Đơs pơn dut dơ̆ pơrjum, ồng Tô Lâm, Tổng Bí thư, Chủ tịch lơgar, Bí thư Anih duh broă đơng lam Đảng Dà lơgar cih dờp, đơs niam cồng nha lơh geh tàm quý 3, tàm hơ̆ Anih duh broă đơng lam Đảng Dà lơgar neh đơng lam jơh gùt ling klàng lơh jat nền nòn bơta đơng lam, sồr lơh Đảng, Dà lơgar dê, lơh niam bơhiàn ờs mờng pơn yờ să mờ nùs nhơm “Cau ling wa Hồ”, tam klac bal, sơrlèt gan tơl bơta kal ke, lam lơh tơl làm ală kơnòl broă ling klàng, sền gàr dà lơgar.

Đơs sùm, quý 4 là tŭ tơngai geh gơtha lơh nền tus cồng nha lơh gơs kơnòl broă nam 2026, ồng Tô Lâm, Tổng Bí thư, Chủ tịch lơgar sồr Anih duh broă đơng lam Đảng Dà lơgar kờñ pal tơrgùm đơng lam, sồr lơh kràñ cê ală broă lơh, lơh ngan lơh gơs tơl làm ală jơnau kờñ lơh geh, kơnòl broă nam 2026 mờ cồng nha uă ngan rlau jơh. Pơn jat tai đơng lam jơh gùt ling klàng rơcang lài, ngac ngar, git loh, đơs lài, sền swì di bơta geh ngan, lơh gơs niam kơnòl tă pơgồp jơnau đơs mờ Đảng, Dà lơgar ală broă lơh drơng wơl nàng bơsong ngac ngar, geh cồng nha ală broă gơlik geh, ờ lời gơtìp rơ mơp ndơl, nisơna, ngan là ală broă kuơmàng, broă tiah nhàr lơgar, dà lềng, bồt bơlàu, broă tàm internet.