Lài hơ̆, kung tàm Pơrjum dơ̆ sơnrờp Mpồl Duh broă Đảng Dà lơgar khoă XIV, ồng Trần Sỹ Thanh geh pồ mŭt tàm Ƀộ Cíñ trị khoă XIV.

            Cau lam bồ pa Anih duh broă Sền swì Dà lơgar ồng Trần Sỹ Thanh deh nam 1971, ƀòn tờm càr Nghệ An. Ồng geh sră cơng tàng bơsram Thạk sìh Lơh sa, Đại họk Priă jền – lơh broă priă jền; Kâp dờng cribơyai jơnau tàm sră pơ àr cíñ trị.

            Ồng là Kwang bàng Đảng Dà lơgar khoă XI (rơcăng lài), XII, XIII, XIV;  cau ala măt Quôk hội 2 khoă XIV, XV.

Tàm ală tŭ lơh broă, ồng neh geh tŭ ăt gơnoar broă: Lam bồ Cơldŭ lơh broă Kes priă Dà lơgar (Ƀộ Cíñ trị); Phó Kwang Lam bồ dờng Kes priă Dà lơgar; Phó Củ tịc Anih duh broă Làng bol càr Dăk Lăk; Phó Ƀí thư Tỉñ ủy càr Dăk Lăk; Ƀí thư Tỉñ ủy càr Bắc Giang; Phó Cau lam bồ Anih duh broă Sền swì Dà lơgar; Ƀí thư Tỉñ ủy càr Lạng Sơn; Phó Lam bồ Mpồl Lơh sa Dà lơgar; Củ tịc Mpồl duh broă geh jơng Tập đoàn Nhơm zờu dà lơgar; Phó Cau lam bồ Cơldŭ lơh broă Quôk hội; Lam bồ dờng Kờp sền broă dơ̆ ngui priă jền Dà lơgar.

Nhai 7/2022, Ƀộ Cíñ trị sồr ntrờn, jàu broă ồng Trần Sỹ Thanh mŭt bal tàm Mpồl Duh broă, Mpồl Lơh kơnòl broă sùm mờ ăt gơnoar broă Phó Ƀí thư Thàñ ủy ƀòn dờng Hà Nội. Tơnơ̆ hơ̆ ồng geh Mpồl duh broă Làng bol ƀòn dờng Hà Nội pồ lơh Củ tịc Anih duh broă Làng bol ƀòn dờng Hà Nội.

            Ngai 5/11/2025, tàm Pơrjum dơ̆ 14 Mpồl Duh broă Đảng Dà lơgar khoă XIII, ồng Trần Sỹ Thanh geh pồ mŭt bal tàm Anih duh broă Sền swì Dà lơgar mờ ăt gơnoar broă Cau lam bồ Anih duh broă Sền swì Dà lơgar khoă XIII.