĕ bal ngan; ngan ngồn mpồl cau tờm tàm drơng dong kờl làng bol kung bè là mpồl cau tờm tàm bơsong jơnau gơ lời wơl tài bơh mìu dờng dà tih dà lìu tàm tơngai pa do”.

Ngan ngồn tàm càr Khánh Hoà pà gŏ, tàm khat dùl rài kis kal ke lơi, cau ling sùm là anih kơldìng kơnhăp kơ̆ bơh Làng bol dê, là mpồl lam lài, tờm ngan tàm sền gàr màng kis, phan bơna mờ bơt bơtàu wơl rài kis tơnơ̆ dơ̆ trồ tiah lơh aniai.