Tổng Ƀí thư ồng Tô Lâm mờ Thủ tướng Cíñ phủ ồng Phạm Minh Chính tus bal tàm Hìu bơsram ơm sa bic tơn bàr Kấp, kấp dùl mờ Kấp Bàr Đồng Đăng, sàh Đồng Đăng, càr Lạng Sơn. Dơ̆ sơn đờm mŭt lơh geh bơyai lơh tàm 17 anih pờ tơlik tờm mờ 104 anih pờ tơlik tàm internet tàm gùt lơgar.

Đơs tàm dơ̆ pơrjum, Tổng Ƀí thư ồng Tô Lâm đơs nền, tàm ală tơngai bơh kăc màng, Đảng, Dà lơgar sùm ai broă sền gròi, bơcri priă ai broă bơtàu tơnguh bơto bơtê mờ bơsram tàm tiah nhàr lơgar in. Ƀộ Cíñ trị neh tơlik kơrnoăt bơcri priă lơh 248 nơm hìu bơsram ơm sa bic tơn bàr kấp 248 sàh tiah nhàr lơgar tàm ù gờl. Do là dùl gùng dà broă lơh di pal, geh kwơ màng uă ngan, ai tơlik broă sền gròi dờng màng ngan bơh Đảng, Dà lơgar dê gơwèt mờ làng bol kis tàm tiah nhàr lơgar, tiah ngài, tiah gam uă kal ke in.

Tổng Ƀí thư ồng Tô Lâm sồr kấp ủy đảng, gơnoar atbồ ală sàh lơh ngan tus bal, sùm sền, jăt sền mờ pơlam broă lơh nàng broă lơh geh lơh mhar ngan, niam ngan, geh cồng nha ngan, di tŭ drơng nam bơsram pa 2027-2028 in. Bal mờ hơ̆, gah bơto bơtê pal lơh hìu bơsram pơgồp bal mờ bơ̆t bơtàu tiah bơto bơtê pa, tơl ală bơta. Bơdìh hơ̆ tai, broă bơto sră, pal geh sền gròi tus mờ bơto kòn bơnus, bơto bơtơl nùs nhơm niam bal mờ jơnau git wă kis niam ai kơnòm bơsram in, kơ̆p kờñ brồ să mờ pơnyờ să bè bơhiàn ƀòn lơgar dê.