Đơs tàm pơrjum, ồng Lưu Văn Trung, Củ tịc Mpồl duh broă Làng bol càr Lâm Đồng đơs nền, sơr lèt gan uă kal ke, bơta lòng nam 2025 lơh sa càr Lâm Đồng pơn jat tai gàr niam khà gơguh đau mờ 16 tàm 19 broă jàu lơh geh mờ sơr lèt broă rơndăp lơh geh ai; kờp jơh priă tă dia Dà lơgar tàm ù tiah do dê kờp dŭ lơh geh rlau 31 rơbô 200 tơmàn đong, gơguh 11% broă rơndăp lơh càr dê jàu mờ gơguh 17% pơndrờm mờ broă rơndăp lơh Dà lơgar dê jàu; broă lơh sa suơn sre pơn jat tai đơs nền gơnoar tờm dong kờl lơh sa bơh càr dê mờ rlau 107 rơbô lồ broă lơh sa suơn sre ngui măi mok pa mờ mờr 150 rơbô lồ ù lơh sa sàng goh; ală gah năng lượng lơh gơlik wơl, lơh sa mờ măi mok bô xít alumin pơn jat tai tă pơgồp kwơ màng tàm gơguh lơh sa bal bơh càr dê....

Tàm pơrjum dơ̆ 7, Mpồl duh broă Làng bol càr Lâm Đồng khoă 10 tơrgùm cribơyai, lơh nền gơwèt mờ 32 jơnau yal mờ 21 jơnau rcang cih jơnau lơh nền tàm pơrjum, tàm hơ̆ uă Jơnau lơh nền tàm pơrjum cèng bơta kwơ màng jŏ jòng.

Tàm sơnah ƀòn Pleiku, dơ̆ pơrjum dơ̆ 5 Mpồl duh broă Làng bol càr Gia Lai khoă XII lùp mờ hơ jơnau lùp bè broă lơh drơng mờ dà tih dà lìu, kơnòl atbồ, bơta geh ngan phan bơna yuh tơlik dà lìu mờ ală broă lơh nàng kờñ gàr niam ờdo ờdă jŏ jòng tàm tŭ tơngai trồ tiah lơh aniai ngai sơlơ ờ niam neh dờp geh bơta sền gròi bơh cau tĕ khà dê.

Hơ jơnau lùp, ồng Cao Thanh Thương – Kwang Lam bồ Sờh Broă lơh sa suơn sre mờ Tiah ơm kis càr Gia Lai đơs nền, ờ geh broă yuh dà lìu tàm dà dờng Hà Thanh. Tiah do ờ geh tơnau dơng dà; bàr tơnau dơng dà dờng tàm tiah đah mat tơngai lik càr dê là Núi Một mờ Định Bình tàm dơ̆ dà tih dà lìu pa do ndrờm ờ hềt bềng dà mờ broă tam pà dà bơh tơnau dơng dà dê mìng lơh gơ rềng tus dà dờng Côn. Ồng Cao Thanh Thương kung đơs bơta ờ niam tàm broă yuh tơlik dà lìu bè bơta bơt bơtàu sơgràm jat kềng gah dà dờng, tam tờm keo tàm tiah yuh tơlik dà lìu lơh hat hiòng dà hòr; dùl gơl bơtơt kìng dà Hà Thanh neh bơcah git nđờ jơt thơk tài bơta kơn jơ̆ bơh dà dê mờ bơnah tiah kềng gah. Bè gùng dà jŏ jòng, ală tiah pal kờp sền broă rơndap lơh ntrờn làng bol jat tơl kâp trồ tiah lơh aniai.