Dùl poh lài mờ ngai Noel, tàm bơta mìu sơr ngan, tàm ƀlàng hìu yàng ( hìu jum) Mằng Lăng, làng bol jat yàng bàp bal mờ gơp pơs wàs, bơka rơgồng lŭ, tờm nho Noel mờ ală phan ngui lơh mờng kwèng ngan. Ồng Nguyễn Thanh Toán, làng bol tàm thôn Ngân Sơn pà git: “Nam do lơh ờ wil tơl bè pah nam tài gơtìp hoàc huơr kơn jơ̆ kơn jut ngan den tàng lơh dềt lơm tàm hìu jum. Kung geh tờm nho Noel, geh đèng, hơ̆ sồng rùp yàng Jesu gam dềt, mè yàng dê, bèp ròng Giu se. Tàm hìu den he kung bơkah rơgồng lŭ dềt rlau tềng bồ đap hìu”.

Gơ wèt mờ uă hìu bơnhă, pal kờñ geh tŭ tơngai jŏ tai den hơ̆ sồng gơtùi bơsong jơnau gơ lời wơl tơnơ̆ dà tih dà lìu dờng ngan, mơya tus ngai Noel do, ală hìu bơnhă neh geh bơta kơljap bè ờs bơh chờm. Ồng Nguyễn Văn Sen, ơm tàm thôn Hội Tín yal, hìu bơnhă ồng dê gơtìp dà cò pơr dồ ndrờm bè jơh tơn phan bơna, phan ròng 4 jơng mờ phan tam. Mơya geh yàng sền gàr, ƀòn lơgar dong kờl, gơnoar atbồ tam pà bal, Noel nam do kung gam ram mhŭ ngan: “Bulah kal ke bè hơ̆, mơya Noel nam do ram mhŭ ngan, geh nùs nhơm niam kòn bơnus dê mờ bơta sền gàr bơh yàng dê cèng wơl ai mpồl bơtiàn in, geh bơta pơn dờm pơnđiang dờng ngan. Kơp kờñ jơh tơl nă cau sơlơ kờñ gơboh gơp sơrlèt gan bơta kal ke”.

Geh bal nùs nhơm bè do sơl, bi Phan Văn Tuyền ơm tàm thôn Hội tìn pà git, bơta kơp kờñ dờng ngan rlau jơh bơh bi mờ làng bol dê tàm nam do là geh ring lơngai. Tơnơ̆ ală bơta kal ke bè nùs nhơm tài trồ tiah lơh aniai, cau lơi kung hòi dan tơl nă cau gờñ gơ rê wơl rài kis bè ờs: “Dà tih dà lìu gơ rềng uă ngan tus broă lơh sa, nùs nhơm cau dê. Noel nam do ngan là tơl nă cau rơp hòi dan bơta lài ngan là geh ring lơngai, tơnơ̆ hơ̆ là nting bơr tơl nă cau gờñ rê wơl rài kis bè ờs”.

Jat Bèp yàng Phero Võ Thanh Nhàn, atbồ ƀòn jat yàng bàp Mằng Lăng, jơh gùt ƀòn jat yàng bàp geh 527 hìu bơnhă mờ mờr 1 rbô 560 nă cau jat yàng bàp, ơm rah rài tàm ală sàh Tuy An Đông, Tuy An Bắc mờ dùl bơnah Tuy An Tây. Dơ̆ dà tih dà lìu pơa do neh lơh jơh ală hìu bơnhă gơtìp hoàc huơr lơm. Bè hơ̆ den tàng Noel nam do ală hìu bơnhă mìng bơka dồ êt, tơrgùm dong kờl gơp sơrlèt gan kal ke. Ƀòn jat yàng bàp sền gròi tus broă tàm tơrbŏ bal mờ ală mpồl lơh broă niam dong làng bol jat yàng Bàp gờñ bè ờs wơl rài kis: “Noel nam do là Noel mờ bol hi kờñ đơs là, bulah bol hi gơtìp uă ngan kal ke tài càl rbut dờng dà tih dà lìu, dong khi geh dùl nùs tồr kơ̆ dơn nàng sơrlèt gan jơh ală kal ke. Đơs jat bơta pin dờn den bol hi gŏ là, tơl bơta lòng ndrờm geh bơta dut ndơl, dilah bol he geh dùl bơta pin dờn kơ̆ kơljap den rơp sơrlèt gan tơl bơta lòng bơh rài kis dê”.

Sap tiang liang hìu jum Mằng Lăng mpong ntas tàm ù tiah ngềt ngơt bơh ƀòn lơgar càr Dăk Lăk dê pal lòt gan càl rbut dờng dà tih dà lìu. Noel tàm Mằng Lăng nam do ờ gơ klŏ gơ crà àng đèng dê, ờ gal, ờ hô hơng bè pah nam, mơya gơ bềng lìu gơtha kuơmàng. Hơ̆ là ngai Noel bơh bơta tềm pềr, bơh nùs nhơm kòn bơnus, bơh bơta pin dờn geh sòl pơnđàng tàm bơta kal ke, nàng bơh hơ̆, làng bol jat yàng bàp bal mờ gơp ntàu guh wơl, wèt hờ rài kis ring lơngai rlau hờ bồ đap.