Mho ngai 29/9, tàm Hìu lơh broă Chính phủ, Mpồl Lơh kơnòl broă sùm Anih duh broă đơng lam Đảng Chính phủ mờ Mpồl Lơh kơnòl broă sùm Anih duh broă đơng lam Đảng Quốc hội bơyai lơh pơrjum sền wơl tơngai hơ pơrgon, lơh sir ală rơndap lơh adat boh lam, jơnau lơh nền tàm pơrjum mờ sră yal rơcang yal Quốc hội in tàm Dơ̆ pơrjum dơ̆ 2, Quốc hội khoă XVI. Ồng Lê Minh Hưng, Thủ tướng Chính phủ mờ ồng Trần Thanh Mẫn, Chủ tịch Quốc hội đơng lam bal dơ̆ pơrjum.

Tàm dơ̆ pơrjum do, Chính phủ kờp dŭ yal Quốc hội in 95 sră nggal, sră yal mờ jơnau yal, tàm hơ̆ geh 44 adat boh lam mờ jơnau lơh nền tàm pơrjum, geh 7 adat boh lam bơt bơtàu pa, 36 adat boh lam tam gơl, bơtơl mờ 1 jơnau lơh nền tàm pơrjum. Chính phủ gam jal mhar rơcang sră nggal jơnau lơh nền bơcri priă ai ală rơndap broă lơh ndrờm pal dà lơgar gơ wèt gơnăp gơnoar Quốc hội sền swì. Thủ tướng Lê Minh Hưng đơs sùm, khà broă uă ngan, uă rơndap lơh adat boh lam geh gơ rềng tơn tus làng bol mờ mpồl lơh sa kă bro bè Adat Ù tiah, Adat Kes priă dà lơgar, Adat Bơcri priă dà lơgar tơrgùm dùl, Adat lơh glài tìs kup màng mờ Adat lah yă tìs kup màng. Thủ tướng sồr ală anih lơh broă pơgồp bal nền nòn, rơcang bơh gờñ, bơsong jơh ală broă gam gơ kòl, gàr bơta niam mờ tơngai hơ pơrgon sră nggal yal Dơ̆ pơrjum dơ̆ 2, Quốc hội dê in.