Tàm dơ̆ lơh broă, ồng Tô Lâm, Tổng Bí thư, Chủ tịch lơgar đơs sùm, broă tơn jơh Jơnau lơh nền tàm pơrjum sồ 26 pal sền sơ wì di pal, tơl làm cồng nha lơh geh, sơñio loh ală bơta ờ hềt niam, bơta gam geh mờ jơnau tờm lơh gơbàn; mơkung ai ală jơnau bơsram mờng chài, lơh bơnàng jă sồr đơs ală broă lơh nền, gùng dà broă lơh bè broă lơh kwang bàng tàm tơngai pa.

Tổng Bí thư, Chủ tịch lơgar sồr broă tơn jơh kờñ pal jat nền tàm bơta geh ngan, ngan là ală broă pa gơlik geh tàm tŭ rơndăp mpồl kwang bàng lơh broă, tam pà kấp, tam pà gơnoar mờ mut lơh gơnoar atbồ ƀòn lơgar. Tơngume tơn jơh pal lơh loh bơta gam gơkòl, ală jơnau sồr ờ hềt di pal nàng dan tam gơl niam, bơtơl.  Mơkung pal pơn jat tai tam gơl pa pràn kơl dang broă lơh kwang bàng jat gùng dà rơwah di cau, jàu di broă, sền sơwì kwang bàng mờ cồng nha lơh jat kơnòl broă; sền gròi bơt bơtàu mpồl kwang bàng geh nùs nhơm khin cha chính trị, nùs nhơm lơh broă, bơta pràn jak geh ngan, lơh geh jơnau sồr bơtàu tơnguh dà lơgar tàm tơngai pa.