Ngai òr (16/03), tàm Hà Nội, ală kwang geh jơng Ƀộ Cíñ trị, Ƀộ trưởng Ƀộ Cribơyai broă mờ lơgar ndai ồng Lê Hoài Trung, Ƀộ trưởng Ƀộ Ling klàng ồng Phan Văn Giang mờ Ƀộ trưởng Ƀộ Kwang àng ồng Lương Tam Quang neh bal mờ Ƀộ trưởng Ƀộ Cribơyai broă mờ lơgar ndai lơgar Lo ồng Vương Nghị, Ƀộ trưởng Ƀộ Ling klàng lơgar Lo ồng Đổng Quân mờ Ƀộ trưởng Ƀộ Kwang àng lơgar Lo ồng Vương Tiểu Hồng đơng lam Pơrjum dơ̆ dùl Tìp mat tơm bơh bơr broă kuơmàng “3+3” kâp Ƀộ trưởng Ƀộ cribơyai broă mờ lơgar ndai, Ling klàng mờ Kwang àng Việt Nam - Lo.

Tàm pơrjum, bàr gah ring bal sền sơ wì bè gùng dà bơtàu tơnguh niam jat broă rơndap lơh “6 rlau” bơh git gơp Việt Nam - Lo dê tàm tơngai lài. Tam pà bal bè ală broă gơlik geh mhar ngan, kal ke bơh broă tàm dunia, ală lơgar rềp bal tàm tơngai lài, 2 gah ring bal đơs là, broă 2 lơgar sơlơ tơnguh tai tam klac bal, lơh broă bal, gàr kơ̆ bơta pin dờn cíñ trị, đơng lam pơgồp bal ală bơta đah bơtàu tơnguh mờ lơngăp lơngai, kơ̆ dơn jat gùng sàh hội củ nghĩa, pơgồp bal mờ mpồl bơtiàn ală lơgar drơng mờ ală bơta lòng bal bè lơngăp lơngai mờ bơtàu tơnguh jat bơnàng jă dipal mờ adat boh lam ală lơgar mờ Sơnua boh lam Liên hợp quôk ngai sơlơ gơ gơs jal mhar rlau. Pe Ƀộ trưởng đah lơgar Lo đơs nền, Lo sền dờng màng mờ crăp rơcang bal mờ Việt Nam pơlam lơh jat jơnau git wă bal kâp dờng, bơsram đòm jat bal mờ gơp, tam pà bal mờng chài bè bơt bơtàu Đảng, atbồ dà lơgar, sền gàr kơ̆ gơnoar kuơ lơngăp lơngai mờ bơtàu tơnguh bơh tơl lơgar dê.