Ơ bi Y Khăm Ta Niê, mờ gơnoar broă là Ƀí thư Ci ƀộ ƀòn tiah làng bol jơi bơtiàn ờ gal cau den bơta lơi là bơta tờm dong kờl bi gàr kơ̆ nùs nhơm cíñ trị mờ tơnguh bơngă pin dờn, lam lài nàng tơrgùm, tam klăc bal ală cau geh đảng bal mờ làng bol tàm ƀòn bi dê?

Ƀí thư Ci ƀộ Y Khăm Ta Niê: “Gơwèt mờ añ, bơta tờm nàng gàr kơ̆ nùs nhơm cíñ trị mờ lơh geh bơngă pin dờn tàm làng bol jơi bơtiàn ờ gal cau là nùs nhơm pin dờn làng bol dê. Nùs nhơm pin dờn hơ̆ ờ gơtùi geh is, mờ geh bơ̆t bơtàu bơh jơnau đơs gơlòt bal mờ broă lơh, sùm lam lài tàm rài kis, lơh broă, lơh jăt gùng dà broă lơh bơh Đảng, adăt boh lam bơh Dà lơgar bal mờ bơhiàn ờs mờng niam bơnĕ ƀòn lơgar dê. Là Ƀí thư Ci ƀộ tiah làng bol jơi bơtiàn ờ gal cau, añ git broă pal đềt mềr mờ làng bol, wă nùs nhơm làng bol, tam pà bal ală bơta kal ke drơng broă lơh broă sa, rài kis làng bol in den hơ̆ sồng bơngă pin dờn geh bơ̆t bơtàu. Bơh tŭ hơ̆, tơrgùm cau geh đảng bal mờ làng bol tam klăc bal, dùl nùs bal bơ̆t bơtàu ƀòn lơgar, ngai sơlơ bơtàu tơnguh, pas gơs mờ niam bơnĕ”.

Ơi, bơh tàm broă lơh mùl màl đơng lam Ci ƀộ ƀòn A1 dê lơh gơs jăk chài kơnòl broă bơh uă nam tơn, jăt bi kơlôi bơta lơi là broă lơh geh cồng nha ngan tàm broă tam gơl pa, tơnguh uă bơta niam tàm broă pơrjum Ci ƀộ, nàng Jơnau lơh nền bơh Đảng dê mùl màl mŭt tàm rài kis?

Ƀí thư Ci ƀộ Y Khăm Ta Niê: “Bơh tàm mùl màl broă đơng lam Ci ƀộ ƀòn A1, añ đơs là broă lơh geh cồng nha ngan nàng tam gơl pa mờ tơnguh bơta niam pơrjum Ci ƀộ jăt mờ nùs nhơm jơnau sồr sồ 50 bơh Dà lơgar dê là ai broă pơrjum Ci ƀộ pơgồp bal mờ rài kis mùl màl bơh ƀòn lơgar dê. Ci ƀộ ờ bơyai broă lơh ờ geh cồng nha mùl màl mờ tơrgùm tàm ală broă lơh mùl màl bè tơrmù rơƀah, lơh hìu ơm, gàr niam bơta lơngăp lơngai, prăp gàr bơtiàn niam chài, bơtàu tơnguh rài kis broă lơh sa. Jơnau lơh nền tàm pơrjum bal loh làng, loh broă, loh cau, loh tŭ tơngai, lo cồng nha, broă pơrjum pal geh sền, geh jơnau đơs pơgồp bal, tơnguh nùs nhơm lơh tờm tàm broă pơrjum. Pơlam cau geh đảng khin tàm broă cri bơyai, đơs di, đơs song, đơs ngan. Pơgồp bal broă pơrjum Ci ƀộ mờ mblàng yal mờ broă lơh di pal mờ làng bol jơi bơtiàn ờ gal cau nàng Jơnau lơh nền tàm pơrjum dê mùl màl mŭt tàm rài kis”.

Ơi, di bè hơ̆, ală mpồl dròng cing ha là mpồl ròng kơnrồ mpồl bơtiàn bal mờ ală broă lơh broă sa ndai neh lơh gơrềng tus bè lơi tàm broă tam gơl bồ tơngoh kơlôi sơnơng, broă lơh bơh làng bol dê. Mờ gơnoar broă bơh Ci ƀộ dê tàm broă pơgồp bal bơ̆t bơtàu Đảng mờ bơtàu tơnguh lơh sa mpồl bơtiàn bal mờ ƀòn lơgar neh ai tơngŏ bè lơi ơ bi?

Ƀí thư Ci ƀộ Y Khăm Ta Niê: “Ală broă lơh bè mpồl dròng cing, mpồl lơh broă bal ròng kơnrồ neh lơh geh bơta tam gơl loh làng tàm bồ tơngoh kơlôi sơnơng làng bol dê. Bơh tàm broă ơm kơ̆p broă dong kờl tus mờ broă rơcang pơgồp bal, lơh broă bal, dờp bơta geh bal. Bơh mpồl dròng cing, làng bol gŏ geh bơta kwơ niam chài ờs mờng ờ mìng nàng prăp gàr bơta niam chài mờ gam pơgồp bal tàm broă tơnguh uă rài kis nùs nhơm, yal rùp rài ƀòn lơgar. Mpồl lơh broă bal ròng kơnrồ dong kờl làng bol tam gơl broă lơh sa dềt ờ pràn tus mờ broă lơh sa bal, git kơlôi sơnơng tàm broă tềp pềr, brồ guh lơh pas. Gơnoar bơh Ci ƀộ dê ai tơngŏ loh làng tàm gùng dà broă lơh, tề lam, lơh cau pơlam ală broă lơh, tam pà cau geh đảng drơng broă tơn tus bal lơh. Bơh tŭ hơ̆ pơgồp bal broă bơ̆t bơtàu Đảng mờ bơtàu tơnguh lơh sa mpồl bơtiàn, tơnguh nùs nhơm pin dờn bơh làng bol dê tàm broă đơng lam bơh Đảng tàm ƀòn lơgar”.

Ơi, geh jờng rơ di tàm dơ̆ tơnkah 96 nam Ngai crơng gơs Đảng, bi kờñ geh jơnau yal lơi tus mờ rơnàng kơnờm să, cau geh đảng kơnòm să tàm tiah làng bol jơi bơtiàn ờ gal cau, tàm ală tiah nhàr lơgar bè lơi?

Ƀí thư Ci ƀộ Y Khăm Ta Niê: “Geh jờng rơ di tàm dơ̆ tơnkah Ngai crơng gơs Đảng là bơta pơnyờ să dờng màng ngan mờ kung là kơnòl broă uă ngan sơl. Añ kơ̆p kờñ pơyoa tus rơnàng kơnòm să, cau geh đảng tàm tiah nhàr lơgar, tiah làng bol jơi bơtiàn ờ gal cau jơnau yal là pal ròng siam nùs nhơm bồ tơngoh kis niam, jơnau kơ̆p kờñ brồ guh bơh tàm ƀòn lơgar tờm mờ he ơm kis. Bañ kơlôi là tiah kal ke là gơtìp ờ pràn mờ pal sền hơ̆ là tiah kis nàng bơsram tàp să tờm dê, lơh broă, gơs dờng pràn. Să jan gam kơnòm, cau geh đảng pal khin kơlôi, khin lơh, khin dờp kơnòl, tus bal bơsram sră, gàr niam bơta chài rơgơi jơi bơtiàn dê, lam lài tàm broă bơtàu tơnguh lơh sa, sền gàr lơngăp lơngai tiah nhàr lơgar, bơ̆t bơtàu ƀòn lơgar ngai sơlơ pas gơs, niam bơnĕ, gơguh jăk. Hơ̆ là broă lơh mùl màl ngan nàng di pal ngan mờ gơnoar broă jăk chài pràn kơl dang Đảng dê”.

Ơi, dan ưn ngài bi Y Khăm Ta Niê, Ƀí thư Ci ƀộ ƀòn A1, sàh Ea Súp, càr Dăk Lăk.