Pơgru cau kòn cau K’ Ho sơnđan Ka Duys neh geh 6 nam bơto tàm Hìu bơsram kấp bàr Tân Thượng, sàh tiah ngài Đinh Trang Thượng dê. Bơto môn Ngữ văn tàm hìu bơsram geh rơlao 95% kơnòm bơsram là kòn cau K’ Ho, pơgru sền gŏ dùl bơta krơ is: uă kơnòm bơsram git sền, git cih dà yoan mơya ờ git sền, ờ git cih dà đơs mè deh dê. Bơh nùs nhơm kơlôi rơcang hơ̆, nam 2022, geh Mpồl Atbồ hìu bơsram kờñ bal, pơgru Ka Duys bơyai lơh pờ ơdŭ bơto dà kòn cau K’ Ho sơnrờp ngan tàm hìu bơsram mờ 40 nă kơnòm bơsram ơdŭ 7. Lài ngan là bơto akhar cih, tơnơ̆ mờ hơ̆ pơgru jòi tus mờ ală cau chài tàm tiah do nàng bơsram tàm broă dròng cing, tamya xoang hơ̆ sồng ai jơnau git wă hơ̆ mŭt tàm ală broă lơh ai kơnòm bơsram in.

Pơgru Ka Duys pà git, ală tŭ bơto ờ mìng dong kờl sền, cih git jơnau đơs dà kòn cau K’ Ho mờ gam wă rơlao tai bơta niam chài jơi bơtiàn dê. “Là cau kòn cau K’ Ho añ gŏ tŭ do di lah ờ gàr bơta niam chài jơi bơtiàn dê den tơnơ̆ do rơ̆p roh jơh. Bơh ală broă lơh dềt bơh ală bơyô kơnòm bơsram dê kung là ală sơnpòl ồs nàng ală kơnòm bơsram in gơtùi git ală bơta kwơ niam chài, ală kơnòm bơsram gơtùi git ală jơnau git wă hơ̆ nàng prăp gàr bơta niam chài ờs mờng kòn cau K’Ho dê”

Tàm ală hìu bơsram tiah làng bol jơi bơtiàn ờ gal cau tàm càr Lâm Đồng, uă cau pơgru kung gam jòi tơl bơta nàng bal mờ kơnòm bơsram bơh ală broă lơh mùl màl. Pơgru Nguyễn Thị Hương Giang, Atbồ mìng dùl môn, Hìu bơsram kấp pe Phan Đình Phùng, sàh Dam Rong 3 đơs là, nùs nhơm kờñ gơboh mờ kơnòm bơsram geh ai bơh broă rơcang lài nền nòn tơl jơnau mblàng, jơh nùs tàm tơl broă bơto.

Nam bơsram pa do ală kơnòm bơsram tàm hìu bơsram geh pơgru Giang bơto neh geh 9 khà kơnòm bơsram jăk kấp càr bal mờ 4 tơngu me geh khà STEM kấp hìu bơsram. “Añ geh nùs nhơm kờñ gơboh mờ kơnòm bơsram den hơ̆ sồng gơtùi pờ gùng nàng ai ală kơnòm bơsram in gơtùi. Gơwèt mờ kơnòm bơsram kal ke den ờ mìng bơto tàm sră măi mờ añ gam plam kơnòm bơsram lòt tàm mùl màl jăt gah dà dờng Krông Nô nàng ală kơnòm bơsram bơsram geh ală bơta niam, ù tiah, dà dê. Añ đơs là bŭ lah gơtìp kal ke kàr lơi den pơgru bal mờ kơnòm bơsram ndrờm pal lơh ngan bơto jăk mờ bơsram jăk”.

Gơwèt mờ ală cau pơgru tàm tiah kal ke, nùs nhơm kờñ gơboh mờ kơnòm bơsram ờ mìng là sền gròi tus tơl khà điểm. Hơ̆ gam là broă jòi tơl bơta nàng ală kơnòm bơsram bañ sơrbì bơsram, dong kờl ală kơnòm geh rài kis kal ke pơn jăt tai lòt bơsram, ai geh bơta niam nàng kơnòm bơsram jơi bơtiàn ờ gal cau pin dờn ai tơngŏ bơh să tờm dê. Nùs nhơm hơ̆ kung geh pơgru Nguyễn Quốc Huy, Bí thư Chi bộ, Abồ hìu bơsram kấp pe Nguyễn Trường Tộ, sàh Tân Hải lơh jăt sùm tàm 22 nam bơto sră. Pơgru neh geh 5 dơ̆ geh khà pơn jờng Chiến sĩ thi đua cơ sở. Gơwèt mờ pơgru Huy, bơta kwơ màng ngan là bơ̆t bơtàu geh dùl hìu bơsram mờ kơnòm bơsram kờñ tus pah ngai.

Bơh broă atbồ, boh bơr bơh kwang bàng, cau pơgru tus mờ broă iăt nùs nhơm jơnau kơ̆p kờñ kơnòm bơsram dê ndrờm bal wèt tus dùl tiah bơsram sră niam. “Wa Hồ sùm bơto he bè nùs nhơm kờñ gơboh kòn bơnus. Hìu bơsram gơboh gơbài là anih nùs nhơm niam bơnĕ geh ai tơngŏ jơh. Kwang bàng atbồ den sùm git iăt ală jơnau đơs bơh ală cau pơgru dê. Cau pơgru den wă nùs nhơm bơh ală kơnòm bơsram. Bơsram Wa Hồ là lơh geh dùl tiah niam làng bol lơh tờm den hơ̆ sồng ală jơnau đơs geh git bal, hơ̆ là bơta tờm bơh bơta niam chài hìu bơsram kơl jăp dê”.

Bơh broă bơto sră, bơto jơnau git wă tus mờ broă prăp gàr jơnau đơs, bơta niam chài jơi bơtiàn mờ bơ̆t bơtàu hìu bơsram niam bơnĕ, ală cau pơgru tàm tiah ngài càr Lâm Đồng gam lơh is nàng sih ală “gar sơntìl” ngăc ngar mờ pin dờn ai kơnòm bơsram in. Pah tŭ bơto tàm ơdŭ, tơl broă lơh ha là broă sền gròi tus tơl rài kis kơnòm bơsram dê ndrờm pơgồp bal tàm broă dong kờl ală kơnòm bơsram kờñ gơboh mờ hìu bơsram, kờñ gơboh mờ bơta niam chài krơi is jơi bơtiàn mờ pin dờn mŭt tàm rài tơnơ̆ do dê.