Nàng kờñ sền sơ wì ngan ngồn cồng nha lam lơh mờ lơh jat ngan ngồn ală lơh nền gùng dà broă lơh dờng bơh Dà lơgar dê gơ lòt mut tàm rài kis ƀòn lơgar, pa do, Mpồl Jơi bơtiàn Mpồl duh broă Làng bol càr Dăk Lăk neh bơyai lơh dơ̆ lòt sền bơta geh ngan tàm ală broă lơh lòt nhơl mpồl bơtiàn tàm ù tiah do dê. Mpồl lòt sền neh tus tơn lơh broă tàm ƀòn Kli A (sơnah ƀòn Buôn Hồ), ƀòn Tuôr (sàh Hòa Phú), ƀòn Tơng Jú (sàh Ea Kao) mờ ƀòn Akŏ Dhông (sơnah ƀòn Buôn Ma Thuột). Bơh lòt sền pà gŏ, broă lơh dong kờl bơh càr dê neh lơh geh bơta dong kờl kwơ màng dong làng bol rcang lài tă pơgồp bal bơta pràn, pờ ơnàng bơcri priă mờ lơh geh uă phan bơna sền gĭt pơgồp bal mờ niam chài ờs mờng bơh yau, broă lơh mờ tê, lơh geh broă lơh sùm ai làng bol in. Do ngan là cơng tàng loh làng ngan ai broă lơh phan lời wơl niam chài gơ gơs bơta pràn bơtàu tơnguh jat di pơlam gùng dà tờm bơh Jơnau lơh nền tàm pơrjum sồ 80.

Mơya nàng pơn jat tai lơh jat ngan ngồn cồng nha bơh jơnau sồr lơh bơh Bộ Chính trị dê bè prap gàr niam chài tàm tơngai pa, mờ ală tiah geh jơnau dan mờ càr kờñ pơn jat tai tơnguh broă dong kờl. Tờm ngan là dong kờl prap gàr ù tiah niam chài, bơto bơtê bơta chài mờ lơh pràn lơh bal kơnhoàl ù tiah. Ồng Y Kle Knul, Phó Lam bồ Cơldŭ lơh broă Niam chài sàh Hoà Phú đơs jơnau đơs: “Pal pơn jat tai sền gròi dong kờl bơta pràn prap gàr hìu jòng ờs mờng, broă tàñ ồi kòn cau, ù tiah niam chài cing mồng, ală dơ̆ lơh chờ ờs mờng bơh yau mờ bơt bơtàu phan bơna lời kir sơnrai cèng bơhiàn niam chài is ƀòn lơgar dê. Sơlơ tơnguh tai broă lơh hòi jà, yal tơngĭt uă, bơt bơtàu dơ̆ lòt nhơl tàm tơrbŏ bal mờ ƀòn Tuôr mờ ală tiah lòt nhơl tàm ù tiah càr dê nàng kờñ pờ ơnàng drà năc lòt nhơl mờ tơnguh cồng nha ngui ală phan bơna lòt nhơl mpồl bơtiàn dê”.

Jat Mpồl Jơi bơtiàn Mpồl duh broă Làng bol càr Dăk Lăk, broă lam lơh Jơnau lơh nền tàm pơrjum sồ 80 sồr làng bol pal ngan ngồn là cau tờm tus bal mờ dờp lèng bơta kwơ bơh ală bơta kwơ niam chài bơh he dê. Ală cih dờp bơh bơta geh ngan rơ̆p là bơnàng jă kwơ màng nàng càr in lơh sir kơrnoat boh lam, tơnguh ală broă lơh dong kờl bơtàu tơnguh. Đơs sùm bè broă pơn jat tai nàng kờñ ai Jơnau lơh nền tàm pơrjum bơh Đảng dê mut tàm rài kis, mò Đỗ Thị Như Tình, Lam bồ Mpồl Jơi bơtiàn Mpồl duh broă Làng bol càr Dăk Lăk, pà gĭt: “Mpồl lòt sền kung cih dờp ală jơnau đơs ngan ngồn tàm broă lơh lam lơh jat jơnau lơh nền tàm pơrjum mờ ală broă lơh tàm ù tiah càr dê. Jat tàm ală bơta hơ̆ den kung rơ̆p kơlôi sơnơng sồr đơs lam lơh dùl Jơnau lơh nền tàm pơrjum pa bè bơtàu tơnguh lòt nhơl mpồl bơtiàn pơgồp bal mờ prap gàr mờ ngui niam bơhiàn niam chài tàm tơngai pa den rơ̆p cèng wơl cồng nha rlau tai”.

Broă mhar kơlôi sơnơng, lơh Jơnau lơh nền tàm pơrjum pa bơh Mpồl duh broă Làng bol càr dê rềp di pal mờ bơta geh ngan ngan là broă lơh ngan ngồn, kràñ cê jơh nùs nàng kờñ ai Jơnau lơh nền tàm pơrjum sồ 80 bơh Bộ Chính trị dê gơ lòt mut tàm rài kis; lơh ală niam chài Tây Nguyên gơ gơs bơta gơn kơnờm bơtàu tơnguh lơh sa- mpồl bơtiàn tam gơl pràn ai càr Dăk Lăk in tàm tơngai tus.