Tàm dơ̆ tìp mat, mpồl yal: Dơ̆ pơrjum dơ̆ 10, Quôk hội khoă XV kờp dŭ bơyai lơh bơh ngai 20/10 tus ngai 12/12, Quôk hội rơp sền swì, lơh nền 43 rơndap lơh adat boh lam, jơnau lơh nền tàm pơrjum; 12 mpồl tơngume bè lơh sa – mpồl bơtiàn mờ ală broă kuơmàng ndai… Cau tĕ khà càr Lâm Đồng ai tơnggŏ bơta pin dờn tàm bơta đơng lam bơh Đảng, bơta jat sền bơh Quôk hội, bơta đơng pơlam kràñ cê ngan bơh Cíñ phủ dê tàm bơtàu tơnguh lơh sa mpồl bơtiàn, gàr niam lơngăp lơngai dà lơgar. Cau tĕ khà sồr pal lơh jat mhar jơnau sồr lơh bơh Ƀộ Cíñ trị dê kờp sền lam lơh broă lơh jơnau bơto bơsram pe kâp, gàr lơh dùl ƀộ sră măi ndrờm bal gùt lơgar. Cau tĕ khà tàm ală sàh tiah sar lơgar ngài tàm càr dan geh sền gròi bơcri lơh gùng lòt nàng ƀuơn ƀuài tàm rài kis mờ chồl tơnguh kă bro phan. Tàm broă lam lơh gơnoar atbồ ƀòn lơgar 2 kâp, gam bàr pe bơta gơ kòl, ờ niam kờñ pal bơsong di tŭ nàng mpồl lơh broă sră pơ àr gơnoar atbồ lơh broă niam.