Mờ bơta jòng rlau 189 kơi sồ gùng dà lềng, càr Dăk Lăk sùm geh gĭt nđờ rơhiang nơm ơhò plung lik lòt tàm dà lềng tras kŭp ka mờ ròng tam phan tàm dà lềng. Lòt bal mờ làng bol lơh ka, ală kwang bàng, cau ling sền gàr tiah nhàr lơgar sùm lơh broă tàm dà lềng, lơh jat niam ală kơnòl broă lơh broă sền gàr tiah nhàr lơgar, gàr niam ngan lơh broă ơm gak crăp rcang tam lơh; crăp rcang dong kờl làng bol lơh ka tras kŭp ka mờ gàr niam lơngăp lơngai, ờdo ờdă tàm dà lềng. Tàm tiah anih ơhò lơh ka ơm Đông Tác, Thượng úy Phan Ngọc Dương, Atbồ Anih Gròi sền Ling sền gàr tiah ngàr lơgar Đà Rằng, Pôs đồng ling sền gàr tiah nhàr lơgar Tuy Hoà pà gĭt: bơh bồ nam tus tŭ do, neh geh gĭt nđờ rơhiang nơm ơhò nđàr ka ngừ dà lềng dờng tus ơm tàm tiah ơhò lơh ka ơm nàng tăc phan tàm dà, bal mờ hơ̆ là dồ ròt ơhò lik lòt tàm dà lềng; jơh ală ndrờm geh sŏk sền niam ngan.

Thượng úy Phan Ngọc Dương,pà git"Anih sền gròi ling sền gàr tiah nhàr lơgar Đà Rằng sùm geh kwang bàng ơm lơh broă tŭ ơhò rê tus tàm anih ơhò ơm mờ lik bơh anih ơhò ơm ndrờm geh bơta sền gròi, sŏk sền jat sră pơ àr ling sền gàr tiah nhàr lơgar dê. Pơgồp bal mờ anih ơhò ka ơm sồr tơlik sră pơ àr cih tŭ kŭp phan tàm dà lềng mờ gàr niam di jat mờ jơnau sồr adat boh lam dê bè rcang lài kơryan tras kŭp phan dà lềng tìs mờ adat boh tàm dà lềng”.

Anih ơhò ơm Phú Lạc là tiah lơh broă bơh rlau 650 nơm ơhò lơh ka. Pah ngai, gĭt nđờ jơ̆t nơm ơhò tras kŭp ka mờ drơng broă jun phan tàm dà rê tàm do ai ală cau tờm jun pơndiang phan lòt tàm ƀòn dờng Hồ Chí Minh, Tây Nguyên mờ drơng ală hìu măi lơh gơlik phan ơn tàm hộp. Mpồl ling sền gàr tiah nhàr lơgar bơh Pôs đồng ling sền gàr tiah nhàr lơgar Hòa Hiệp ơm lơh broă bal mờ cau lơh broă tàm anih ơhò ka ơm mblàng yal, bơto pơlam làng bol lơh jat tơl làm ală jơnau sồr tàm tras kŭp ka phan tàm dà. Thiếu tá Lương Công Hậu, Phó lam bồ Pôs đồng ling sền gàr tiah nhàr lơgar Hòa Hiệp pà gĭt: “Nàng lơngăp lơngai tras kŭp ka, den mpồl ling sơlơ tơnguh tai broă lơh mblàng yal ai làng bol lơh ka in gĭt loh trồ tiah tàm dà lềng; yal ai làng bol lơh ka in gàr niam tras kŭp ka lơngăp lơngap, lơh jat niam ală jơnau sồr tras kŭp ka bè IUU, ờ lơh tìs tiah dà lềng lơgar ndai. Lam lơh jat di ală jơnau sồr dan cih mat sền gròi mut lik tàm anih ơhò ơm ai ơhò plung in, lơh ală sră pơ àr lòt tàm dà lềng tras kŭp ka”.

Tŭ do gam là tŭ tơngai tras kŭp ka kàl tờm. Ka geh tàm kàl tàm ală dơ̆ lòt tàm dà lềng kŭp ka tàm bồ sơnam neh lơh gơ kờñ làng bol lơh ka lik lòt tàm dà lềng tras kŭp ka gan tơngai sa tềp, cèng bal bơta pin dờn bè ală dơ̆ lòt tras kŭp ka tàm dà lềng geh uă cồng nha. Lòt bal mờ kơnòl broă sền gàr gơnoar tờm, ală cau ling sền gàr tiah nhàr lơgar gam là tiah kơldìng kơnhăp kơ̆ bơh làng bol lơh ka dê pah tŭ lòt tàm dà lềng tras kŭp ka. Bơh jơnau bơto pơlam sră pơ àr, mblàng yal jơnau rcang lài pleh lơh tìs mờ jơnau sồr IUU dê, tus dong kờl, jòi dong kờl rềs àr tàm dà lềng, rùp hin cau ling sền gàr tiah nhàr lơgar neh gơ gơs mờng kwèng, rềp mềr. Ồng Hà Thanh Hùng, ơm tàm sơnah ƀòn Phú Yên, càr Dăk Lăk pà gĭt: “Gơwèt mờ ală oh mi ling sền gàr tiah nhàr lơgar bol añ jờng rơ uă ngan bơh ù tiah hơđang ù gờl kung bè bồt bơlào dà lềng, tŭ ơhò plung geh bơta rềs àr halà suơ̆i siar den oh mi cau ling mpồl ling sền gàr tiah nhàr lơgar dong kờl jơh nùs ngan. Gơwèt mờ ală ngai bồ sơnam pa oh mi lơh geh ală bơta dong ală làng bol lơh ka, ală cau lòt tras kŭp ka tàm dà lềng bè bol añ jơh nùs ngan dong kờl mờ tơngkah ală bơta mờ Dà lơgar kơryan ờ ai”.

Nàng lơh jat ală jơnau sồr bè tras kŭp ka tàm dà, tềng đap dơ̆ lik lòt tras kŭp ka tàm dà lềng, mpồl ling sền gàr tiah nhàr lơgar càr Dăk Lăk pơgồp bal mờ cau tờm ơhò mblàng yal, lơh nền ai làng bol lơh ka in bè rcang lài kơryan tras kŭp phan tàm dà lềng tìs mờ jơnau sồr IUU dê. Tŭ lơh broă tàm dà lềng, ơhò kŭp ka yal gùng lòt broă lơh, gàr niam măi mok jat sền gùng lòt mờ cih tơl làm broă lơh tras kŭp ka; tras kŭp ka di tiah dà lềng geh ai gơnoar mờ ờ gŏ di lơh tìs tàm tiah dà lềng lơgar dê, hời rơ hời tă “sră biàng” bơh Anih duh broă câu Âu dê gơwèt mờ Việt Nam. Đại úy ồng Lô Văn Giới, Cíñ trị viên Phó Pôs đồng ling sền gàr tiah nhàr lơgar Hòa Hiệp Nam, Mpồl ling sền gàr tiah nhàr lơgar càr Dăk Lăk, pà gĭt: “Bol añ mblàng yal tus ală làng bol lơh ka in pal lơh jat niam ală jơnau sồr bè tras kŭp ka, tras kŭp ka tàm dà lềng, is ồn là pal lơh jat jơnau sồr IUU. Bơh hơ̆, pơgồp bơnah dong kờl làng bol iang nùs lòt tàm dà lềng tras kŭp ka di mờ jơnau sồr, gàr niam gàr kơ̆ lơngăp lơngai sền gàr dà lơgar, gơnoar tờm tiah dà lềng Dà lơgar dê”.

Bơh anih ơhò sùm tus tiah tras kŭp ka ngài, bơh ală dơ̆ lòt tàm dà lềng tras kŭp ka bồ sơnam pa tus tŭ mìu càl nisơna, Mpồl ling sền gàr tiah nhàr lơgar càr Dăk Lăk sùm geh mat bal bè là tiah kơl dìng pin dờn bơh làng bol lơh ka dê. Bơta lòt bal sùm, geh kơnòl mờ nùs nhơm niam hơ̆ ờ mìng pơgồp bơnah gàr kơ̆ gơnoar tờm, lơngăp lơngai tiah dà lềng lơm mờ gam sơlơ lơh kơ̆ rlau tai bơta rềp mềr ling klàng- làng bol, lơh geh tai bơta pin dờn nàng làng bol lơh ka in iang nùs lòt tàm dà lềng tras kŭp ka, lơh pas ai ƀòn lơgar in.