Ală ngai do, Ling mpồl 34 (Ƀộ Ling klàng) gam dồ ròt bal lam lơh bơt lơh 100 nơm hìu ơm ai ală hìu bơnhă làng bol tàm càr Gia Lai mờ Dăk Lăk in gơtìp roh hìu đam tàm dơ̆ mìu dờng dà tih dà lìu pa do, tàm hơ̆ 70 nơm hìu tàm Gia Lai mờ 30 nơm hìu tàm càr Dăk Lăk.

Tơnơ̆ tŭ dờp gơnoar broă, rlau 600 nă kwang bàng, cau ling bal mờ uă rơndeh rơndồ măi mok, phan bơna neh sơr băc mhar lòt gùng tus tàm ală tiah, jàu broă ai mpồl ling in drơng lơh tơl tiah geh ngan, pơgồp bal kơ̆ mờ gơnoar atbồ ală tiah mờ hìu bơnhă làng bol nàng mhar lòt sền, lơh geh broă lơh mờ bơyai mut lơh, gàr niam di mờ bơta chài, lơngăp lơngai mờ di tŭ tơngai; Đại tá ồng Phạm Hồng Sơn, Phó Cíñ ủy Hìu bơsram Ling klàng Ling mpồl 34 pà gĭt, jơh gùt mpồl ling, bal mờ cau lơh sơnơm bơh mpồl ling dê, ndrờm geh hòi jà tơrgùm bal nàng gàr niam pràn kơl dang mpồl ling in mờ cồng nha lơh broă. Ling mpồl 34 ai jơnau kờñ lơh sir ală hìu ơm lài mờ ngai 20/01/2026, dong làng bol gờñ bè ờs wơl rài kis mờ di tŭ wă rò sa tềp tàm hìu ơm pa ram mhŭ.