Mùl màl geh ală cau ala măt ai tơngŏ loh làng là cồng nha gơguh lơh sa nam 2025 càr Dăk Lăk dê mìng geh 6,68%, ờ uă rơlao mờ jơnau kờñ geh ai. Tàm bơta do, jơnau kờñ gơguh lơh sa bơh 10% rơlao hờ đang tàm nam 2026 jăt gùng dà broă lơh bơh Dà lơgar bal mờ Jơnau lơh nền tàm Pơrjum dờng Đảng ƀộ càr neh ai là bơta rồn bơklơn uă ngan.

Jăt ồng Trần Văn Tân, kwang lam bồ Sờh Priă jền càr Dăk Lăk pà git, nàng lơh gơs jơnau kờñ do, càr ai geh gùng dà broă lơh gơguh pràn khà broă lơh sa mờ măi mok, bơ̆t bơtàu mờ broă lơh drơng ala, sền broă bơcri priă dà lơgar bal mờ priă bơdìh mờ kes priă là bàr bơta tờm. “Bè tiah lơh sa mờ măi mok bơ̆t bơtàu, pơn jăt tai ai là bơta pràn gơguh lơh sa tờm mờ khà gơguh là 18,14%. Tiah bơcri priă dà lơgar kung pal tơrgùm bơcri 100% priă bơcri dà lơgar jăt mờ broă rơndăp lơh geh ai, kờp dŭ khà priă do tàm bơh rơlao là 14 rơbô tơmàn đong. Bơdìh hơ̆ tai kung lơh jăt ală khà rơndăp broă mờ Dà lơgar lơh tàm càr. Gơwèt mờ ală khà priă bơcri bơdìh kes priă, kung pal tơrgùm bơsong ală gơkòl, tàm hơ̆ uă ngan là sră nggal rơcang bơcri priă nàng ală rơndăp broă lơh do in geh lơh".