Mho òr (28/12), tàm sàh Ia Dom, càr Gia Lai, Ƀiñ đoàn 15, gơwèt Ƀộ Ling klàng bơyai lơh Sơn đờm mŭt lơh Hìu rông niam chài sàh Ia Dom in. Do là broă lơh pờ sơnrờp bơh broă bơcri priă tàm broă lơh 9 nơm hìu rông niam chài pà ai làng bol ală sàh tiah nhàr lơgar Đah măt tơngai mŭt bàr càr Gia Lai mờ Quảng Ngãi in.

Jăt broă rơndăp lơh geh ai, 9 nơm hìu rông niam chài geh bơcri priă lơh mờ kờp priă 20 tơmàn đong. Tơl nơm hìu geh lơh dờng ơnàng di pơgăp 130 thơ̆k vuông, ñhoa rơlao 17 thơ̆k. Ală hìu rông geh lơh jăt broă lơh ờs mờng, mờ di pal mờ bơta niam chài bơh làng bol ală jơi bơtiàn tàm tiah nhàr lơgar bàr càr Gia Lai mờ Quảng Ngãi dê. Kờp dŭ, jơh 9 nơm hìu rông do geh lơh gơs mờ ai ngui tàm nhai 9 nam 2026. Đơs tàm dơ̆ sơn đờm mŭt lơh, Thượng tướng Trương Thiên Tô, Atbồ Đah Cíñ trị Ling klàng làng bol Việt Nam pà git: broă bơcri priă klơh hìu rông niam chài tàm ală sàh tiah nhàr lơgar Tây Nguyên ai tơngŏ broă sền gròi bơh Đảng, Dà lơgar bal mờ Ling klàng dê gơwèt mờ làng bol ală jơi bơtiàn ờ gal cau, nàng tơnguh mpồl tam klăc bal gùt làng bol, bơ̆t bơtàu kơl jăp “bơta pràn tàm nùs nhơm làng bol”, pơgồp bal mờ kơnòl broă gàr kơl jăp cíñ trị, sền gàr dà lơgar – lơngăp lơngai tàm ƀòn lơgar.