Bal mờ mpồl bơyô kŭp rùp lời kir mờ tus sền bơta niam ù tiah tềng Tiah Lŭ Preng, sàh Tuy An, càr Dăk Lăk, lŏ Đào Thị Hiền, cau năc lòt nhơl tus bơh ƀòn dờng Hà Nội sùm jờng rơ tềng đăp mờ bơta niam, krơi is bơh broă lơh mờ ù tiah lơh geh is dê. Lŏ Hiền pà git, ală lŏ neh rơwah càr Dăk Lăk là anih tus tàm dơ̆ lòt nhơl kàl rơlô bơkang do nàng sền ù tiah geh is niam bơnĕ mờ sền bơta pa tàm dùl càr pa tơrmŭt bal tŭ geh bal dà lềng mờ brê bơnơm. “Dơ̆ sơnrờp bol añ tus mờ càr Dăk Lăk pa, geh sền dà lềng càr Dăk Lăk, sền Tiah Lŭ Preng, kŭp rùp tàm do niam ngan. Bol añ kung rơcang là tus sền Phú Yên jơh hơ̆ sồng rơ̆p pơn jăt tai gut tus sền Buôn Ma Thuột nàng gŏ jơh bơta geh dà lềng mờ brê bơnơm. Pal đơs là tŭ do lòt tus càr Dăk Lăk den gơtùi lòt nhơl brê bơnơm mờ gơtùi sền dà lềng tai. Dùl bơta krơi is ngan là phan tàm dà tàm do bơkah ngan mờ priă tăc kung di pal”.

Bơh tŭ Dà lơgar geh gùng dà broă tơrmŭt bal, tơrgùm 2 càr, lòt nhơl càr Dăk Lăk – Phú Yên neh geh uă bơta chờ hờp. Khà năc lòt nhơl gơguh uă rơlao dơ̆ pơn drờm mờ lài do. Tàm hơ̆, ờ mìng cau năc lòt nhơl tus bơh ală càr, ƀòn dờng ndai mờ khà năc tàm dơlam càr lòt rê đah bàr tiah đah măt tơngai lik mờ đah măt tơngai mŭt càr Dăk Lăk kung gơguh uă mờ ală dơ̆ cau năc lòt nhơl ha là mpồl hìu nhă dê. Lŏ Nguyễn Thị Điểm, lơh broă wă năc tàm Rosa Alba Resort Tuy Hoà, càr Dăk Lăk pà git: “Añ gŏ pa do tŭ mờ tơmŭt bal ală càr bal den cau năc lòt nhơl kung uă, cau năc lòt nhơl gal ngan. Tàm Rosa bol añ den ală tiah ndrờm geh, mơya ală nhai pa do den gŏ Đah măt tơngai mŭt càr Dăk Lăk mù tus tàm do gal ngan. Añ kơ̆p kờñ gah lòt nhơl gam uă bè do den kung gam kơ̆p kờñ là cau năc tus tàm do gal rơlao, uă rơlao”.

Đơs tus mờ jơnau tơrmŭt bal, ală mpồl lơh broă lòt nhơl kung neh wă lài nàng lơh ală bơta lòt nhơl dà lềng mờ brê bơnơm. Bè tàm hìu sa Đăk Phú, sơnah ƀòn Tuy Hoà, măt sơnđan geh pơgồp bal bơh măt bàr càr Dăk Lăk mờ Phú Yên dê, bi Trương Tấn Tài, Atbồ hìu sa pà git, mpồl lơh broă do ờ mìng tam gơl dùl măt sơnđan tơrbŏ bal dà lềng mờ brê bơnơm, mờ phan sa kung geh broă pơgồp bal sơl. “Bol añ mŭt lơh broă bơh ngai 01 nhai 6 den bơh nhai 5 bơnah trŭ sa neh guh tus càr Dăk Lăk nàng lòt sền tơl hìu sa, phan sa, bơta niam chài tàm Dăk Lăk nàng cèng tus tàm do ală phan sa geh bơta krơi is bơh tàm tiah hơ̆ bè poăc iar buh, piang ding, gỏi plai blơn bơtăng, … Bơta pràn cau sa niam, cau năc kờñ ngan tŭ tus tàm do geh sa phan sa bơh tiah kơh bơnơm càr Dăk Lăk dê bal mờ ală phan tàm dà tiah dà lềng dê”.

Tơnơ̆ mờ tŭ tơrgùm dùl, tiah Đah măt tơngai mŭt càr Dăk Lăk pơnrơ ngan mờ broă lòt nhơl tàm brê bơnơm niam, ñrùh dà, brê, lòt nhơl mpồl bơtiàn, niam chài cing mồng, phan sa krơi is Tây Nguyên dê. Gam tàm tiah đah măt tơngai lik geh bơta pràn lòt nhơl dà lềng, ƀòn lơh ka, ală bơta phan tàm dà. Ală jơnau bè Cau chơ̆t màng Nam tiến tàm Buôn Ma Thuột geh yal pơn jăt tai mờ jơnau bè tiah Vũng Rô bal mờ ală ơhò “ờ geh sồ”, ală anih tiă gan dà dờng Srepok mờ Tam lơh pha lin Buôn Ma Thuột. Ồng Ngô Văn Định, Phó Củ tịc Mpồl lòt nhơl càr Dăk Lăk đơs là, ală tiah pơnrơ niam bơh 2 càr lài do dê tŭ tơrgùm wơl bal rơ̆p tus bơta pràn dong kờl bal 2 tiah Đah măt tơngai lik mờ Đah măt tơngai mŭt bơtàu tơnguh rơlao: “Bol añ rơ̆p bơtơl bal ală bơta mờ lài do là ờ pràn bơh bàr càr dê nàng lơh gơs phan nàng ai jơh bàr tiah ndrờm bal mờ sùm gơtùi drơng cau năc in. Dơ̆ bàr là rề ơnàng, lơh niam wơl ƀlàng rơndeh par Tuy Hoà gơs ƀlàng rơndeh par ală lơgar dê nàng wă cau năc tus mờ Tuy Hoà hơ̆ sồng lòt tus Dăk Lăk. Dơ̆ pe tai là bơto mpồl cau lơh broă nàng drơng cau năc lòt nhơl tus càr Dăk Lăk pa, bơta niam chài pal geh tơrgùm bal, broă lơh pal geh tơnguh uă”.

Broă tơrgùm dùl, tơmŭt bal càr neh lơh geh broă lòt nhơl càr Dăk Lăk geh dơ̆ niam nàng lơh broă mờ wèt tus bơtàu tơnguh pa. Broă pơgồp bal ală phan lòt nhơl krơi is, bal mờ broă tơnguh niam wơl phan bơna mờ bơto cau lơh broă jăk chài, geh kơ̆p kờñ rơ̆p pơgồp bal lơh pràn gah lòt nhơl càr dê bơtàu tơnguh pràn tàm tơngai tus.