Pơrjum dờng XIV Đảng dê geh tơngume: Tềng hơđơm bồng bi gơklŏ ngan Đảng dê, tơrgùm bal pràn, dùl nùs bal lơh jăt geh cồng nha ală jơnau kờñ bơtàu tơngguh dà lơgar tus nam 2030; rơcăng lài is broă lơh, lơh ngan is, kơnờm tàm bơta pràn is, guh pràn tàm rài brồ să bơh jơi bơtiàn dê tài ring lơngai, lơngăp lơngai is, làng bol lơh tờm, pas sơm, bơtàu tơngguh sùm, jak chài, gơboh gơbài, kơ̆ cơnđoà lòt guh tus củ nghĩa sàh hội.

Pơrjum dờng XIV Đảng dê neh lơh sir ală broă sồr lơh, mờ kơnòl broă sền swì wơl tìs di broă lơh jăt Jơnau lơh nền tàm Pơrjum dờng XIII gơ jăt bal mờ tơn jơh 40 nam Tam gơl pa, đơs nền ală broă lơh geh kwơmàng pơnrơ ngan, ai gŏ ală bơta ờ hềt dipal, ờ hềt pràn jak mờ jơnau bơh tài, ai geh ală jơnau bơsram dờng, geh kwơ cribơyai jơnau tàm sră pơ àr mờ mùl màl tàm rài kis jŏ jòng ai broă lơh bơ̆t bơtàu, bơtàu tơngguh dà lơgar in; cribơyai mờ ring bal broă rơndăp lơh, jơnau kờñ, kơnòl broă tờm tam gơl pràn jŏ jòng ai tơngai bơh nam 2026- 2030 in, wèt tus tus nam 2045; sền swì wơl tìs di jrô ngan mờ tơl làm broă lơh bơ̆t bơtàu Đảng, ală anih lơh broă cíñ trị sàng goh, kơnhăp pràn tơl làm; pồ Mpồl Duh broă Đảng Dà lơgar khoă XIV.

Mờ nùs nhơm tam gơl pa, mờ kơnòl dờng màng ngan tềng đăp Dà lơgar mờ Jơi bơtiàn, Pơrjum dờng săc rwah mờ pồ geh Mpồl Duh broă Đảng Dà lơgar khoă XIV geh 200 nă oh mi, tàm hơ̆ geh 180 nă oh mi geh jơng mùl màl, mờ 20 nă oh mi geh jơng rơcăng lài.

Drim 23/01, Mpồl Duh broă Đảng Dà lơgar khoă XIV bơyai lơh Pơrjum dơ̆ sơnrờp, pồ Ƀộ Cíñ trị, Tổng Ƀí thư, Mpồl Đơng lam Đảng Dà lơgar, Anih duh broă Sền swì Đảng Dà lơgar, Cau lam bồ Anih duh broă Sền swì Đảng Dà lơgar khoă XIV.

Pơrjum dờng cau ala măt gùt lơgar dơ̆ XIV Đảng dê lơh geh cồng nha niam bơnĕ là rùp pơrya mùl gŏ bơh bơhiàn tam klăc bơh Đảng dê, là rùp pơrya bơh bơta pin dờn mờ kơ̆p kờñ ngan tài dùl Việt Nam ring lơngai, lơngăp lơngai is, làng bol lơh tờm, pas pràn, kơ̆ kơl jăp, jak chài, gơboh gơbài; kơ̆ cơnđoà lòt guh rài pa, rài pas pràn tềng đăp bơta đơng lam, ăt gơnoar Đảng dê, bơ̆t bơtàu gơtùi lơgar Việt Nam sàh hội củ nghĩa.