Hìu ơm bơh mò Đặng Thị Duy Hiền, ơm tàm thôn Thành Nam, sàh Suối Dầu, càr Khánh Hòa gơtìp tơrlah tàm dơ̆ mìu dờng dà tih dà lìu pa do. Mờ bơta dong kờl bơh gơnoar atbồ tiah do dê mờ mpồl ling, mò Đặng Thị Duy Hiền neh sơnđờm mut lơh wơl hìu ơm pa. Broă lơh gơtìp uă ngan kal ke tài bơh ờ geh cau lơh, ờ hoan geh phan bơna bơt bơtàu mờ trồ tơngai ờ niam. Tềng đăp bơta hơ̆, kwang bàng, cau ling Đại đội Trinh sát Cơ giới 1, Gah đơng lam Mpồl ling klàng càr Khánh Hoà lơh “ broă lơh Quang Trung” neh geh mat di tŭ, jun pơndiang phan bơna, pơgồp bal dà kơl hề lơh bơnàng hìu. Mìng tơnơ̆ 1 tŭ tơngai lơyah, hìu pa rơ hời gŏ rùp, cèng bơta chờ hờp mờ bơta iang nùs wơl gơwèt mờ mò Đặng Thị Duy Hiền: “Geh Dà lơgar pà dong kờl añ lơh hìu tàm tiah ơm pa tàm do. Añ ưn ngài ală mpồl, gah broă, mpồl cau neh dong kờl ai oh in lơh hìu di tŭ lài mờ tơngai sa tềp bơhiàn dà lơgar. Dà kơl hề cau ling digơlan geh tus 30% kờp jơh priă lơh hìu, den tàng oh ngui khà priă do nàng blơi tai phan bơna bơt bơtàu nàng lơh sir hìu ơm".

Ală ngai do, hạ sĩ Nguyễn Hoài Nam, lơh broă tàm Đại đội Trinh sát Cơ giới 1, Gah đơng lam mpồl ling klàng càr Khánh Hoà, sùm ờ ru ngan. Jơh pơndiang lŭ, bi chồl rơndeh pơndiang sơmang bal mờ cau ling dong kờl cau tờm lơh hìu lơh sir bơnah bơnàng hìu:“Trồ tơngai bàr pe ngai do mìu tàm trồ mho sùm, mơya kwang bàng, cau ling bol añ sùm pơnđơl pràn lơh ngan lơh sir hìu ơm lài mờ broă rơndăp lơh. Hơ̆ là kơnòl broă bơh bol añ dê”.

Hìu ơm bơh mò Lê Thị Đã, ơm tàm Tổ dân phố 1, sơnah ƀòn Đô Vinh, càr Khánh Hòa, sền bal là neh mờr lơh sir đau. Bơta chờ hờp tơngŏ loh làng tàm muh mat cau ùr neh lòt gan uă bơta roh rui tàm dơ̆ mìu dờng dà tih dà lìu pa do dê. Bi Võ Văn Tâm, kòn klau mò Lê Thị Đã tơngŏ bơta ngoh rơngăc tŭ mpồl ling dong kờl tơn lơh wơl hìu ơm ai hìu bơnhă he in:“Mìu dờng dà tih dà lìu pa do, hìu mè añ dê gơtìp tơrlah jơh lơm. Kơnờm gơnoar atbồ tiah do mờ Trung đoàn 896 dong kờl ai hìu bơnhă in, jơh nùs ngan. Tŭ do, hìu kung neh lơh gơs đau sơl”.

Lơh jat “Broă lơh Quang Trung” bơh Thủ tướng Cíñ phủ dê lam lơh, Gah đơng lam mpồl ling klàng càr Khánh Hoà pơgồp bal mờ ală mpồl ling Tiah 4 ling dà lềng, Lữ đoàn Đặc kông 5 neh hòi jà 70 mpồl lơh hìu, mờr 1 rơbô 150 nă kwang bàng, cau ling bal mờ uă rơndeh rơndồ măi mok, jal mhar rê tàm ală tiah gơtìp hoàc huơr kơn jơ̆ nàng dong làng bol lơh wơl hìu đam gơtìp ờ diơng tơnơ̆ mìu càl rơbŭt dờng dà tih dà lìu.

Ờ mìng lơh wơl ală hìu ơm, mpồl ling klàng gam lơh geh wơl bơta pin dờn ai làng bol tiah dà tih dà lìu in. Bơh ală gơnru tơrlah tơrling, roh rui tơnơ̆ dơ̆ trồ tiah lơh aniai, dùl rài kis pa gam rơ hời lơh geh tàm ƀòn lơgar Khánh hoà- kơ̆ kơl jăp rlau, ram mhŭ rlau, tàm nùs nhơm ling klàng- làng bol kơ̆ ngan.