Tàm hìu măi lơh gơs kơphe tàm Kông ty tă priă bal Bơcri priă mờ Bơtàu tơnguh An Thái, ală gah broă lơh kơphe ƀòk mờ kơphe klài lơh broă sùm nàng di tŭ jào phan geh lơh ai ală gah lơh broă bal tàm ală lơgar in. Ồng Nguyễn Xuân Lợi, Kwang atbồ dờng kông ty pà git, ală khà phan bồ nam neh geh lơh gơs, khà phan kă bro neh geh pơn diang tus tàm anih ơhò ơm, ai geh bơta ƀuơn sơnrờp ngan lơh geh jơnau kờñ gơguh lơh sa tàm nam 2026 dê. “Mpồl lơh sa kă bro sùm rơcang lài jòi sền nàng git mờ ngui geh cồng nha ală kơrnoăt, broă lơh bơh Dà lơgar dê tàm broă lơh sa kă bro. Do là bơta pràn kwơ màng nàng bol añ pơn jăt tai rề ơnàng drà kă bro, tơnguh uă bơta pràn tàm pơrlòng mờ bơtàu tơnguh kơl jăp tàm tơngai tus”.

Nam 2025, priă geh bơh broă tăc phan mờ lơgar bơdìh càr Dăk lăk dê geh di pơgăp 2 tơmàn 8 tơlăk Dolar Mỹ, gơguh mờr 40% pơn drờm mờ nam lài, tàm hơ̆ phan geh lơh bơh broă lơh sa suơn sre pơn jăt tai at gơnoar broă tờm mờ ală bơta phan bè kơphe, sầu riêng, ka kao, măk ka… Cồng nha do lơh geh bơta pràn nàng mpồl lơh sa kă bro pin dờn mŭt tàm nam lơh sa pa. Ồng Nguyễn Tiến Dũng, Phó Kwang lam bồ Kông ty Kong kơnòl nă să is Tăc mờ blơi phan mờ lơgar bơdìh ngai 2 nhai 9 càr Dăk Lăk (Simexco Daklak) pà git, là mpồl lơh sa kă bro dà lơgar lam lài tàm broă tăc phan geh lơh bơh broă lơh sa suơn sre dê mờ lơgar bơdìh đơs, mŭt tàm nam 2026, mpồl lơh sa kă bro pơn jăt tai tơnguh lơh broă bal mờ ală mpồl lơh broă tàm ală lơgar nàng bơtàu tơnguh kơphe bơkah, rề ơnàng drà kă bro mờ tơnguh bơta kwơ kơphe càr dê. “Bol añ geh dùl broă lơh loh làng, hơ̆ là gùng dà bơtàu tơnguh khà lơh geh, tơnguh uă bơta niam ai làng bol lơh broă sa kung bè là mpồl phan tàm mpồl pơgồp bal bơh bol añ dê nàng lơh geh dùl gah lơh kơphe bơkah lơgar Việt Nam dê rơ̆p tus gùt plai ù”.

Bal mờ ală mpồl lơh sa kă bro kơphe, uă mpồl lơh broă bal plai chi kung dờp geh bơta tơngŏ niam. Tàm Mpồl lơh broă bal Xanh Cao nguyên, sàh Cư̆ Mgar, càr Dăk Lăk, plai màk gam tàm kàl tăc tus drà kă bro lơgar Lo, lơgar Mỹ mờ lơgar Canada… Ồng Nguyễn Văn Thanh Bình, Kwang lam bồ Mpồl lơh broă bal pà git, bal mờ broă tăc mờ lơgar bơdìh plai màk ris, mpồl lơh broă bal gam bơcri priă lơh hìu măi lơh gơs phan nàng bơtàu tơnguh ală bơta phan geh lơh nền nòn. “Bơdìh mờ broă tăc mờ lơgar bơdìh plai ris, mpồl lơh broă bal gam bơcri priă lơh hìu măi nàng lơh gơs phan ală bơta phan mrềt, pơr rañ mờ tơrdih dà plai màk drơng tàm broă tăc mờ lơgar bơdìh.

Mpồl lơh broă bal kung ai gùng dà broă bơtàu tơnguh ală jơi phan geh lơh nền nòn bơh plai màk bè phan neh geh lơh kơ̆t mờ tă geh nàng tơnguh uă bơta kwơ phan geh lơh bơh broă lơh sa suơn sre dê. Nàng gàr phan geh lơh kơl jăp, mpồl lơh broă bal gam tơnguh broă pơgồp bal mờ ală mpồl lơh broă bal bal mờ rề ơnàng tiah tam jrang plai màk jăt gùng dà broă lơh tơrgùm bal, drơng ai broă lơh gơs phan mờ tăc mờ lơgar bơdìh jŏ jòng in”.

Bal mờ broă lơh jăt bè bơta kwơ, khà lơh geh bal mờ bơta niam phan tăc mờ lơgar bơdìh, ală mpồl lơh sa kă bro phan geh lơh bơh broă lơh sa suơn sre tàm càr Dăk Lăk kung gơs dờng pràn tàm broă lơh gơs phan nền nòn. Jăt ồng Hoàng Danh Hữu, Củ tịc Mpồl duh broă, Kông ty Kong kơnòl nă să is kă bro phan broă lơh drơng ala Ê Đê yal, lơh gơs nền nòn dong kờl ală mpồl lơh sa kă bro lơh geh uă bơta phan kă bro, jòi geh drà kă bro phan pa, bơtàu tơnguh măt kă bro.

Ală mpồl lơh sa kă bro kơ̆p kờñ geh tus uă rơlao tai mờ ală mpồl lơh broă bal bơh ală broă hòi jà kă bro phan. Ồng Hoàng Danh Hữu tơlik nùs nhơm kơ̆p kờñ: “Bol añ kung kờñ ngan Ƀộ Lơh sa mờ măi mok Kă bro phan lơh pràn ală broă hòi jà kă bro bal mờ ală lơgar, mờ tŭ do he gam geh bơta git gơ̆p lơh broă bal mờ mpồl lơh broă bal kwơ màng tơl ală bơta, nàng lơh pràn phan ngui sa tàm hơ̆ geh kơphe lơgar Việt Nam dê tàm ală drà kă bro do ala mờ mìng cri bơyai mờ ală kơrnoăt kă bro phan khăt gơboh bal den he bơyai lơh broă bal uă rơlao nàng geh ală broă dong kờl”.

Nam 2026, càr Dăk Lăk ai jơnau kờñ geh khà priă tăc phan mờ lơgar bơdìh geh rơlao 2 tơmàn 900 tơlăk Dolar Mỹ, tơrgùm rề ơnàng drà kă bro mờ tơnguh uă bơta kwơ phan geh lơh bơh broă lơh sa suơn sre bơh broă lơh gơs phan nền nòn. Mờ nùs nhơm pràn lơh sa geh lơh tơn bơh bồ nam, mpồl bơtiàn mpồl lơh sa kă bro phan geh lơh bơh broă lơh sa suơn sre càr dê gam ai tơngŏ loh làng broă lơh uă ngan, bơ̆t bơtàu măt phan kă bro mờ ai phan geh lơh bơh broă lơh sa suơn sre càr Dăk Lăk tus ngài rơlao tàm drà kă bro ală lơgar dê. Bơta do pơgồp bal tơnguh uă priă geh ai làng bol, mpồl lơh sa kă bro mờ lơh pràn broă bơtàu tơnguh lơh sa mpồl bơtiàn càr dê, wèt tus khà gơguh lơh sa bàr sồ tàm tơngai lơh broă tus.