Lữ đoàn Đặk kông ƀộ 198 lơh pôs đồng tàm xã Hoà Đông, kơnhoàl Krông Pách, càr Dăk Lăk. Ală nam pa do, bal mờ lơh sir jak ngan kơnòl broă cíñ trị- ling klàng, Lữ đoàn gam lơh jat geh cồng nha broă lơh hòi jà làng bol. Bơh nam 2021 tus tŭ do, mpồl ling neh lơh 13 nơm hìu cau ling bal, 14 nơm hìu bơta nđàc, 9 nơm hìu tam klăc dờng mờ 2 nơm hìu bơsram pà ai gơnoar atbồ mờ làng bol tàm ù tiah lơh pôs đồng dê, mờ kờp jơh priă tă lơh 5 tơmàn 610 tơlak đong.

Bơdìh hơ̆, mpồl ling neh dong kờl rlau 10 tấn phe tàm kàl puh pah ai làng bol in; gĭt nđờ rơbô ngai lơh broă lơh niam wơl gùng lòt rê, toah wàs rbòng dà, tơnhào phan lơh geh bơh broă lơh sa suơn sre; bơyai lơh uă dơ̆ kham sơm kòp, pà sơnơm ờ sa priă ai rlau 7 rơbô dơ̆ làng bol in. Ală broă lơh geh ngan bơh Lữ đoàn Đặk kông ƀộ 198 tàm càr Dăk Lăk dê pơgồp bơnah bal mờ ală tiah lơh niam broă lơh gàr tơl niam rài kis mpồl bơtiàn, mờ gam bơto bơtê bơhiàn kăc màng ai rơnàng kơnòm să in, lơh geh nùs nhơm kờñ gơboh lơgar, bơt bơtàu bơta tam klăc ling klàng làng bol.