Jăt Ƀộ trưởng Ƀộ Priă jền ồng Nguyễn Văn Thắng đơs là, nàng lơh jăt mùl màl ală jơnau kờñ mờ Jơnau lơh nền tàm pơrjum neh geh ai tàm gùng dà broă bơtàu tơnguh dà lơgar tơngai bơh nam 2026 tus 2030, “tơrgùm lơh sir tơl làm, ndrờm bal kơrnoăt boh lam” geh gĭt nền là kơnòl broă tờm. Mờ gah priă jền, lơh sir kơrnoăt boh lam lơh sa là jơnau sồr nàng gah do pơn jăt tai tam gơl pa bồ tơngoh kơlôi sơnơng, lơh broă. Ồng Nguyễn Văn Thắng, đơs loh: “Lơh kơrnoăt boh lam wil tơl di tŭ mờ lam lơh geh cồng nha ală jơnau lơh nền tàm pơrjum bơh Đảng bè bơtàu tơnguh ală bơnah lơh sa, lơh geh ngan ngồn jơnau kơ̆p kờñ ngan bơtàu tơnguh gơs broă lơh mờ cồng nha mùl màl. Lơh pràn rơndăp tăp sèng wơl ătbồ broă mờ priă tàm ală mpồl lơh sa kă bro Dà lơgar, tơnguh uă cồng nha lơh broă, tàm hơ̆ uă ngan là bơcri priă lơh rơndăp broă lơh nàng gàr niam bơta tề lam mờ kung gàr geh cồng nha priă jền. Ai tơngŏ mờ lơh niam gơnoar broă cau tờm lam bơh lơh sa Dà lơgar dê. Bơtàu tơnguh lơh sa làng bol dê lơh is mùl màl gơs dùl gơn kơnờm kwơ màng ngan bơh rài lơh sa dê. Dong kờl bơtàu tơnguh rề ơnàng drà kă bro ai broă lơh sa mpồl bal, mpồl lơh broă bal in”.

Pơrjum dờng dơ̆ XIV pơn jăt tai ai tơngŏ nùs nhơm lơh ngan cíñ trị uă bơh Đảng dê tàm broă ai bơta niam chài mờ kòn bơnus tàm tiah tờm bơh bơta kwơ màng bơtàu tơnguh dà lơgar. Do ờ mìng là broă pơn jăt tai pal geh bơh Đảng dê bơh ală rài lơh broă mờ Tam gơl pa, mờ gam là broă bơtàu tơnguh pa tàm bồ tơngoh kwơ màng. Ồng Nguyễn Văn Hùng, Ƀộ trưởng Ƀộ Niam chài, Tàp pràn să jan mờ Lòt nhơl đơs tus 6 mpồl gùng dà broă lơh nàng “Ngui niam bơta pràn tàm dơlam is bơh bơta niam chài, kòn bơnus Việt Nam – Bơta tờm bơtàu tơnguh mhar mờ kơl jăp dà lơgar tàm rài pa”: “Tam gơl pa pràn kơl dang tơl ală bơta bồ tơngoh git wă bè bơtàu tơnguh bơta niam chài, ai broă bơcri priă bơta niam chài in là bơcri priă bơtàu tơnguh kơl jăp dà lơgar dê ai rơnàng tơnơ̆ do bơh jơi bơtiàn dê. Pal tơnguh uă bơta pràn bơh mpồl lơh broă niam chài, bơta tờm kòn bơnus tus tơn ai lơh geh mờ tề lam bơta kwơ niam chài tàm rài pa. Sền bơtàu tơnguh broă lơh niam chài uă mờ lơh sa bơceh lơh là bơta pràn gơguh lơh sa pa, pơgồp bal toưn tàm gơguh GDP”.

Jăt ồng Y Thanh Hà Niê Kdam, Ƀí thư Tỉñ ủy càr Lâm Đồng đơs, nùs nhơm pin dờn bơh Làng bol gơwèt mờ Đảng là bơta tờm kơ̆ kơl jăp nàng lơh geh cồng nha ală jơnau kờñ kwơ màng mờ Đảng neh geh ai. Tàm bơta dà lơgar gam mŭt tàm tơngai bơtàu tơnguh pa mờ uă bơta niam bal mờ bơta lòng geh bơrlŭ bal, nàng tơnguh mpồl lơh broă cíñ trị tiah làng bol jơi bơtiàn ờ gal cau, ồng Y Thanh Hà geh jơnau đơs: “Tơnguh broă bơ̆t bơtàu mờ tơnguh gơnoar mpồl lơh broă cíñ trị tờm ngan, tàm hơ̆ uă ngan là cau geh bơngă pin dờn tàm jơi bơtiàn, jăt yàng; git nền bơta gơlik geh tàm Làng bol. Rơcang lài, tam dră, kơrian ală mpồl dră wơl, cau tam dră mŭt, bơchồt làng bol tus bal tam dră mờ Đảng, Dà lơgar he. Lơh niam broă lơh bal mờ lơgar ndai Làng bol, tàm hơ̆ uă ngan là tơnguh bơhiàn tam klăc bal đah ală tiah nhàr dà lơgar mờ ală lơgar rềp bal. Lam làng bol gàr mờ ngui niam, prăp gàr bơta niam chài jơi bơtiàn, nàng prăp gàr bơhiàn ờs mờng, tơnguh bơta niam chài mờ gàr nikam mờ tơnguh bơta tam klăc bal, nùs nhơm pơnyờ să jơi bơtiàn, do là bơta tờm nàng tam dră wơl mờ ală bơta gơrềng ờ niam bơh bơdìh bè jăt yàng ờ niam, cau tìs gan dà lơgar”.

Di nùs ngan mờ broă đơng lam: “Làng bol là tờm, là cau tờm, là jơnau kờñ mờ bơta pràn bơh broă bơtàu tơnguh” dê geh cih tàm sră nggal Pơrjum dờng, mò Nguyễn Thị Thúy Lam, Ƀí thư Đảng ủy sàh Tân Khánh Trung, càr Đồng Tháp đơs là, dùl dà lơgar pràn kơl dang ờ mìng geh was mờ bơta dờng lơh sa ha là khà gơguh GDP, mờ bơta kwơ màng rơlao là mờ bơta niam rài kis mờ khà gơboh gơbài làng bol dê. Bơta pas gơs mìng mùl màl geh kwơ màng tŭ tơl nă làng bol ndrờm geh kis tàm bơta hờm ram, khăt gơboh, lơngăp lơngai mờ gơboh gơbài. Mò Nguyễn Thị Thúy Lam đơs: “Hơ̆ là anih rài kis làng bol geh kơl jăp, lơngăp lơngai, gơguh jăk. Làng bol ờ mìng tơl sa, tơl soh mờ gam geh dờp ală broă lơh drơng ala lơh sơnơm, bơto bơtê, niam chài niam ngan; geh is tàm tiah kis niam bơnĕ. Hơ̆ là anih geh gơnoar atbồ rềp làng bol, drơng broă làng bol in; dùl mpồl lơh broă gơnoar atbồ git “rơcang jơnau ờ sŭk ơm làng bol dê, chờ bal mờ nùs nhơm chờ hờp làng bol dê”. Hơ̆ là, anih geh dùl mpồl bơtiàn tam klăc bal, anih geh nùs nhơm ƀòn lơgar đềt mềr, ală bơta kwơ niam chài ờs mờng geh pơn jờng mờ prăp gàr”.

Bơh cồng nha Pơrjum dờng dơ̆ XIV Đảng dê, tơl nă đảng viên bal mờ Làng bol lơh ngan tam gơl gùng dà broă lơh, jơnau lơh nền bơh Đảng dê gơs broă lơh mùl màl, ai cồng nha mùl màl mờ bơta gơboh gơbài bơh Làng bol lơh bơta tờm was uă ngan. Bơh broă lơh gơs kơrnoăt boh lam lơh sa, bơtàu tơnguh ndrờm bal ală bơnah broă lơh sa, tus mờ broă tơnguh bơta pràn niam chài, kòn bơnus mờ tơnguh mpồl lơh broă cíñ trị tàm ƀòn lơgar, jơh ală ndrờm wèt tus jơnau kờñ bơ̆t bơtàu dùl dà lơgar bơtàu tơnguh mhar, kơl jăp, geh uă bơta niam chài mờ geh uă nùs nhơm pin dờn. Do là bơta tờm kwơ màng nàng lơh jăt jơh jơnau kơ̆p gơn bè dùl lơgar Việt Nam pràn kơl dang, pas gơs tàm rài bơtàu tơnguh pa.