Jơnau yal geh bơh Sờh Lơh kơnòl Dơlam is càr Lâm Đồng pà gŏ, tus ngai 06 nhai 1, sờh do neh dờp geh jơnau yal bè priă nhai, priă pơn jờng Satềp bơh 229 mpồl lơh sa kă bro, mpồl lơh broă ngui cau lơh broă gam lơh broă tàm càr do, mờ kờp jơh rơlao 19 rơbô 800 nă cau lơh broă.

Đơs bal, ală mpồl lơh sa kă bro neh lơh tơl ală kơrnoăt tàm adăt boh lam dê bè priă nhai, priă pơn jờng ai cau lơh broă in. Gơwèt mờ priă pơn jờng Satềp nam pa Bính Ngọ 2026, tŭ do geh 116 tàm 229 mpồl lơh sa kă bro yal geh priă pơn jờng ai cau lơh broă in. Tàm hơ̆, mpồl lơh sa kă bro cau dùl nă să lơh is pơn jăt tai geh bơta niam tŭ geh dùl mpồl lơh sa kă bro yal geh priă pơn jờng 180 tơlăk đong tàm 1 nă cau lơh broă, do là khà priă uă ngan gùt càr dê. Mơya kung geh mpồl lơh sa kă bro tàm mpồl do pơn jờng ờ uă ngan, mìng 200 rơbô đong.