Jat jơnau yal, tàm 8 nhai bồ nam 2026, kờp jơh priă rề dia dà lơgar tàm  càr Quảng Ngãi lơh geh mờr 24 rơbô tơmàn đong, gơguh rlau 10% pơn drờm dùl tŭ bal mờ nam lài. Gùt càr neh ai priă bơcri dà lơgar lơh geh 2 rơbô 800 tơmàn đong, mờ 35% broă rơndăp lơh nam dê.

Nàng bơsong ală kal ke, kòl yan tàm tŭ lam lơh jat broă rơndăp lơh bơtàu tơnguh lơh sa- mpồl bơtiàn tơngai bơh nam 2026 - 2030, càr Quảng Ngãi dan mờ Bộ Priă jền pơn jat tai sền gròi, lơh geh ală bơta bè bàr pe tơngume geh gơrềng tus Ală jơnau lơh nền crơng gơs Anih tờm jồr, lơh zờu mờ năng lượng dà lơgar tàm Tiah lơh sa Dung Quất; bơtàu tơnguh tiah is ồn Lý Sơn gơ gơs Anih tờm lòt nhơl dà lềng - bồt dà lơgar; lam lơh sră pơ àr lơh rơndap broă lơh gùng ù gờl rơndeh lòt mhar Quảng Ngãi - Kon Tum; lơh niam, pờ ơnàng gơl gùng dà lơgar 24 tơrbŏ đah càr Quảng Ngãi (yau) mờ càr Kon Tum (yau). Mờ kung bơ tơl priă jền lam lơh ală jơnau kờñ bè jak chài, măi mok, tam gơl pa bơceh lơh mờ tam gơl sồ, lơh geh bơta gơn kơnờm chồl tơnguh bơta bơtàu tơnguh lơh sa- mpồl bơtiàn, lam Quảng Ngãi gơ gơs là tiah tờm lơh sa dà lềng ngac ngar bơh dà lơgar dê.