Tàm Tơngleh sơn đờm lơh Nam Lòt nhơl Dà lơgar 2026 geh bơyai lơh tàm lồi nhai 3 pa do, càr Gia Lai chờ wă rò git nđờ jơ̆t rơbô nă cau năc tàm lơgar mờ lơgar bơdìh tus nhơl sền mờ ơm rơlô să. Bơta niam tìp bal mờ lơh chờ geh uă bơta àng gơcrà niam mờ mpồl broă lơh uă bơta: bơh Pơrjum cri bơyai Bơtàu tơnguh Lơh sa Lòt nhơl càr Gia Lai 2026, pơrjum hòi jà bơcri priă, ală broă lơh tìp bal ală lơgar, tus mờ ală broă đơs crih tamya bal mờ broă lơh đơs crih dờng nggồr niam. Ală broă lơh do nàng geh uă bơta niam gơwèt mờ cau năc dê, pơgồp bal tàm broă ai càr Gia Lai gơs tiah tus pơnrơ ngan bơh Nam Lòt nhơl Dà lơgar dê. Bơyô Lê Thanh Phương Hạ, cau năc tus bơh ƀòn drà jăt gah dà lềng Nha Trang, càr Khánh Hoà pà git: “Oh bơh tàm Nha Trang tus, mùl màl là dơ̆ sơnrờp oh gŏ tiah tàm Gùl he dê bơh lài tus tŭ do geh dùl concert dờng bè do, den tàng oh pal lòt sền. Oh lòt mờ rơndeh Honda bơh Nha Trang tus tàm do roh rơlao 4 jơ nggùl, mơya chờ hờp ngan tŭ tus càr Gia Lai”.

Tàm tơngai tus lòt nhơl sền tàm lơgar Việt Nam, ồng Roman, cau năc tus bơh lơgar Nga tus bal mờ nùs nhơm chờ hờp bơh Poh sơn đờm lơh Nam Lòt nhơl Dà lơgar 2026 tàm càr Gia Lai dê. Tàm bơta niam dà lềng – bơnơm geh uă bơta niam chài ù tiah dê, ồng Roman pà git, dơ̆ lòt do neh lời wơl tàm nùs nhơm ồng bal mờ mpồl cau năc tus bơh lơgar Nga geh ală bơta niam krơi is ngan: “Ồng neh lòt tus uă tiah tàm lơgar Việt Nam bè Đà Nẵng, Nha Trang, mơya ồng pà git tàm ală tiah hơ̆ hăt ngan cau. Dơ̆ do ồng tus tàm càr Gia Lai gơlơh nùs nhơm chờ hờp lơngăp lơngai mờ niam bơnĕ mờ gam bè ờs ngan. Kwơ màng, tus di tàm Nam Lòt nhơl Dà lơgar neh lơh dơ̆ lòt nhơl bơh ồng dê sơlơ geh kwơ màng rơlao”.

Pơn jăt tai bơta tơngŏ jiam bơh dơ̆ sơn đờm lơh, tàm quý II nam 2026, càr Gai Lai pơn jăt tai lơh pràn hòi jà yal tàm ală dơ̆ ràng tơlik drà kă bro phan dờng tàm Hà Nội mờ ƀòn dờng Hồ Chí Minh. Mờ càr Gia Lai kung rơ̆p bơyai lơh ală broă lơh nàng lơh geh bơta tơngŏ ai Nam Lòt nhơl Dà lơgar 2026 in, pal kah ngan rơ̆p geh bơyai Lơh chờ đơs crih tamya ală lơgar (K-Pop), ai geh tơngŏ pa ngan, lơh pa ai pang rùp lòt nhơl in. Bal mờ hơ̆, Festival ală lơgar cing mồng Tây Nguyên rơ̆p là broă lơh geh pơnrơ ngan, geh uă bơta niam chài brê bơnơm dờng dê.

Ƀộ trưởng Ƀộ Niam chài Tàp pràn să jan mờ Lòt nhơl ồng Nguyễn Văn Hùng đơs niam broă lơh mpồl lơh broă mờ kơ̆p gơn Nam Lòt nhơl Dà lơgar rơ̆p lơh geh bơta pràn ai lòt nhơl càr Gia Lai in. “Mờ 244 broă lơh geh bơyai lơh sùm tàm nam 2026. Nàng Nam Lòt nhơl Dà lơgar rơ̆p gơs dùl bơta tờm lơh pràn broă yal bè dùl rùp rài Gia Lai pa, ñhăp ñhar, đềt mềr, geh uă bơta pràn, tơnguh broă pơgồp bal tiah jăt mpồl geh kwơ, hòi jà cau bơcri priă kwơ màng tàm lòt nhơl, lơh gơs ală phan lòt nhơl krơi is, niam uă mờ geh bơta pràn tàm pơrlòng ală lơgar dê”.

Càr Gia Lai ai jơnau kờñ wă geh di pơgăp 15 tơlăk dơ̆ cau năc, mờ priă geh bơh lòt nhơl di pơgăp 35 rơbô tơmàn đong tàm Nam Lòt nhơl Dà lơgar 2026 dê. Do kung là dơ̆ niam nàng càr Gia Lai lơh geh tiah rùp rài tiah lòt nhơl, lơh pràn broă pơgồp bal tiah mờ bơtàu tơnguh jăt gùng dà broă lơh kơl jăp. Ồng Phạm Anh Tuấn, Củ tịc Anih duh broă Làng bol càr Gia Lai đơs nền tus mờ jơnau kờñ lơh ngan bơh càr dê. “Càr Gia Lai hơ rơ̆p bơyai lơh geh cồng nha Nam Lòt nhơl Dà lơgar 2026 mờ nùs nhơm lơh jăk chài ngan, lơngăp lơngai, đềt mềr, geh uă bơta niam chài nàng tơl nă cau năc tus ndrờm gŏ geh nùs nhơm song dơ pă, krơi is mờ kờñ kah ngan. Bol añ pin dờn là, bơh broă lơh ngai do, càr Gia Lai pa rơ̆p brồ să gơs tiah tus niam bơnĕ, tiah tơrgùm bal, tơrbŏ bal, lơh geh uă ală bơta niam chài mờ lòt nhơl krơi is lơgar Việt Nam bal mờ tàm tiah do dê”.

Nam Lòt nhơl Dà lơgar 2026 tàm càr Gia Lai lơh geh sùm mờ mpồl ală broă lơh nggồr niam tus gùt nam. Bơh ală broă lơh niam chài geh uă bơta niam brê bơnơm dờng tus ală broă lơh gùng đơs crih tamya, lòt nhơl pa ndrờm mờ ală lơgar dê, càr Gia Lai gam rơhời mŭt bơ̆t bơtàu rùp rài dùl tiah tus pa niam, geh uă broă kờñ nhơl sền. Mờ broă tus bal bơh gơnoar atbồ, mpồl lơh sa kă bro bal mờ mpồl bơtiàn dê, càr Gia Lai kơ̆p gơn lơh geh uă bơta pràn tàm broă hòi jà cau năc lòt nhơl tus, mờ ai geh bơta tờm nàng lòt nhơl gơs gah lơh sa kwơ màng, pơgồp bal tàm broă ai ù tiah tơrgùm bal bơnơm dà lềng gơs tiah tus niam bơnĕ ngan tàm pang sră rùp lòt nhơl lơgar Việt Nam mờ ală lơgar dê.