Tàm càr Dăk Lăk, tơnơ̆ mờ dùl nhai lơh broă lơh dờng “30 ngai mang” lơh sồ jơh jơnau yal tơngit màh sồ tiah tam mờ hìu dăp klơm phan, tus tŭ do geh di pơgăp 60% bă ù bal mờ jơnau yal tơngit neh geh lơh sồ jơh. Broă lơh dờng geh lơh bơh ngai 07 nhai 8 tus ngai 07 nhai 9, tơrgùm tàm broă sền wơl, tơrgùm, lơh di jơh mờ tơrgùm jơnau yal tơngit gơwèt mờ ală tiah tam tờm sầu riêng mờ hìu dăp klơm phan. Ală mpồl lơh broă tus sền tơn tàm bă ù, tiah tam, cau atbồ, sră nggal adăt boh lam bal mờ broă lơh sa. Do ờ mìng là broă tơrgùm jơnau yal tơngit, mờ gam là broă lơh di jơnau yal tơngit nàng tơnguh uă cồng nha atbồ, drơng tàm broă jòi tiah tam mờ di pal mờ jơnau kờñ bơh ală drà kă bro lơgar bơdìh dê.

Ồng Bùi Hồng Quý, Kwang Lam bồ Sờh broă lơh sa suơn sre mờ Tiah ơm kis càr Dăk Lăk pà git: “Sờh Broă lơh sa suơn sre mờ Tiah ơm kis neh lơh geh 8 mpồl lơh broă lơh jăt kơnòl do mờ kung neh sồr ală sàh, sơnah ƀòn geh bă ù tam sầu riêng mblàng yal, lam làng bol tus bal lơh màh sồ tiah tam, pơgồp bal niam broă lơh sồ jơh jơnau yal tơngit màh sồ tiah tam. Sờh kung rơ̆p pơn jăt tai jăt sền nàng lơh broă bal mờ ală sàh, sơnah ƀòn lơh ală kơnòl broă gam tai”.

Lơh jăt Jơnau lơh nền tàm pơrjum sồ 36 bơh Chính phủ, Anih tờm Dong kờl mờ plam broă lơh sa suơn sre Dà lơgar, Bộ Broă lơh sa suơn sre mờ Tiah ơm kis bơyai lơh bơsram tàp ai mpồl lơh broă dong kờl mờ pơlam lơh sa suơn sre in bè lơh sa kloh niam, lơh màh sồ tiah tam, jòi tiah tam di pal mờ jơnau kờñ bơh drà kă bro tàm càr Lâm Đồng. Ală cau bơsram tus sền broă tam plai màk tàm bă ù ơnàng di pơgăp 8 sào tàm sàh Phú Sơn Lâm Hà, geh lơh jăt gùng dà broă lơh jăt VietGAP, ngui phan tuh dà ntờc mờ tuh is phơng. Mpồl kung tus sền dùl hìu măi lơh plai màk geh bơta pràn rơlao 10 rơbô tấn pah nam. Ồng Lê Quốc Thanh, Kwang Lam bồ Anih tờm Dong kờl pơlam broă lơh sa suơn sre Dà lơgar đơs nền: tŭ tiah tam geh lơh di pal, phan geh lơh geh tiah tam loh làng, lơh sa geh pơgồp bal mờ lơh gơs phan mờ drà kă bro, bơta pràn tàm pơrlòng bơh phan geh lơh bơh broă lơh sa suơn sre Việt Nam rơ̆p geh gơguh. “Dong kờl mờ pơlam lơh sa suơn sre pal lơh broă bal tơn mờ làng bol lơh broă sa suơn sre tàm suơn. Pal tam gơl mờ tam gơl bơh bồ tơngoh tam jào bơta chài tus mờ bồ tơngoh lơh sa suơn sre, tus bal tàm jơh ală gah broă. He pal geh tơl ală jơnau git wă, rơ̆p geh ală tơngu me, ơdŭ bơto, cau bơto nàng gơs ală cau dong kờl pơlam broă lơh sa suơn sre jăk. Git tus jơnau git wă drà kă bro, jơnau git wă bè tơrbŏ bal mờ bơyai lơh dong kờl làng bol lơh broă sa suơn sre tus bal tàm ală broă lơh mpồl lơh broă bal”.

Pa do, Đah Tam phan mờ Sền gàr phan tam, gơwèt Bộ Broă lơh sa suơn sre mờ Tiah ơm kis pà git, Đah atbồ dờng phan tăc mờ blơi mờ lơgar bơdìh gan mpồng nhàr lơgar Lo neh kĭ tai 567 màh sồ hìu dăp klơm phan mờ tiah tam sầu riêng geh ai tăc tus tàm drà kă bro lơgar Lo. Tàm hơ̆ geh 401 màh sồ tiah tam mờ 166 màh sồ hìu dăp klơm phan. Bơh tŭ hơ̆, pơgồp bal tàm broă tơnguh bơta pràn tăc plai sầu riêng jăt gùng tờm tus lơgar Lo dê, mờ ai geh bơta niam nàng ală sàh, sơnah ƀòn, mpồl lơh sa kă bro mờ làng bol bơyai lơh wơl lơh sa, tơrgùm blơi, dăp klơm mờ tăc mờ lơgar bơdìh, tàm hơ̆ uă ngan là tàm tŭ Tây Nguyên mŭt tàm kàl tơnhào uă.

Bơh ală khà geh bè lơh sồ jơh jơnau yal tơngit tàm càr Dăk Lăk dê, ală broă tơrlòng lơh sa lơh di pal tàm càr Lâm Đồng tus mờ broă rề ơnàng màh sồ geh ai tăc tus lơgar Lo, gơtùi gŏ broă lơh sa suơn sre lơgar Việt Nam dê gam rơhời tam gơl bơh tờm. Hơ̆ là tam gơl bơh broă lơh, broă atbồ tus mờ broă sền kwơ bơta niam, khà geh ai mờ bơta kwơ. Do kung là dùl tàm ală bơta tơngŏ mùl màl bơh broă lơgar Việt Nam brồ să tàm rài pa: rơcang lài ngui măi mok, tơnguh uă bơta jăk cau lơh broă, bơyai lơh wơl lơh sa mờ di pal niam rơlao mờ ală khà niam bơh drà kă bro ală lơgar dê.