Ồng Lê Hữu Trí, Cau ala măt Quốc hội mpồl Khánh Hoà đơs là, bàr pe tơngume bơh jơnau rơcăng cih adăt dê bơh mùl màl lơh jăt kung gam sơl gơkòl gơtìp. Cau ala măt sồr bơtơl bơta sèng mblàng lơh loh akhar jơnau halà cih broă jàu loh làng nàng gĭt nền jơnau tìs (kơldăng nùs halà  ờ kơldăng nùs) mờ khà kơn jơ̆ bơh broă lơh lơh tìs tàm Bơta 2, bal mờ broă jàu đal gŏ bơta tơrmù ƀà tàm Bơta 9 nàng jăt ngui ring bal. Bè cih broă lơh glài mờ broă lơh bơsong jơnau gơlời wơl, uă cau ala măt sồr ờ hềt tơngguh dồ ròt dilah ờ hềt geh sền swì gơrềng jăt broă mờ mpồl kong gơrềng. Pal ai lài lơh jăt mùl màl broă lơh bơsong lơh wơl jơnau bơh chờm, tă sờr broă bơ̆t bơtàu tìs, bơsong ƀơ̆ ƀơl, tơm wơl priă cồng tìs mờ adăt boh lam; mơkung gĭt nền loh tŭ lơi kờñ pal kŭp ai sră ai gơnoar halà tơn lời lơh broă.

Bè tơngai ai ngui bơsong lơh tìs sră pơ àr gơnoar ătbồ, mò Mai Phương Hoa, Cau ala măt mpồl Ninh Bình sồr ală broă lơi kờp dŭ tơn jŏ tơngai ai ngui lơh glài tus 3 nam den pal kơlôi sơnơng nền, dipal mờ mùl màl, pleh tơn jŏ tơngai ai ngui ờ kwơ. Gơrềng tus khà lơh glài, jơnau rơcăng cih Adăt Bơsong lơh tìs sră pơ àr gơnoar ătbồ cih khà lơh glài uă ngan tàm lơh glài lơh tìs sră pơ àr gơnoar ătbồ là 1 tơmàn 500 tơlak đong gơ wèt mờ cau nă să is mờ 3 tơmàn đong gơ wèt mờ mpồl cau. Bè hơ̆, khà uă ngan gơguh tus 1,5 dơ̆ pơndrờm mờ adăt gam lơh jăt tŭ do. Cau ala măt đơs là, pal kơlôi sơnơng nền, đơs nền bơh uă bơta bè khà lơh glài do, nàng gơ in geh bơta kràñ cê bơh kơrnoăt boh lam dê mơkung ờ lơh gơrềng uă ir tus rài kis, lơh sa kă bro bơh làng bol, mpồl lơh sa kă bro dê.