Tàm tiah lơh Rơndăp broă lơh gùng bơh Gùng 40B sàh Tu Mơ Rông (gơwèt kơnhoàl Tu Mơ Rông, càr Kon Tum lài do dê) lòt tus thôn 8, sàh Đăk Pxi (gơwèt kơnhoàl Đăk Hà, càr Kon Tum lài do), tŭ do là càr Quảng Ngãi, nùs nhơm lơh broă geh bơyai lơh jal mhar ngan. Bơh trồ rơ̆p àng drim gờñ tus trồ rơhiơm mho, măi mok lơh broă sùm, cau lơh broă lơh jăt tŭ tàm ala bal, ai geh nùs nhơm lơh broă duh hồl ngan tơn bơh tàm ală ngai bồ nam pa. Rơndăp broă lơh do kờp jơh khà priă bơcri 220 tơmàn đong, ngui kes priă Dà lơgar dong kờl mờ kes priă càr dê, mờ jòng rơlao 8 kơi sồ 300 thơ̆k. Tàm hơ̆ gơl gùng 800 thơ̆k lòt gan Gùng 40B geh lơh ơnàng, gơl gam tai lơh pa. Tŭ lơh gơs, gơl gùng do rơ̆p tơrbŏ bal sàh Tu Mơ Rông mờ sàh Đăk Pxi, pơgồp bal tàm broă bơtàu tơnguh lơh sa mpồl bơtiàn, gàr niam dà lơgar, lơngăp lơngai, mờ lơh geh cồng nha bă ù bal mờ lơh geh ală ƀòn ơm kis jăt gah gùng lòt.

Tus tŭ do, khà broă lơh bơnàng gùng geh di pơgăp 45%; neh lơh gơs broă dă lŭ tus nggùl bơnah gùng pleh bơh gùng 40B dê. Cau tờm lơh hòi jà mờr 60 nơm rơndeh bal mờ di pơgăp 80 nă cau lơh, bơyai lơh uă mpồl lơh broă dơ̆ lĕ lơh bal, lơh ndrờm bal mờ ală khà broă bè tờ bơnàng gùng, lơh brong tơlik dà, bơ̆t ù jăt gah gùng mờ lơh jơnang kơrian ù bồr. Ồng Phan Ngọc Duy, đơng lam tiah lơh rơndăp broă lơh Gùng 40B sàh Tu Mơ Rông lòt tus thơn 8 sàh Đăk Pxi, càr Quảng Ngãi pà git, mpồl lơh broă gam lơh di pơgăp 10 mpồl cau lơh, ai lài lơh ală gơl gùng tam tìp bal mờ gơl gùng tờm 40B nàng gàr niam broă lòt rê làng bol in. “Jăt broă lơh bal neh geh kĭ, tơngai lơh rơndăp broă do là 900 ngai. Mơya, cau tờm lơh ai jơnau kờñ tơnguh pràn broă lơh, lơh ngan lơh gơs khà broă geh ai sơrlèt mờ tơngai neh geh ai. Ù tiah lơh gùng ờ gơtìp kal ke, mìng là broă tam pà gùng lòt pal gàr niam nàng làng bol in lòt, tài tàm gơl gùng pa do geh uă ngan lơh jăt gùng tŭ do gam geh lơh”.

Gam tàm sàh Đăk Pék, càr Quảng Ngãi (gơwèt kơnhoàl Đăk Glei, càr Kon Tum lài do), bàr rơndăp broă lơh phan bơna gùng lòt tờm gam geh lơh là Rơndăp broă lơh Gùng bơh tiah tàm gùl ƀòn drà dềt Đăk Glei lài do tus tiah tờm sàh Xốp, kơnhoàl Đăk Glei lài do (tŭ do là sàh Xốp, càr Quảng Ngãi) mờ rơndăp broă lơh Rơbàng 16 nhai 5. Rơndăp broă lơh Gùng bơh tiah tàm gùl ƀòn drà dềt Đăk Glei lài do tus tiah tàm gùl sàh Xốp jòng rơlao 17 kơi sồ, lơh jăt gùng lòt ƀòn lơgar kấp A, gùng ơnàng 6 thơ̆k nggùl. Broă do geh lơh bơh nhai 12 nam 2024 tus nhai 12 nam 2026, tŭ do neh lơh geh di pơgăp 10% bơta kwơ broă lơh bal, tŭ do gam tơrgùm cò pơn ring gùng.

Rơndăp broă lơh Rơbàng 16 nhai 5 kờp jơh priă bơcri rơlao 86 tơmàn đong, tàm hơ̆ geh rơbàng mờ gùng lòt bàr bồ rơbàng jòng 648 thơ̆k. Tus tŭ do khà broă lơh geh rơlao 75% khà bơta kwơ lơh broă bal. Mpồl lơh neh hòi jà 3 nơm măi tờ, 2 nơm măi lơh sơn tăp ù mờ di pơgăp 20 nă cau lơh broă bơyai lơh broă sùm. Ală khà broă tờm tàm rơcàng do neh geh lơh gơs, tŭ do tơrgùm lơh gùng pơlam mờ lơh gơs ală khà broă ndai, lơh ngan geh dă cài, crăp ồs đèng àng nàng ai rơndeh lòt lài mờ Satềp tus do. Mò Nguyễn Thị Thương, Củ tịc Anih duh broă Làng bol sàh Đăk Pék, càr Quảng Ngãi pà git: “Gơwèt mờ rơndăp broă lơh rơcang ngai 16 nhai 5, khà broă lơh neh geh lơh di pơgăp 80% bơta kwơ lơh broă. Sàh sền gròi mpồl lơh rơbàng nàng sồr lơh, tơnguh cau lơh broă, phan lơh broă, mờ lơh pràn broă tơm ntrờn ù tiah nàng geh ù tiah lơh ƀuơn rơlao”.

Nam 2026 geh kwơ màng ngan, do là nam geh bơyai lơh Pơrjum dờng cau ala măt gùt lơgar dơ̆ XIV Đảng dê, tĕ khà Quốk hội khoă XVI mờ Mpồl duh broă Làng bol ală kấp. Do kung là nam pờ sơnrờp tơngai bơtàu tơnguh pa mờ uă bơta niam bal mờ bơta lòng geh bơrlŭ bal. Broă lơh jăt rơndăp broă bơtàu tơnguh lơh sa mpồl bơtiàn nam 2026 càr Quảng Ngãi dê, tàm hơ̆ geh broă lơh gơs mpồl phan bơna gùng lòt rơ̆p geh ală bơta ƀuơn nàng gơguh lơh sa. Jơnau lơh nền tàm Pơrjum dờng cau ala măt Đảng ƀộ càr Quảng Ngãi dơ̆ sơnrờp, tơngai lơh broă bơh nam 2025 tus 2030 ai broă tơrgùm bơcri priă, hòi jà mờ ngui geh cồng nha ală bơta pràn nàng bơtàu tơnguh phan bơna ndrờm bal, lơh pa; ai lài phan bơna geh kwơ nàng ală sàh tàm tiah ngài, tiah làng bol jơi bơtiàn ờ gal cau in.

Nùs nhơm pràn lơh broă duh hồl tàm ală tiah lơh broă tiah bơnơm dê tàm ală ngai bồ nam pa là cơng tàng loh làng ngan ai broă lơh ngan hơ̆ in, ai geh bơnàng jă kwơ màng nàng ală tiah lơh pràn tàm tơngai pa. Ồng Nguyễn Hoàng Giang, Củ tịc Anih duh broă Làng bol càr Quảng Ngãi pà git: “Tơngai lơh rơndăp broă bal mờ broă bơcri priă dà lơgar nam 2026 pal gàr di mờ broă rơndăp lơh geh ai, do là kơnòl cíñ trị kwơ màng bơh tơl anih lơh broă, mpồl lơh broă, cau tờm bơcri priă lơh. Pal tơrgùm bơsong ală kal ke, lơh ngan lơh gơs ală rơndăp broă gam gơlời; ơm ờ lơh; bơsong jơh ală tiah gơkòl bè phan bơna, ù tiah, sră nggal bơcri priă; tơnguh broă tơm trờn ù tiah nàng lơh mhar broă bơcri priă ală rơndăp broă lơh phan bơna gùng lòt kwơ màng tàm càr dê”.