Tàm pơrjum, cau tĕ khà đơs uă broă gơ rềng tơn tus rài kis bè ù tiah, rơndap ù tiah, bơto bơsram, lơh sơnơm, gùng lòt, tiah ơm kis mờ kloh niam ờdo ờdă phan sa. Cau tĕ khà kung sồr ală rơndap broă lơh bơtàu tơnguh tàm ƀòn lơgar pal gàr gơnoar kuơ, broă lơh jŏ jòng làng bol dê, ngan là tàm broă lơh ai ù lơh rơndap broă lơh, tơm wơl priă mờ rơndap ƀòn ơm kis pa.

Bè kloh niam ờdo ờdă phan sa, ồng Tô Lâm, Tổng Bí thư, Chủ tịch lơgar sồr gròi sền nền nòn bơh broă lơh gơlik tus tac, sơlơ jòi git anih lơh gơlik, lơh glài kràñ bơta phan sa ờ ngan, phan sa ƀơ̆, ờ lời gơlik geh bơta ha pah tàm atbồ. Gơwèt mờ ală broă cau tĕ khà yal wơl, ồng Tô Lâm, Tổng Bí thư, Chủ tịch lơgar sồr anih lơh broă geh gơnoar git loh cau kong kơnòl, tơngai pơrgon bơsong mờ yal wơl cồng nha cau tĕ khà in. Ală broă sơrlèt rlau gơnăp gơnoar kờñ pal geh tơrgùm wơl, yal wơl mờ Quốc hội, Chính phủ mờ ală anih lơh broă Dà lơgar, mờ kung jat sền, sền gròi broă lam lơh.