Tơnơ̆ dùl nam lơh jăt Jơnau lơh nền tàm pơrjum sồ 57 bơh Ƀộ Cíñ trị dê, gah broă jak chài, măi mok, tam gơl pa bơceh lơh mờ tam gơl sồ neh lơh geh uă cồng nha lài ngan kwơ màng, bal mờ broă lơh gơs gùng dà broă lơh, mpồl đơng lam bồ, đơng lam bơh Dà lơgar tus càr.

Tam gơl sồ tàm lơgar he neh mùl màl gơguh pràn mờ uă cồng nha loh làng tàm dunia dê bè: khà phan bơna viễn thông ơm khà 67, khà pràn internet ơm dơ̆ 18, Cíñ phủ điện tử ơm dơ̆ 71… Is ồn ngan bơngă tam gơl pa bơceh lơh lơgar Việt Nam ơm dơ̆ 44 tàm dunia. Gùt lơgar geh di pơgăp 4 rơbô mpồl lơh sa kă bro mŭt lơh broă bơceh lơh. Tàm pơrjum, Tổng Ƀí thư ồng Tô Lâm đơs nền gơnoar broă kwơ màng, geh nùs nhơm lơh bơnàng jă mờ lơh tờm bơh bơta chài, măi mok, tam gơl pa bơceh lơh mờ tam gơl sồ. Do là jơnau kờñ pal geh lơh nàng bơtàu tơnguh mhar mờ kơl jăp dà lơgar in tàm tơngai tus. Tổng Ƀí thư đơs tus 7 gùng dà broă lơh mờ kung là ală tơngu me tờm tàm jơnau sồr lơh nàng sồr ală Ƀộ, gah lơh broă dà lơgar, ală càr ƀòn dờng tơrgùm lơh jăt; tàm hơ̆ ring bal ai gùng dà broă lơh tàm nam 2026 là “Lơh broă pràn, lơh geh uă cồng nha”.