Đơs tàm dơ̆ lơh broă, ồng Tô Lâm, Tổng Bí thư, Chủ tịch lơgar đơs loh, tơngai pa do, bulah khà dơ̆, broă drơng broă làng bol, sră pơ àr gơnoar atbồ gơguh, ală bơta ngai sơlơ kal ke, ală kấp ủy, mpồl Đảng mờ anih lơh broă sền gàr adat boh lam neh geh uă pơn đơl pràn lơh ngan, lơh geh cồng nha niam ngan.

Bulah bè hơ̆, bơta dơ̆ lơh tìs gam gơ kòl uă, jŏ jòng ờ hềt geh bơsong jơh, ồng Tô Lâm, Tổng Bí thư, Chủ tịch lơgar sồr pal sơlơ tơnguh tai bơta đơng lam bơh Đảng gơwèt mờ broă lơh rcang lài kơryan, bơsong tam pìt tam phà drơng broă làng bol, sră pơ àr gơnoar atbồ mờ bơyai lơh lơh glài. Mơkung pal pơn jat tai lơh sir ring bal adat boh lam, gàr niam gơnoar bơh làng bol dê geh sền gàr sùm bơh rcang gàr lài tam pìt tam phà tus lơh glài broă lơh tìs, bơsong ală jơnau sồr sră pơ àr ờ duh pal geh digơlan lơh tơn jŏ tŭ tơngai bơsong. Tổng Bí thư, Chủ tịch lơgar sồr ală anih lơh broă mhar lam lơh jat ală kơnòl broă geh gơrềng; broă neh loh den lơh mơ, broă gam gơ kòl den rcang lài tă bơsong, ờ tàm tuh bal broă lơh, ờ kơ̆p bal mờ gơ̆p tai. Tơl kơnòl broă pal sền gĭt loh anih lơh broă đơng lam, anih lơh broă pơgồp bal, phan bơna, tŭ tơngai.