Drim ngai 1/4, geh bơyai lơh Pơrjum yal ală jơnau lơh nền bơh Ƀộ Cíñ trị dê bè gơnoar broă, kơnòl broă, rơndăp mpồl kwang bàng, lơh nền tàm jàu, pồ cau lam bồ bơh Anih Sơñio rùp Việt Nam, Anih Jơnau đơs Việt Nam, Anih yal tơnggĭt jơnau Việt Nam, Anih kơlôi sơnơng Jak chài mpồl bơtiàn Việt Nam, Anih kơlôi sơnơng Jak chài mờ măi mok Việt Nam là anih lơh broă gơwèt Cíñ phủ tus là mpồl lơh broă broă lơh bơh Mpồl duh broă Đảng dà lơgar dê mờ ală jơnau lơh nền geh gơrềng. Pơrjum nàng kờñ lơh ngan ngồn Jơnau lơh nền tàm pơrjum sồ 03 ngai 25/3/2026 bơh Mpồl duh broă Đảng Dà lơgar khoă XIV dê.

Tàm pơrjum, ala mat Mpồl rơndăp broă Dà lơgar neh yal ală jơnau lơh nền bơh Ƀộ Cíñ trị dê, tàm hơ̆ tàm jàu broă, pồ ồng Đỗ Tiến Sỹ, Kwang bàng Đảng Dà lơgar at gơnoar broă Kwang lam bồ dờng Anih jơnau đơs Việt Nam, mơkung at gơnoar broă Phó Lam bồ Mpồl Mblàng yal Bơto bơtê mờ Hòi jà Làng bol Dà lơgar, mut bal tàm Mpồl duh broă, Mpồl Lơh kơnòl broă sùm Đảng ủy ală anih lơh broă Đảng dà lơgar tơngai lơh broă bơh nam 2025-2030.

Đơs sồr lơh tàm pơrjum, Duh broă sùm Mpồl đơng lam Đảng ồng Trần Cẩm Tú sồr ală anih lơh broă sră ƀăo pơn jat tai lơh jat niam gơnoar tờm tàm broă lơh bồ tơngoh, tơnguh uă bơta niam pơlam gùng dà mpồl bơtiàn, rcang lài tam dră ờ dờp ală nùs nhơm tìs mờ nùs nhơm ngăc ngar ngan, ờs mờng ngan. Đơs tàm pơrjum, Thủ tướng ồng Phạm Minh Chính đơs sùm sồr gàr kơ̆ tam klăc bal, lơh jat niam cồng nha lơh geh, lơh sir niam ngan kơnòl broă geh jàu. Broă pồ tơl kwang bàng dơ̆ do geh gơtha kwơ màng, pơgồp bơnah tơnguh uă cồng nha gơtùi đơng lam bồ, geh cồng nha lơh broă bơh ală anih lơh broă sră ƀăo, kơlôi sơnơng jak chài tờm ngan dê.