Rơndăp broă lơh nàng kờñ rơhời lơh wơl ù tiah anih tờm bơh Gơlăng Bơtau Thăng Long dê, mơkung prăp gàr mờ ngui niam ală bơta kwơ kah yau, niam chài bơh Phan lời wơl Dunia dê. Gơlăng Kính Thiên neh geh tŭ ăt gơnoar broă tiah tờm bơh Gơlăng Bơtau Thăng Long. Do là anih tờm gơnăp gơnoar mờ ù tiah pơrjum lơh yàng gơlăng bơtau dê, là tiah tìp măt, bơyai lơh pơrjum dờng mờ wă cau ala măt lơgar ndai, là rùp pơrya dờng ngan rlau jơh bơh gơnăp gơnoar dà lơgar Đại Việt dê tàm jơh gùt tŭ tơngai ală rài 15 tus 18 dê. Gùng dà broă rơndăp lơh lơh wơl geh lơh jăt tàm bơta 15 nam kơlôi sơnơng ală gah bè jơnau kah yau, kơlôi sơnơng jòi sền phan yau, hìu đam mờ phan lời wơl ờ di phan bơna, bal mờ bơta tus bal bơto pơlam bơh UNESCO mờ ICOMOS dê.

Ƀòn dờng Hà Nội sồr ală tŭ sền gàr ătbồ, lơh niam wơl, lơh wơl pal jăt tàm bơta jak chài, ki ngàm uă ngan ală jơnau tờm mờ sền gàr gam wơl bè ờs ală tềl lời wơl jòi sền phan yau neh tơnggŏ bơdìh. Rơndăp broă lơh geh gĭt nền là broă bơh sơnrờp kwơmàng tàm broă lơh jăt bơta wèt sền lơh wơl anih tờm Gơlăng Bơtau Thăng Long tus nam 2035, pơgồp bơnah ai ală bơta kwơ phan lời wơl tus rềp rlau mờ làng bol mờ năc lòt nhơl.